- 1
- Na, e ono nga ra i mua ake o te Kapenga ka haere a Ihu ki Petani, kei reira nei a Raharuhi i mate ra, i whakaarahia ake nei e ia i te hunga mate.
- 2
- A taka ana e ratou he hapa māna ki reira, ko Māta te kai taka: ko raharuhi tetahi o te hunga i noho tahi me ia.
- 3
- Na, ka mau a Meri ki tetahi pauna hinu kakara, he tino nara, he mea utu nui, a whakawahia ana e ia nga waewae o Ihu, me te muru ano i ona waewae ki ona makawe; kī noa te whare i te kakara o te hinu.
- 4
- Na, ka mea tetahi o ana akonga, a Hura Ikariote tama a Haimona, tenei meake nei tuku i a ia,
- 5
- He aha tenei hinu tē hokoa ai ki nga pene e toru rau, ka hoatu ai ki te hunga rawa-kore?
- 6
- I korerotia ai tenei e ia, ehara i te mea he whakaaro nona ki te hunga rawa-kore; erangi no te mea he tahae ia, i a ia hoki te putea, ko ia hoki hei mau i nga mea i whaongia ki roto.
- 7
- Na, ko te meatanga a Ihu, Waiho ra u ana: i tohungia tenei e ia mo te ra o toku tanumanga.
- 8
- Kei a koutou hoki nga rawa-kore i nga wa katoa; ko au ia e kore e noho tonu i a koutou.
- 9
- He tokomaha nga tāngata o nga Hurai i mātau, kei reira a Ihu: a haere atu ana ratou, ehara i te mea mo Ihu anake, erangi kia kite i a Raharuhi ano hoki, i whakaarahia e ia i te mate.
- 10
- Otira kua takoto te whakaaro a nga tohunga nui kia whakamatea ano hoki a Raharuhi;
- 11
- Nana hoki i tokomaha ai nga Hurai i haere, i whakapono ki a Ihu.
- 12
- I te aonga ake ka rongo te mano tini i haere mai nei ki te hākari, e haere mai ana a Ihu ki Hiruharama.
- 13
- Ka mau ratou ki nga manga nikau, haere atu ana ki te whakatau i a ia, me te karanga, Ohana: ka whakapaingia te Kingi o Iharaira, e haere mai ana i runga i te ingoa o te Ariki.
- 14
- Ano ka kite a Ihu i tetahi kuao kaihe, ka noho ia i runga; ka pera ano me te mea i tuhituhia,
- 15
- Kaua e mataku, e te tamahine o Hiona: na, kei te haere mai tena tou Kingi, e noho ana i runga i te kuao kaihe.
- 16
- Otiia kihai ana akonga i mātau wawe ki anei mea: engari ka oti a Ihu te whakakororia, katahi ratou ka mahara kua tuhituhia enei mea mona, a kua meinga ano enei mea e ratou ki a ia.
- 17
- I whakaae ano te hunga i tona taha i tana karangatanga i a Raharuhi i roto i te urupa, i tana whakaarahanga hoki i a ia i te hunga mate.
- 18
- Na konei hoki te mano i whakatau atu ai i a ia, i rongo hoki ratou, kua meinga tenei merekara e ia.
- 19
- Na, ka mea nga Parihi ki a ratou ano, Ka kite ranei koutou kahore a koutou wahi? na, kua riro atu te ao ki te whai i a ia.
- 20
- Na, he Kariki etahi o te hunga i haere mai ki te hākari ki te karakia:
- 21
- A haere mai ana enei ki a Piripi o Petahaira o Kariri, a ki atu ana ki a ia, mea atu ana, E kara, e hiahia ana matou kia kite i a Ihu.
- 22
- Haere ana a Piripi, korero atu ana ki a Anaru: na Anaru ano hoki raua ko Piripi i korero ki a Ihu.
- 23
- Ka ki mai a Ihu ki a raua, ka mea, Kua tae mai te haora e whakakororiatia ai te Tama a te tangata.
- 24
- He pono, he pono taku e mea atu nei ki a koutou, Ki te kore tetahi pata witi e marere ki te oneone, a e pirau, ka takoto ko ia anake: tena ki te pirau, he nui ona hua.
- 25
- Ki te aroha tetahi ki te ora, ka mate ano ia; a ki te kino tetahi ki te ora i tenei ao, ka tūturu ki a ia te ora ake ake ake.
- 26
- Ki te mea tetahi ko ia hei kai mahi maku, me aru mai ahau e ia: a, te wahi e noho ai ahau, ko reira ano hoki taku kai mahi: a ki te mahi tetahi i aku mahi, ma toku Matua ia e whakahonore.
- 27
- Kua pouri tenei toku wairua; a kia pehea atu ahau? E Pa, whakaorangia ahau i tenei wa: otira ko te mea ano tenei i haere mai ai ahau ki tenei wa.
- 28
- E Pa, whakakororiatia tou ingoa. Na, ka puta mai he reo i te rangi, Kua whakakororiatia e ahau, a e whakakororiatia ano.
- 29
- A, te rongonga a nga tāngata e tu ana i reira, ka mea, He whatitiri: ko etahi i mea, Kua korero tetahi anahera ki a ia.
- 30
- Ka whakahokia mai e Ihu, ka mea, Ehara tenei reo i puta mai nei i te mea moku, engari mo koutou.
- 31
- Ko aianei te whakawa mo tenei ao: ko aianei maka ai te rangatira o tenei ao ki waho.
- 32
- A ki te whakairihia ake ahau ki runga i te whenua, maku nga tāngata katoa e kukume ki a au.
- 33
- I penei atu ia hei whakaatu i te mate e mate ai ia.
- 34
- Ka whakahokia atu e te mano ki a ia, Kua rongo matou ki ta te ture, e ora tonu ana a te Karaiti: a he aha tau e mea, Me whakairi te Tama a te tangata? Ko wai koia tenei Tama a te tangata?
- 35
- Ano ra ko Ihu ki a ratou, He wahi iti nei te maunga o te māramatanga i roto i a koutou. Haere ra i te mea e whai māramatanga ana koutou, kei rokohina koutou e te pouri: ko ia hoki e haere ana i te pouri e kore e kite i te wahi e haere ai ia.
- 36
- I te mea kei a koutou te māramatanga, me whakapono ki te māramatanga, kia meinga ai koutou he tamariki na te māramatanga. I korerotia e Ihu enei mea, a haere ana, huna ana i a ia, kei kitea e ratou.
- 37
- Heoi ahakoa i meatia e ia aua merekara e maha ki to ratou aroaro, kihai ratou i whakapono ki a ia:
- 38
- I rite ai te korero a Ihaia poropiti, tana i mea ai, E te Ariki, ko wai i whakapono ki ta matou korero? i whakakitea hoki ki a wai te ringaringa o te Ariki?
- 39
- Koia hoki ratou tē ahei ai te whakapono, e korero ana ano hoki a Ihaia.
- 40
- I whakamatapotia e ia o ratou kanohi, i whakapakeketia o ratou ngakau; kei kite nga kanohi, kei mātau hoki te ngakau, kei tahuri ratou, a ka whakaorangia e ahau.
- 41
- I korerotia enei mea e Ihaia, i te wa i kite ai ia i tona kororia, i puaki ai hoki tana kupu mona.
- 42
- He ahakoa ra he tokomaha ano hoki nga rangatira i whakapono ki a ia; otira kihai i whakaae ki a ia, he whakaaro hoki ki nga Parihi, kei peia ratou ki waho o te whare karakia:
- 43
- Ko ta te tangata honore hoki ta ratou i rawe ai, a kapea ake ta te Atua honore.
- 44
- Na, ka karanga a Ihu, ka mea, Ki te whakapono tetahi ki a au, ehara ahau i tana i whakapono mai ai, engari ko toku kai tono mai.
- 45
- A ko ia e kite ana i a au, e kite ana hoki i toku kai tono mai.
- 46
- Kua tae mai nei ahau hei whakamarama mo te ao, kei noho i te pouri tetahi e whakapono ana ki a au.
- 47
- Na, ki te rongo tetahi ki aku kupu, a e kore e whakapono, e kore ahau e whakahe i a ia: kihai hoki ahau i haere mai ki te whakahe i te ao, engari ki te whakaora i te ao.
- 48
- Ko ia e whakakahore ana ki a au, a e kore e tango ki aku kupu, tena ano te kai whakahe mona; te kupu i korerotia e ahau, ko tena hei whakahe mona a te ra whakamutunga.
- 49
- No te mea ehara i a au ake aku korero; engari na te Matua i tonoa mai ai ahau, nana i tuku mai te ture ki a au, mo taku e korero ai, mo taku e ki ai.
- 50
- A e mahara ana ano ahau he oranga tonutanga tana ture: na, aku e korero nei, rite tonu ki ta te Matua i mea mai ai ki a au taku korero.
Address: 
Phone: 
Email: