- 1
- Na, i mua ake o te hākari o te Kapenga, ka mahara a Ihu kua taka tana wa e haere atu ai ia i tenei ao ki te Matua; aroha ana ia ki ona o te ao nei, arohaina ana ratou taea noatia te mutunga.
- 2
- Na, te mutunga o te hapa, kua whakamaharatia noatia ake ano hoki e te rewera te ngakau o Hura Ikariote, tama a Haimona, kia tukua ia;
- 3
- A ka mahara ano a Ihu kua oti nga mea katoa te homai e te Matua ki ona ringa, a i haere mai ano ia i te Atua, a e hoki atu ana ki te Atua;
- 4
- Ka whakatika ia i te hapa, ka whakarere i ona kakahu; ka mau ki te tauera, ka whitiki i a ia.
- 5
- Me i reira ka ringihia e ia he wai ki te pehana, a ka anga ka horoi i nga waewae o nga akonga, ka muru hoki ki te tauera i whitikiria ai ia.
- 6
- A, tona haerenga mai ki a Haimona Pita; ka mea mai tera ki a ia, e te Ariki, e horoi ana koe i oku waewae?
- 7
- Ka whakahokia mai e Ihu, ka mea ki a ia, E kore koe e mātau aianei ki taku e mea nei: otira e mātau koe a mua ake nei.
- 8
- Ka mea atu a Pita ki a ia, E kore rawa koe e horoi i oku waewae. Ka whakahokia mai e Ihu ki a ia, Ki te kore ahau e horoi i a koe, kahore au wahi i roto i a au.
- 9
- Ka mea a Haimona Pita ki a ia, E te Ariki, aua ra ko oku waewae anake, engari ko oku ringaringa me toku mātenga ano hoki.
- 10
- Ka mea a Ihu ki a ia, Ki te mea i te horoi tetahi, kahore atu he aha mana, ko te horoi anake i ona waewae, e ma katoa ana hoki ia: a e ma ana ano koutou; he teka ia te katoa.
- 11
- I mohio hoki ia ki te tangata e tukua ai ia; koia ia i mea ai, Kahore koutou katoa i ma.
- 12
- A ka oti o ratou waewae te horoi, a ka mau ia ki ona kakahu, ka noho ano, na, ka mea ki a ratou, E mātau ana ranei koutou ki taku i mea nei ki a koutou?
- 13
- E karangatia ana ahau e koutou, E te Kai whakaako, E te Ariki: a e tika ana ano ta koutou korero; ko ahau hoki ia.
- 14
- Na, kua horoia nei o koutou waewae e ahau e to koutou Ariki, e to koutou Kai whakaako; me horoi ano hoki e koutou nga waewae o tetahi o tetahi.
- 15
- Kua whakatakotoria atu nei hoki e ahau he tauira ma koutou, kia rite ai ta koutou mahi ki taku i mea nei ki a koutou.
- 16
- He pono, he pono taku e mea atu nei ki a koutou, Kahore te pononga i nui ake i tona rangatira; e kore ano hoki te Iangata i tonoa e nui atu i tona kai tono.
- 17
- Ki te mātau koutou ki enei mea, ka koa ki te meatia e koutou.
- 18
- Ehara taku i te korero mo koutou katoa: e mātau ana ahau ki aku i whiriwhiri ai: otira kia rite ai te Karaipiture, Ko ia e kai taro tahi nei maua kua hiki ake tona rekereke ki a au.
- 19
- Na, ka korerotia nei e ahau ki a koutou i te mea kahore ano i puta noa, mo te puta rawa mai, kia whakapono ai koutou, ko ahau ia.
- 20
- He pono, he pono taku e mea atu nei ki a koutou, Ki te tango tetahi ki taku e tono ai, e tango ana ia i a au; a ki te tango tetahi i a au, e tango ana ki toku kai tono mai.
- 21
- Ano ka korerotia atu a Ihu enei mea, ka pouri tona wairua, a ka korero ia, ka mea, He pono, he pono taku e mea nei ki a koutou, ma tetahi o koutou ahau e tuku.
- 22
- Na, ka titiro nga akonga tetahi ki tetahi, ka pohehe, ko wai ranei tana i korero ai.
- 23
- Na, i te whakawhirinaki atu ki te uma o Ihu tetahi o ana akonga, ta Ihu hoki i aroha ai.
- 24
- Na, ka tungou a Haimona Pita ki a ia kia ui atu, ko wai ranei tana i korero ai.
- 25
- Na, ka takoto atu ia ki te uma o Ihu, a ka mea ki a ia, E te Ariki, ko wai koia?
- 26
- Ka whakahokia mai e Ihu, Ko te tangata e hoatu ai e ahau te maramara taro ki a ia, ina toua iho e ahau. Ano ka toua iho e ia te maramara taro, ka hoatu ki a Hura Ikariote tama a Haimona.
- 27
- A muri iho i te maramara taro, ka tomo a Hatana ki roto ki a ia. Na, ka mea a Ihu ki a ia, E ahua te mea i tau e mea ai.
- 28
- Kahore ia tetahi o te hunga i taua hapa ra i mātau mo te aha tenei i korerotia nei e ia ki a ia.
- 29
- I mea hoki etahi, no te mea i a Hura te putea, koia a Ihu i mea ai ki a ia. Hokoa nga mea ma tatou mo te hākari; kia hoatu ranei tetahi mea ma nga rawa-kore.
- 30
- Na, ka Tangohia e ia te maramara taro, haere tonu atu ki waho: he po ano hoki.
- 31
- A, tona rironga atu ki waho, ka mea a Ihu, Katahi te Tama a te tangata ka whakakororiatia, a ka whai kororia ano te Atua i a ia.
- 32
- Ki te whai kororia a te Atua i a ia, ka whai kororia ano ia i roto i te Atua ake, ina ka hohoro ia te whakakororia e ia.
- 33
- E nga tamariki, poto kau nei taku noho i a koutou. Tera koutou e rapu i a au: a ko taku i mea ai ki nga Hurai, E kore koutou e ahei te haere ake ki te wahi e haere ai ahau; ko taku kupu ano hoki tena ki a koutou.
- 34
- He ture hou taku ka hoatu nei ki a koutou, Kia aroha koutou tetahi ki tetahi; kia rite ki toku aroha ki a koutou, whaihoki kia aroha koutou tetahi ki tetahi.
- 35
- Ma konei ka mātau ai te katoa, he akonga koutou naku, me ka aroha koutou tetahi ki tetahi.
- 36
- Ka mea a Haimona Pita ki a ia. E te Ariki, e haere ana koe ki hea? Ka whakahokia mai e Ihu ki a ia, E kore koe e ahei te aru i a au aianei ki te wahi e haere atu nei ahau; a mua ia ka aru koe i a au.
- 37
- Ka mea a Pita ki a ia, E te Ariki, he aha ahau tē aru ai i a koe aianei nei ano? Ka tuku ahau i a au kia mate, he whakaaro naku ki a koe.
- 38
- Ka whakahokia mai e Ihu ki a ia, E tuku oti koe i a koe ki te mate, he whakaaro nau ki a au? He pono, he pono taku e mea atu nei ki a koe, E kore e tangi te tikaokao, kia toru ra ano āu whakakahoretanga ki a au.
Address: 
Phone: 
Email: