- 1
- Ano ka mohio te Ariki kua rongo nga Parihi, ko nga akonga a Ihu i mea ai, i iriiri ai, he tokomaha atu i a Hoani.
- 2
- (He ahakoa ra ehara i a Ihu nana i iriiri, na ana akonga ia,)
- 3
- Ka mahue Huria i a ia, a hoki ana ano ki Kariri.
- 4
- Na, te ara mona i tika na Hamaria.
- 5
- A ka haere mai ia ki tetahi pa o Hamaria, ko Haika te ingoa, e patata ana ki te kāinga i hoatu e Hakopa ki tana tamaiti ki a Hohepa.
- 6
- A kei reira te puna a Hakopa. Na, kua ngenge a Ihu i te haerenga, heoi noho ana ia ki te taha o te puna: a meake ko te ono o nga haora.
- 7
- Na, ka haere mai tetahi wahine o Hamaria ki te utu wai: ka mea a Ihu ki a ia, Homai he wai moku.
- 8
- (Kua riro hoki ana akonga ki te pa, ki te hoko kai.)
- 9
- Na, ko te meatanga mai a te wahine o Hamaria ki a ia, He aha koe ka tono mai ai ki te wai i a au, ina he Hurai koe, he wahine ahau no Hamaria? kahore hoki e tatatata nga Hurai ki nga Hamari.
- 10
- Ka whakahokia mai e Ihu, ka mea ki a ia, Me i mātau koe ki ta te Atua e homai ai, ki tenei hoki e korero atu nei ki a koe, Homai he wai moku; penei kua tono mai koe ki a ia, a kua hoatu e ia te wai ora ki a koe.
- 11
- Ka mea te wahine ki a ia, E kara, kahore au pēre, a e hohonu ana te puna: no hea tena wai ora āu?
- 12
- He nui oti koe i to matou matua i a Hakopa, i homai ai te puna ki a matou, a inu ana ia i konei ratou ko ana tamariki, me ana kararehe?
- 13
- Ka whakahokia mai e Ihu, ka mea ki a ia, E mate ano i te wai nga tāngata katoa e inu ana i tenei wai:
- 14
- Tena ko te tangata e inu ana i te wai e hoatu e ahau ki a ia, e kore e mate i te wai a ake ake ake; engari te wai e hoatu e ahau ki a ia, hei puna wai i roto i a ia e pupu ake ana a te oranga tonutanga ra ano.
- 15
- Ka mea te wahine ki a ia, E kara, homai ki a au tenei wai, kei mate ahau i te wai, kei haere mai hoki ki konei utu ai.
- 16
- Ka mea a Ihu ki a ia, Tikina karangatia to tahu, ka hoki mai ai.
- 17
- Ka whakahokia mai e te wahine, ka mea, Kahore oku tahu. Ka mea a Ihu ki a ia, He korero tika tau, Kahore oku tahu:
- 18
- Ina hoki kua tokorima ou tahu; a ko ia i a koe nei ehara i te tahu nou: he pono tenei korero āu.
- 19
- Ka mea te wahine ki a ia, E kara, e kite ana ahau he poropiti koe.
- 20
- I karakia o matou mātua i runga i tenei maunga; a e mea ana koutou, ko Hiruharama te wahi e tika ai te karakia.
- 21
- Ka mea a Ihu ki a ia, E tai, whakapono mai ki a au, meake puta mai te wa, e kore ai koutou e karakia ki te Matua i runga i tenei maunga, e kore ano hoki i Hiruharama.
- 22
- E kore koutou e mohio ki ta koutou e karakia nei: e mātau ana matou ki ta matou e karakia nei: no nga Hurai nei hoki te ora.
- 23
- Otira meake puta mai te wa, a tenei ano, e karakia ai nga kai karakia pono ki te Matua i runga i te wairua i te pono: e rapu ana hoki te Matua ki te pera hei karakia ki a ia.
- 24
- He Wairua te Atua: a me karakia nga kai karakia ki a ia i runga i te wairua i te pono.
- 25
- Ka mea te wahine ki a ia, E mātau ana ahau kei te haere mai a te Mihaia, (e karangatia nei ko te Karaiti;) ka tae mai ia, mana nga mea katoa e korero mai ki a tatau.
- 26
- Ka mea a Ihu ki a ia, Ko ahau ano ia e korero atu nei ki a koe.
- 27
- Na, ka puta mai i reira ana akonga, a ka miharo ki tana korerotanga ki te wahine: heoi kihai tetahi i mea, He aha tau e rapu? He aha koe ka korero ai ki a ia?
- 28
- Na, ka whakarerea e te wahine tana ipu, a haere ana ki te pa, ka mea ki nga tangata.
- 29
- Haere mai, kia kite i te tangata i korerotia mai ai ki a au nga mea katoa i mea ai ahau: ehara oti tenei i a te Karaiti?
- 30
- Me i reira ka puta ratou ki waho o te pa, a haere ana ki a ia.
- 31
- A i taua takiwa ano ka tohe nga akonga ki a ia, ka mea, E te Kai whakaako, e kai ra.
- 32
- Ka mea ia ki a ratou, He kai ano taku hei kai maku, e kore e kitea e koutou.
- 33
- Na, ka mea nga akonga tetahi ki tetahi, I kawea mai ranei e tetahi he kai māna?
- 34
- Ka mea a Ihu ki a ratou, Ko taku kai tenei, kia meatia e ahau ta toku kai tono e pai ai, kia whakaotia hoki tana mahi.
- 35
- E kore ianei koutou e mea, Kia wha atu nga marama, a ka taea te kotinga? Nana, ko taku kupu tenei ki a koutou, Kia ara ake o koutou kanohi, tirohia nga māra; kua ma noa ake: ko te kotinga tenei.
- 36
- A ka whiwhi te kai kokoti ki te utu, ka kohia ano hoki e ia nga hua mo te oranga tonutanga: kia hari tahi ai te kai rui raua ko te kai kokoti.
- 37
- No konei hoki i pono ai taua ki, E rui ana tetahi, e kokoti ana tetahi.
- 38
- I tonoa koutou e ahau ki te kokoti i te mea kihai i mahia e koutou: he tangata ke na ratou i mahi, a kua uru koutou ki a ratou mahi.
- 39
- A he tokomaha nga Hamari o taua pa i whakapono ki a ia, mo te ki a te wahine i mea ra, I korerotia mai e ia ki a au nga mea katoa i mea ai ahau.
- 40
- Ano ka tae mai nga Hamari ki a ia, ka mea ratou kia noho ia ki a ratou: a e rua nga ra i noho ai ia ki reira.
- 41
- Na, hira noa ake nga tāngata i whakapono, he mea hoki na tana ake kupu;
- 42
- I mea ano hoki ki te wahine, Ehara i te mea na to kupu i whakapono ai matou i naianei: kua rongo nei hoki matou ake, a ka mātau, ko te Karaiti pu tenei, ko te Kai whakaora o te ao.
- 43
- Ka pahure nga ra e rua, ka turia atu e ia i reira, a haere ana ki Kariri.
- 44
- I mea hoki a Ihu, Kahore he honore o te poropiti i tona kāinga ake.
- 45
- A, tona taenga mai ki Kariri, ka whakmanuhiritia ia e nga tāngata o Kariri, i kite hoki ratou i nga mea katoa i meatia e ia ki Hiruharama, i te hākari: i haere hoki ratou ki te hākari.
- 46
- A ka tae mai ano a Ihu ki Kana o Kariri, ki te wahi i meatia ai e ia te wai hei waina. Na, ko tetahi tangata a te kingi, kei Kaperenauma tana tamaiti e mate ana.
- 47
- Ano ka rongo ia kua tae mai a Ihu i Huria ki Kariri, ka haere atu ki a ia, ka inoi ki a ia kia haere ia ki te whakaora i tana tamaiti: meake hoki marere.
- 48
- Na, ko te meatanga mai a Ihu ki a ia, Ki te kahore koutou e kite i nga tohu, i nga merekara, e kore koutou e whakapono.
- 49
- Ka mea te tangata a te kingi ki a ia, E te Ariki, haere ake i te mea kahore ano kia mate noa taku tamaiti.
- 50
- Ka mea a Ihu ki a ia, Haere; kua ora to tamaiti. Na, whakapono ana te tangata ki te kupu i korerotia e Ihu ki a ia, a haere ana.
- 51
- A, i a ia ano e haere ana, ka tutaki ana pononga ki a ia, ka korero, ka mea, Kua ora to tamaiti.
- 52
- Na, ka ui ia ki a ratou ki te haora i matūtū ake ai ia. Ka mea ratou ki a ia, No nanahi, no te whitu o nga haora, i mutu ai tona kā.
- 53
- Na, ka mohio te pāpā ko te tino haora ia i mea ai a Ihu ki a ia, Kua ora to tamaiti: a whakapono ana ia ratou ko tona whare katoa.
- 54
- Ko te rua ano hoki tenei o nga merekara i meatia e Ihu, i muri i tana haerenga mai i Huria ki Kariri.
Address: 
Phone: 
Email: