Jeremiah Chapter 6 - Paipera Tapu 1868 | Te Paipera Tapu 1868

Jeremiah Chapter 6 - Paipera Tapu 1868

1
Putere atu, e nga tamariki a Peniamine, i roto i Hiruharama, whakatangihia hoki te tētere ki Tekoa, kokiritia ake te ahi tohu ki Pete-hakereme: he kino hoki te puta mai nei i te nota, he whakangaromanga nui.
2
Ki taku e rite ana te tamahine a Hiona ki te wahine ataahua, ki te mea whakatarapi.
3
Te haerenga mai o nga hepara, me a ratou kahui ki a ia; whakaturia ana e ratou o ratou teneti ki tetahi taha ona, ki tetahi taha; kai ana ratou ki tona wahi, ki tona wahi.
4
Kia rite nga mea mo te whawhai ki a ia; whakatika, kia whakaekea atu e tatou i te poutumarotanga. Aue te mate mo tatou! kua tawharara hoki te ra, kua whakawairua kau ano hoki nga atarangi o te ahiahi.
5
Maranga, kia whakaekea atu e tatou i te po, kia wawahia ano e tatou ona whare kingi.
6
Ko te kupu hoki tenei a Ihowa o nga mano, Tuaina he rakau, haupuria ake he pukepuke hei whawhaitanga atu ki Hiruharama; ko te pa tenei e whiua; he tukino kau tana i roto i a ia.
7
Rite tonu ki te pukenga ake o te wai o te puna te pukenga ake o tona kino: he tukino, he pahua te rangona ana i roto i a ia; kei toku aroaro tonu te ngakau pouri, me nga patunga.
8
E ako, e Hiruharama, kei puta ke taku ngakau ki a koe, kei meinga koe e ahau kia ururuatia, he whenua kahore e nohoia.
9
Ko te kupu tenei a Ihowa o nga mano, Ka ata hamua marietia e ratou nga toenga o Iharaira, ano he waina; kia rite tau ki ta te kai kohi karepe, whakahokia iho to ringa ki roto ki nga kete.
10
Ki a wai ra taku korero, taku whakaatu tikanga, e rongo ai ratou? nana, he mea kokoti-kore to ratou taringa, tē whakarongo ai ratou: nana, hei tawainga ma ratou te kupu a Ihowa, kahore e arongia atu e ratou.
11
Na, kī tonu ahau i te riri a Ihowa; ruha iho ahau i a au e pehi iho nei: ka ringitia atu ki runga ki te kohungahunga i waho, ki te whakaminenga ano o nga taitamariki, hui katoa: no te mea ka hopukia te tane raua ko te wahine, te koroheke raua ko te tangata kua maha ona ra.
12
Ka riro ke o ratou whare i etahi atu, nga mara ngatahi ano ko nga wahine: no te mea ka totoro atu toku ringa ki nga tangata o te whenua, e ai ta Ihowa.
13
Te mea iti o ratou, te mea nui, ratou katoa, kei runga i te apo: te poropiti, te tohunga, ratou katoa kei te mahi teka.
14
Ta ratou rongoatanga ano i te pakaru o te tamahine a toku iwi he hanga noa iho; e ki ana, Ka mau te rongo, ka mau te rongo; i te mea kahore nei he maunga rongo.
15
I whakama ranei ratou i a ratou e mahi ana i nga mea whakarihariha? hore rawa o ratou whakama, kahore hoki ā ratou meatanga ake ki te numinumi: mo reira ka hinga ratou i roto i te hunga e hinga ana: i te wa e whiu ai ahau i a ratou, ka taka ratou, e ai ta Ihowa.
16
Ko te kupu tenei a Ihowa, E tu koutou ki nga huarahi, tirohia atu, ui atu ki nga huarahi tawhito, kei hea te huarahi pai, ka haere i reira, a ka kite koutou i te tānga manawa mo o koutou wairua. Heoi e ki mai ana ratou, E kore matou e haere.
17
I whakaturia ano e ahau etahi kai tutei ma koutou, i mea ahau, Whakarongo atu ki te tangi o te tētere. Heoi e ki mai ana ratou, E kore matou e whakarongo.
18
Mo reira, whakarongo, e nga iwi, kia mohio ano koe, e te huihui, ki nga mea mo ratou.
19
Whakarongo, e te whenua: tenei au te kawe atu nei i te kino mo tenei iwi, i nga hua o a ratou whakaaro, mo ratou kihai i whakarongo ki aku korero; taku ture ano hoki, whakaparahakotia ake e ratou.
20
Hei aha te whakakakara i tae mai ai ki a au i Hepa, te kakaho reka i te whenua tawhiti? e kore ā koutou tahunga tinana e arongia atu, e kore ano a koutou patunga tapu e reka ki a au.
21
Mo reira ko te kupu tenei a Ihowa, Tenei au te whakatakoto nei i nga tūtukinga waewae ki mua i tenei iwi, e hinga ngatahi ai nga mātua, nga tamariki; ka ngaro te tangata noho tata raua ko tona hoa.
22
Ko te kupu tenei a Ihowa, Tenei te haere mai nei he iwi i te whenua ki te nota, ka whakaarahia mai ano hoki he iwi nui i nga taha o te whenua.
23
He kopere, he tao, ta ratou e pupuri ai, he nanakia ratou, e kore ano e tohu tangata; to ratou reo, ano ko te moana e haruru ana; i runga i nga hoiho e noho ana, whakararangi rawa, me te mea he tangata e mea ana ki te whawhai ki a koe, e te tamahine a Hiona.
24
Kua rongo matou ki tona rongo; ngoi-kore iho o matou ringa, mau pu matou i te pawera, i te mamae, me te mea ko tetahi wahine e whanau ana.
25
Kei puta atu ki te mara, kaua hoki e haere i te ara; kei nga taha katoa hoki te hoari a te hoa riri, me te wehi.
26
E te tamahine a toku iwi, whitikiria te kakahu taratara, ka takaoriori ki te pungarehu; kia rite ki te tangihanga ki te tamaiti huatahi to tangi ki a koe, kia tiwerawera te tangi: no te mea kihai i aha kua tae mai te kai pahua ki a tatou.
27
Kua oti koe te mea e au hei pourewa, hei pa kaha, i roto i toku iwi, kia mohio ai koe, kia whakamatau ai koe i to ratou ara.
28
Tutu rawa ratou katoa, ta ratou i a ratou e haereere ana he ngau-tuara: he parahi ratou, he rino; he hunga whakangau ke ratou katoa.
29
Kua wera te pupuhi ahi, kua pau te mata i te ahi, maumau whakarewa noa te kai tahi para: kahore nei hoki te hunga kino kia unuhia atu.
30
He hiriwa i whakaparahakotia e karangatia ki a ratou, no te mea kua whakaparahako nei a Ihowa ki a ratou.