John Chapter 5 - Paipera Tapu 1868 | Te Paipera Tapu 1868

John Chapter 5 - Paipera Tapu 1868

1
Muri iho i enei mea he hākari ta nga Hurai; a haere ana a Ihu ki Hiruharama.
2
Na, kei Hiruharama tetahi wai kaukauranga kei te tatau hipi, tona ingoa Hiperu ko Petehera; e rima ona whakamahau.
3
Na, kei roto i enei e takoto ana tona tini o nga turoro, o nga matapo, o nga kopa, o nga memenge, e tatari ana ki te pokarekarenga o te wai.
4
I heke iho hoki tetahi anahera i te wā i rite ai ki te kaukauranga, whakapokarekare ai i te wai: a ko ia kua tae wawe i muri iho o te pokarekarenga o te wai, i ora i tona mate, ahakoa he aha he aha.
5
Na, kei reira tetahi tāngata, e toru tekau ma waru nga tau i mate ai.
6
A, te kitenga o Ihu i a ia e takoto ana, a ka mātau ano ka roa ke nei te wa ona e mate ana, ka mea ki a ia, E pai ana ranei koe kia whakaorangia?
7
Ka whakahokia mai e taua turoro ki a ia, E te Ariki, kahore aku tāngata hei tuku i a au ki te kaukauranga, ina whakapokarekarea te wai: heoi i ahau e haere atu ana, ka heke atu tetahi i mua i a au.
8
Ka mea atu a Ihu ki a ia, Whakatika, tangohia ake to moenga, haere.
9
A ora tonu ake taua tangata, heoi tangohia ake ana e ia tona moenga, haere ana: a ko te hapati taua ra.
10
Na, ka mea nga Hurai ki taua tangata i whakaorangia, Ko te hapati tenei: e kore e tika kia mauria e koe to moenga.
11
Ka whakahokia mai e ia ki a ratou, Te tangata i whakaorangia ai ahau, nāna i mea mai ki a au, Tangohia ake to moenga, haere.
12
Na, ka ui ratou ki a ia, Ko wai tena tangata i mea mai na ki a koe, Tangohia ake to moenga, haere?
13
Otiia kihai taua tangata i whakaorangia i mohio ko wai ia: i pahuhu atu hoki a Ihu, he tokomaha hoki nga tāngata i taua wahi.
14
Muri iho i enei mea ka kite a Ihu i a ia i roto i te temepara, a ka mea ki a ia, Na, ka oti nei koe te whakaora: kāti te hara, kei kino rawa iho te mea e pa mai ki a koe.
15
Haere ana taua tangata, korero ara ki nga Hurai, Na Ihu ia i whakaora.
16
Koia nga Hurai i whai ai i a Ihu, i mea ai kia whakamatea ia, mona i mea i enei mea i te hapati.
17
Na, ka whakahokia e Ihu ki a ratou, E mahi ana toku Matua a taea noatia tenei ra; e mahi ana ano ahau.
18
Koia nga Hurai i tino whai rawa ai kia patua ia, ehara hoki i te mea ko tana takahanga anake i te hapati, engari mona i mea ko te Atua tona Matua ake, i mea e rite ana ia ki te Atua te nui.
19
Na, ka whakahokia mai e Ihu, a ka mea ki a ratou, He pono, he pono taku e mea atu nei ki a koutou, E kore e taea e te Tama te mea tetahi mea, e ia anake, engari nga mea e kite ai ia e meatia ana e te Matua: ko tana hoki e mea ai, e meatia ana ano hoki e te Tama.
20
E aroha ana hoki te Matua ki te Tama, a e whakakitea ana ki a ia nga mea katoa e mea ai ia: a nui atu i anei nga mahi e whakakitea mai e ia ki a ia, kia miharo ai koutou.
21
Ko ta te Matua hoki, he whakaara he whakaora i nga tupapaku; ka pera ano te Tama, ka whakaora i ana e pai ai.
22
E kore hoki te Matua e whakawa i tetahi, engari kua tukua e ia nga whakawakanga katoa ki te Tama:
23
Kia rite ai te whakahonore a nga tāngata katoa i te Tama ki ta ratou whakahonoretanga i te Matua. Ki te kahore tetahi e whakahonore i te Tama, e whakakahore ana ia i te honore mo te Matua nana nei ia i tono mai.
24
He pono, he pono taku e mea atu nei ki a koutou, Te tangata e rongo ana ki taku korero, a e whakapono ana ki toku kai tono mai, he oranga tonutanga tona; e kore ano hoki ia e riro ki roto ki te whakamatenga, engari kua whiti atu i te mate ki te ora.
25
He pono, he pono taku e mea atu nei ki a koutou, Meake puta mai te wa, a tenei ano i naianei, e rongo ai nga tupapaku i te reo o ta te Atua Tama: a, te hunga e rongo ana ka ora.
26
Ta te mea he oranga to te Matua kei roto i a ia; whaihoki kua hoatu e ia ki te Tama, kia whai oranga i roto i a ia;
27
A kua hoatu ano hoki ki a ia he tikanga mo te whakawa, no te mea ko ia te Tama a te tangata.
28
Kaua e miharo ki tenei: no te mea meake puta mai te wa, e rongo ai i tona reo nga tāngata katoa i roto i nga urupa,
29
A ka puta mai; ko nga kai mahi o te pai ki te aranga o te oranga; a ko nga kai mahi o te kino, ki te aranga o te whakawakanga.
30
E kore e ahei i a au te mea tetahi mea e ahau anake: rite tonu taku whakawa ki taku e rongo ai: a e tika ana taku whakawa; e kore hoki ahau e rapu i taku i pai ai, engari i ta te Matua i pai ai, nāna nei au i tono mai.
31
Me he mea ko ahau hei whakaatu i aku aha i aku aha, ehara taku i te whakaatu pono.
32
Tera atu ano tetahi kai whakaatu moku; a e mohio ana ahau he whakaaturanga pono tāna e whakaatu nei moku.
33
I tono tangata koutou ki a Hoani, a i whakaaturia e ia te pono.
34
Kahore ahau e manako ki ta te tangata whakaaturanga: engari e korerotia ana e au enei mea kia ora ai koutou.
35
He rama kā tera, he rama mārama tonu: a he wa ano i pai ai koutou kia hari ki tona māramatanga.
36
Otiia he kai whakaatu ano toku nui atu i a Hoani: ko nga mahi hoki i homai e te Matua kia whakaotia e ahau, ko aua mahi e mahia nei e ahau, hei whakaatu moku, i tonoa mai nei ahau e te Matua.
37
Na, te Matua nana nei ahau i tono mai, kua oti ahau te whakaatu e ia. Kahore ano koutou i rongo noa ki tona reo, kahore ano hoki i kite i tona ahua.
38
Kahore ano hoki i mau tana kupu i roto i a koutou; ina kahore ano koutou i whakapono ki tenei i tonoa mai e ia.
39
Whakatakina nga tikanga o nga Karaipiture; e mea ana hoki koutou kei reira te oranga tonutanga mo koutou: a ko enei hei kai whakaatu moku.
40
Heoi e kore koutou e pai kia haere mai ki a au, kia whiwhi ai koutou ki te ora.
41
Na, he kororia tangata, kahore au e manako atu.
42
Na, kua mātau ahau ki a koutou, kahore te aroha o te Atua i roto i a koutou.
43
Kua tae mai nei ahau i runga i te ingoa o toku Matua, a kahore nei koutou e manako mai ki a au; ki te haere mai tetahi i runga i tona ake ingoa, ka manako koutou ki a ia.
44
Me pehea koutou ka whakapono ai, i a koutou ka whakapai atu nei ki te honore a koutou ki a koutou ano, a e kore e rapu i te honore e puta mai ana i te Atua anake?
45
Kei mea koutou e korerotia to koutou hē e ahau ki te Matua: tera te kai korero mo to koutou hē, ko Mohi ko ta koutou e tumanako atu nei.
46
Me i whakapono hoki koutou ki a Mohi, kua whakapono ano koutou ki a au: tana hoki i tuhituhi ai he mea moku.
47
Tena ko tenei e kore koutou e whakapono ki ana i tuhituhi ai, ma te aha ka whakapono ai koutou ki aku korero?