John Chapter 3 - Paipera Tapu 1868 | Te Paipera Tapu 1868

John Chapter 3 - Paipera Tapu 1868

1
Na, he tangata tera no nga Parihi, ko Nikorima tona ingoa, he rangatira no nga Hurai:
2
I haere mai tenei ki a Ihu i te po, a ka mea ki a ia, E Rapi, e mātau ana matou i haere mai koe i te Atua hei kai whakaako, ina hoki e kore tetahi tangata e ahei te mea i anei merekara e meatia nei e koe, ki te kahore te Atua i a ia.
3
Ka whakahokia mai e Ihu, ka mea ki a ia, He pono, he pono taku e mea atu nei ki a koe, Ki te kahore te tangata e whanau hou, e kore ia e ahei te kite i te rangatiratanga o te Atua.
4
Ka mea a Nikorima ki a ia, Me pehea ka whanau ai te tangata i tona koroheketanga? e taea ranei te takirua o nga haerenga ki roto ki te kopu o tona whaea, whanau mai ai?
5
Ka whakahokia mai e Ihu, He pono, he pono taku e mea atu nei ki a koe, Ki te kahore te tangata e whanau i te wai, i te Wairua hoki, e kore ia e ahei te tomo ki roto ki te rangatiratanga o te Atua.
6
Ko ta te kikokiko e whanau ai he kikokiko; a ko ta te Wairua e whanau ai he wairua.
7
Aua ra e miharo ki taku i mea atu nei ki a koe, He mea tūturu tenei, ara, kia whanau hou koutou.
8
E pupuhi ana te hau ki tana wahi e pai ai, a ka rongo koe ki tona harurutanga, otiia e kore e mohiotia e koe te wahi i puta mai ai, e tae atu ai ranei: ko te ritenga tenei ki te hunga katoa ka whanau i te Wairua.
9
Ka whakahokia atu e Nikorima, ka mea ki a ia, Me pehea ka taea ai enei mea?
10
Ka whakahokia mai e Ihu, ka mea ki a ia, He kai whakaako koe no Iharaira, a kahore i mātau ki enei mea?
11
He pono, he pono taku e mea atu nei ki a koe, E korerotia ana e matou ta matou i mātau ai, a e whakaaturia atu ana ta matou i kite ai; heoi, e kore koutou e tango mai ki ta matou whakaaturanga.
12
Ki te mea kua korerotia e ahau ki a koutou nga mea o te whenua, a e kore koutou e whakapono, me pehea ka whakapono ai koutou ki te korerotia e ahau ki a koutou nga mea o te rangi?
13
Kahore hoki he tangata i kake noa ki runga ki te rangi, ko ia anake i heke iho i te rangi, ko te Tama a te tangata, e noho mai nei ano hoki i te rangi.
14
Ka rite hoki ki tā Mohi whakairinga i te nakahi i te koraha; kua takoto te tikanga kia pera ano te whakairinga o te Tama a te tangata:
15
Kia kahore ai e mate te tangata e whakapono ana ki a ia, engari kia whiwhi ki te oranga tonutanga.
16
Koia ano te aroha o te Atua ki te ao, homai ana e ia tana Tama kotahi, kia kahore ai e mate te tangata e whakapono ana ki a ia, engari kia whiwhi ai ki te oranga tonutanga.
17
Kihai hoki te Atua i tono mai i tana Tama ki te ao, ki te whakahē i te ao; engari kia ora ai te ao i a ia.
18
Ko ia e whakapono ana ki a ia, e kore e whakahengia: tena ko ia e kore e whakapono, kua whakahengia noatia ake, mona kihai i whakapono ki te ingoa o te Tama kotahi a te Atua.
19
A ko te whakahenga tenei, no te mea kua tae mai nei te māramatanga ki te ao, a nui atu to nga tāngata aroha ki te pouri i to ratou ki te māramatanga, he kino hoki no a ratou mahi.
20
E kino ana hoki ki te māramatanga nga kai mahi katoa i te kino, e kore ano hoki e haere mai ki te māramatanga, kei whakakitea a ratou mahi.
21
Tena ko te kai mahi i te pono, e haere mai ana ki te māramatanga, kia kitea ai ana mahi, i mahia i roto i te Atua.
22
A no muri iho i anei mea ka haere a Ihu, ratou ko ana akonga, ki te whenua o Huria; a noho tahi ana ratou ki reira, me tana iriiri ano.
23
Na, i te iriiri ano hoki a Hoani ki Enona, ki tetahi wahi e tata ana ki Herema, no te mea he nui te wai o reira: a ka haere mai ratou, ka iriiria.
24
Kahore hoki i pangā noatia a Hoani ki te whare herehere.
25
Na, ka totohe nga akonga a Hoani ki nga Hurai ki te whakamakanga.
26
A ka haere mai ratou ki a Hoani, ka mea ki a ia, E rapi, te tangata i tera taha a korua i Horano, tau i whakaatu mai na, nana, kei te iriiri ano ia, a e haere ana te katoa ki a ia.
27
Ka whakahokia atu e Hoani, ka mea, E kore tetahi mea e riro mai i te tangata, ki te kore e homai ki a ia i runga i te rangi.
28
Ko koutou hei kai whakaae ki a au ki taku meatanga, Ehara ahau i a te Karaiti, engari i tonoa mai ahau i mua i a ia.
29
Te tangata i te wahine marena hou, ko ia te tāne marena hou: na, te hoa o te tāne marena hou, e tu ana, e whakarongo ana ki a ia, ka hari pu ki te reo o te tāne marena hou: na reira ano i tino nui ai tenei hari oku.
30
Ko te tikanga tenei, ko ia kia nui haere, ko ahau kia iti haere.
31
Ko ia e haere mai ana i runga kei runga ake ia i te katoa: ko to te whenua no te whenua ia, a no te whenua ana korero: ko ia e haere mai ana i te rangi, kei runga ake ia i te katoa.
32
A ko tana i kite ai, i rongo ai, ko ia tana e whakaatu ai: e kore hoki tetahi tangata e tango atu ki tana whakaaturanga.
33
Ki te manako tetahi ki tana whakaaturanga, kua piri tana tohu ki te pono o ta te Atua.
34
Ko ta te Atua i tono mai ai, e korero ana ia i nga kupu a te Atua: kahore hoki te Wairua e homai e te Atua ki a ia i runga i te mehua.
35
E aroha ana te Matua ki te Tama, a kua hoatu nga mea katoa ki tona ringa.
36
Ko ia e whakapono ana ki te Tama, he oranga tonutanga tana: a ko ia e kore whakapono ki te Tama, e kore e kite i te ora; engari ka mau tonu te riri a te Atua ki a ia.