Jeremiah Chapter 43 - Paipera Tapu 1868 | Te Paipera Tapu 1868

Jeremiah Chapter 43 - Paipera Tapu 1868

1
A ka poto katoa i a Heremaia te korero ki te iwi katoa nga kupu a Ihowa a to ratou Atua i ungā mai ai ia e Ihowa e to ratou Atua ki a ratou, ara, enei kupu katoa ki te iwi katoa,
2
Na, ka korero mai a Ataria tama a Hohaia, ratou ko Hohanana tama a Karea, ko nga tangata whakapehapeha katoa, ka mea ki a Heremaia, E korero teka ana koe; kihai a Ihowa to tatou Atua i unga mai i a koe hei mea mai, Kaua koutou e haere ki Ihipa noho ai.
3
Engari he mea whakaki koe na Paruku tama a Neria, ki te he mo matou, kia tukua ai matou ki te ringaringa o nga Karari, kia whakamatea ai matou, kia whakaraua atu ai ano matou ki Papurona.
4
Na, kihai a Hohanana tama a Karea, ratou ko nga rangatira katoa o nga ope, ko te iwi katoa ano hoki i whakarongo ki te reo o Ihowa, kihai i noho ki te whenua o Hura.
5
Na, ka mau a Hohanana tama a Karea ratou ko nga rangatira katoa o nga ope ki nga morehu katoa o Hura i hoki mai nei i nga iwi katoa, i peia atu ai ratou, ki te whenua o Hura noho ai;
6
Ki nga tane, ki nga wahine, ki nga tamariki, ki nga tamahine ano a te kingi, ki nga tangata katoa i waiho nei e Neputara-arana rangatira o nga kai tiaki ki a Keraria tama a Ahikama tama a Hapana, ratou ko Heremaia poropiti, ko Paruku tama a Neria.
7
A haere ana ki te whenua o Ihipa; kihai hoki ratou i whakarongo ki te reo o Ihowa. Na, ka tae ratou ki Tahapanehe.
8
Na, ko te putanga mai o te kupu a Ihowa ki a Heremaia ki Tahapanehe; i mea ia,
9
Maua atu etahi kohatu nui i tou ringa, hunā ki roto ki te paru ki te tahunga pereki, ki tera i te kuwaha o te whare o Parao, i Tahapanehe; kia kite mai ano nga tangata o Hura.
10
Mea atu ano ki a ratou, Ko te kupu tenei a Ihowa o nga mano, Atua o Iharaira; Tenei au ka unga tangata nei ki te tiki i taku pononga i a Nepukararetara kingi o Papurona, ka tu ano i a au tona torona ki runga ki enei kohatu kua hunā nei e ahau, ka horahia ano hoki e ia ana kakahu whakapaipai ki runga.
11
Ka tae mai ano ia, ka patu i te whenua o Ihipa, ka tukua atu ano nga mea mo te mate ki te mate, nga mea mo te whakarau ki te whakarau, nga mea ma te hoari ki te hoari.
12
Ka ngiha ano i a au he ahi i roto i nga whare o nga atua o Ihipa; ka tahuna ano hoki ratou e ia, ka whakaraua atu ratou, ka kakahuria ano e ia te whenua o Ihipa, me te mea he hepara e kakahu ana i tona kakahu; haere tonu atu ano ia i reira i runga i te rangimarie.
13
Ka wawahia ano hoki e ia nga whakapakoko o Pete-hemehe, o tenei Ihipa nei, ka tahuna ano e ia ki te ahi nga whare o nga atua o Ihipa.