John Chapter 8 - Paipera Tapu 1868 | Te Paipera Tapu 1868

John Chapter 8 - Paipera Tapu 1868

1
Na, ka haere a Ihu ki maunga Oriwa.
2
A i te atatu ka hoki atu ano ia ki te temepara, a tae katoa mai ana te iwi ki a ia; na, ka noho ia, ka whakaako i a ratou.
3
Katahi ka arahina mai ki a ia e nga Karaipi ratou ko nga Parihi tetahi wahine i hopukia e puremu ana; a whakaturia ana e ratou ki waenganui.
4
Ka mea ratou ki a ia, E te Kai whakaako, i hopukia putia te wahine nei e puremu ana.
5
A i whakahau mai a Mohi ki a matou i roto i te ture, kia akina nga penei ki te kohatu: tena koa tau ki?
6
I penei mai ratou hei whakamatautau mona, kia whai take ai ratou e whakapangia ai he hē ki a ia. Ka piko a Ihu, a tuhituhi ana ki tona ringaringa ki te whenua.
7
A ka tohe tonu ratou ki te ui ki a ia, ka whakatika ake ia, ka mea ki a ratou, Te tangata o koutou kahore ana hara, māna te kohatu matamua e aki atu ki a ia.
8
Na, ka piko ano ia, ka tuhituhi ki te whenua.
9
A, to ratou rongonga ai, ka ngau o ratou hē i roto i o ratou ngakau, ka haere takitahi atu ki waho, na nga kaumatua i timata, a poto noa o muri rawa: a ko Ihu anake i mahue, me te wahine hoki e tu ana i waenganui.
10
A te marangatanga ake o Ihu, kahore ana tangata i kite ai, ko te wahine anake, na, ka mea ia ki a ia, E tai, kei hea aua kai whakapa hē ou? kahore ano ranei tetahi kia whakatau noa i te hē ki a koe?
11
Ano ra ko tera, Kahore, e te Ariki. Ka mea a Ihu ki a ia, Kahore ano hoki ahau e whakatau i te hē ki a koe: haere, kāti te hara.
12
I ki atu ano a Ihu ki a ratou, i mea, Ko ahau te whakamarama o te ao: ki te aru tetahi i a au, e kore ia e haere i te pouri, engari ka whiwhi ki te māramatanga o te ora.
13
Na, ka mea nga Parihi ki a ia, Ko koe ano tou kai whakaatu; ehara tau i te whakaaturanga pono.
14
Ka whakahokia mai e Ihu, a ka mea ki a ratou, Ahakoa ko ahau ano toku kai whakaatu, e pono ana taku whakaaturanga: no te mea e mātau ana ahau ki te wahi i haere mai ai ahau, ki te wahi hoki e haere atu nei ahau; ko koutou ia e kore e mātau ki te wahi i haere mai ai ahau, ki te wahi ano hoki e haere atu nei ahau.
15
Na te kikokiko ta koutou tikanga whakawa; e kore ahau e whakawa i tetahi.
16
A ki te whakawa ahau, e tika ana taku whakawa; ehara hoki i te mea ko ahau anake, engari ko maua ko te Matua nāna nei ahau i tono mai.
17
Kua oti ano hoki te tuhituhi i roto i ta koutou ture, E pono ana te whakaaturanga a nga tāngata tokorua.
18
Ko ahau hei kai whakaatu moku, a hei kai whakaatu ano moku te Matua nāna nei ahau i tono mai.
19
Na, ka mea ratou ki a ia, Kei hea tou Matua? Ka whakahokia mai e Ihu, Kahore koutou e mātau ki a au, kahore ano hoki ki toku Matua: me i mātau koutou ki a au, kua mātau ano hoki ki toku Matua.
20
I korerotia enei kupu e Ihu i te whare takotoranga taonga, i a ia e whakaako ana i roto i te temepara: a kahore tetahi i hopu i a ia; kiano hoki tona haora i taka noa.
21
Me i reira ka ki atu ano a Ihu ki a ratou, E haere atu ana ahau, a tera koutou e rapu i a au, e mate ano hoki i roto i to koutou hara: e kore koutou e ahei te haere ake ki te wahi e haere ai ahau.
22
Na, ka mea nga Hurai, E whakamate oti ia i a ia ano? ina ia ka mea mai, E kore koutou e ahei te haere ake ki te wahi e haere ai ahau.
23
Ano ra ko ia ki a ratou, no raro nei koutou; no runga ahau: no tenei ao ano koutou; ehara ahau i tenei ao.
24
Koia ahau i mea ai ki a koutou, E mate koutou i roto i o koutou hara: ki te kore hoki koutou e whakapono ko ahau ia, e mate koutou i roto i o koutou hara.
25
Katahi ratou ka mea ki a ia, Ko wai koe? Na, ka mea a Ihu ki a ratou, Ko taku ano i korero ai ki a koutou i te timatanga.
26
He maha aku mea mo koutou e korero ai, e whakawa ai: otira e pono ana toku kai tono mai; a e korerotia ana e ahau ki te ao nga mea i rongo ai ahau ki a ia.
27
Kihai ratou i mātau ko te Matua tana i korero ai ki a ratou.
28
Katahi a Ihu ka mea ki a ratou, Kia oti te Tama a te tangata te whakairi e koutou, ko reira koutou mātau ai ko ahau ia, a e kore e meatia tetahi mea e ahau ake; engari ko a toku Matua i whakaako mai ai ki a au, ko enei aku e korero nei.
29
Kei a au nei ano hoki toku kai tono mai: kihai ahau i waiho e te Matua ko ahau anake; no te mea e mahi tonu ana ahau i nga mea e paingia ana e ia.
30
I a ia ano e korero ana i enei mea, he tokomaha i whakapono ki a ia.
31
Me i reira ka mea a Ihu ki nga Hurai i whakapono ki a ia, Ki te mau tonu koutou ki taku kupu, he tino akonga koutou naku;
32
A e mātau koutou ki te pono, ma te pono ano hoki koutou ka rangatira ai.
33
Ka whakahokia mai e ratou ki a ia, He whanau matou no Aperahama, kahore ano matou i waiho noa hei pononga ma tetahi tangata: he aha tau e mea, Ka whakarangatiratia koutou?
34
Ka whakahokia mai e Ihu ki a ratou, He pono, he pono taku e mea atu nei ki a koutou, He pononga na te kino nga kai mahi katoa o te kino.
35
E kore te pononga e noho tonu i te whare: ko te Tamaiti ia e noho tonu ana.
36
Na, i te mea ka whakarangatiratia koutou e te Tamaiti, he tino rangatira koutou.
37
E mātau ana ano ahau, he whanau koutou no Aperahama; heoi e whai ana koutou kia whakamatea ahau, he kore hoki no taku kupu e mau i roto i a koutou.
38
E korerotia ana e ahau taku i kite ai ki toku Matua: a e mahi ana koutou i ta koutou i kite ai ki to koutou matua.
39
Ka whakahokia mai e ratou, ka mea ki a ia, Ko Aperahama to matou matua. Ka mea a Ihu ki a ratou, Me he tamariki koutou na Aperahama, kua mahia e koutou nga mahi a Aperahama.
40
Tena ko tenei e whai ana koutou kia whakamatea ahau, te tangata nāna i korero te pono ki a koutou, taku hoki i rongo ai ki te Atua: kihai a Aperahama i penei.
41
E mahi ana koutou i nga mahi a to koutou matua. Katahi ratou ka mea mai ki a ia, Kihai matou i whanau poriro mai; kotahi to matou Matua, ko te Atua.
42
Ka mea ano a Ihu ki a ratou, Me he mea ko te Atua to koutou Matua, kua aroha koutou ki a au: i haere mai hoki ahau i te Atua, a kua tae mai nei; kihai hoki ahau i haere noa mai, engari nāna ahau i tono mai.
43
He aha ra koutou te mātau ai ki taku korero? no te mea e kore koutou e ahei te whakarongo ki taku kupu.
44
Na to koutou matua koutou, na te rewera, a e pai ana kia mea i ta to koutou matua i hiahia ai. He kai kohuru ia no te timatanga, a kihai i mau ki te pono, no te mea kahore he pono i roto i a ia. I te mea ka korero teka ia, e korerotia ana e ia ana: he korero teka hoki tana, ko te matua hoki ia o tena mea.
45
I taku korerotanga atu nei ano hoki i te pono, kahore koutou e whakapono mai ki a au.
46
Ko wai o koutou hei whakaatu he hara toku? Ki te pono taku korero, he aha koutou tē whakapono mai ai ki a au?
47
E whakarongo ana te tangata a te Atua ki nga korero a te Atua: koia koutou tē whakarongo ai, no te mea ehara koutou i te Atua.
48
Na, ka whakahokia atu e nga Hurai, ka mea ki a ia, Kahore koia i tika ta matou i mea ra, No Hamaria koe, a he rewera tou?
49
Ka whakahokia mai e Ihu, Kahore oku rewera; engari e whakahonore ana ahau i toku Matua, ko koutou ia te whakakahore ana i te honore moku.
50
Kahore aku whai atu i te kororia moku: tera ano te kai whai, te kai whakatikatika.
51
He pono, he pono taku e mea atu nei ki a koutou, ki te pupuri tetahi i taku kupu, e kore ia e kite i te mate, ake ake ake.
52
Ka mea ano nga Hurai ki a ia, Katahi matou ka mohio he rewera tou. Kua mate a Aperahama ratou ko nga poropiti; a e mea ana koe, Ki te pupuri tetahi i taku kupu, e kore ia e pangia e mate, ake ake ake.
53
He nui oti koe i to matou matua i a Aperahama kua mate nei? kua mate ano hoki nga poropiti: ki tau ko wai koe?
54
Ka whakahokia mai e Ihu, Ki te whakahonore ahau i a au ano, he honore noa toku: ko toku Matua hei whakahonore i a au; ko ta koutou e mea nei, Ko ia to koutou Atua:
55
Heoi kahore koutou i mātau ki a ia; ko ahau ia e mātau ana ki a ia: a ki te mea ahau, E kore ahau e mātau ki a ia, he tangata teka ahau, he pena ano me koutou: otira e mātau ana ahau ki a ia, a e pupuri ana i tana kupu.
56
I hari to koutou matua a Aperahama, mona ka kite i toku ra: i kite ia, a koa ake.
57
Katahi ka mea nga Hurai ki a ia, Kahore ano i rima tekau noa o tau, a kua kite koe i a Aperahama?
58
Ka mea a Ihu ki a ratou, He pono, he pono taku e mea atu nei ki a koutou, Kahore ano a Aperahama kia whanau noa, ko au tenei.
59
Na, ka mau ratou ki etahi kohatu hei epa atu ki a ia: heoi huna ana a Ihu i a ia, puta mai ana i roto i te temepara na waenganui o ratou, a tika tonu atu.