- 1
- Kua hoha toku wairua ki toku ora, ka whakarerea mai e ahau taku tangi maku; ka korero ahau i toku ngakau e pouri nei.
- 2
- Ka mea atu ahau ki te Atua, Kaua ahau e whakahengia; whakakitea mai ki a au, Na te aha koe i totohe ai ki a au.
- 3
- He mea pai ranei kia tukino koe, kia whakahawea ki te mahi a ou ringa, a kia whiti ki runga ki te whakaaro o te hunga kino?
- 4
- He kanohi kikokiko ranei ou? he penei ranei to titiro me ta te tangata titiro?
- 5
- E rite ana ranei ou ra ki o te tangata rā? e rite ana ranei ou tau ki o te tangata rā,
- 6
- I uiuia ai e koe toku kino, i rapua ai e koe toku hara?
- 7
- E mohio ana ano koe ehara ahau i te mea he, a kahore ano tetahi hei whakaora i roto i tou ringa.
- 8
- Na ou ringa ahau i mahi, i hanga, he mea hono marie i tetahi taha, i tetahi taha, a e horomitia nei ahau e koe.
- 9
- Kia mahara nau ahau i hanga, he mea whakarite ki te paru, a ka whakahokia nei ahau e koe ki te puehu.
- 10
- He teka ianei he mea riringi ahau nau ano he waiu, whakamarokia ana ahau e koe ano he waiu maro?
- 11
- Whakakakahuria ana ahau e koe ki te kiri, ki te kikokiko, taiepatia ana ahau e koe ki te wheua, ki te uaua.
- 12
- Whakawhiwhia ana ahau e koe ki te ora, ki te atawhai, a he tirotirohanga mai nau i mau ai toku wairua.
- 13
- Heoi hunā ana ano enei mea e koe i roto i tou ngakau: e mohio ana ano ahau kei a koe ano tenei.
- 14
- Ki te hara ahau, ka maharatia mai ahau e koe; e kore ano hoki koe e whakakahore ki taku he.
- 15
- Ki te he ahau, aue toku mate! te tika, e kore e ara toku mahunga; kī tonu ahau i te pororaru; tena ra, titiro mai ki toku matenga;
- 16
- Kua neke ake nei; e whaia ana ahau e koe ano he raiona, a he mea ano, miharotia ana to hanga ki a au.
- 17
- E whakahoutia ana e koe o kai whakaatu i oku he, e whakanuia ana hoki e koe te riri ki a au; ko nga putanga ketanga, ko te whawhai hei pehi i ahau.
- 18
- He aha ra ahau i whakaputaina mai ai e koe i roto i te kopu? Aue! me i hemo ahau, a kihai tetahi kanohi i kite i a au!
- 19
- Penei kei te kahore noa iho he rite moku, kua mauria atu ahau i te kopu ki te urupa.
- 20
- He teka ranei he torutoru oku ra? Kati ra, waiho noa iho ahau, kia mārama iti ake ai ahau.
- 21
- Keiwha haere ahau ki te wahi e kore nei ahau e hoki mai, ki te whenua o te pouri, o te atarangi o te mate;
- 22
- Ki te whenua pouri, koia rawa ano te pouri! me te atarangi o te mate, kahore nei o reira tikanga; tona māramatanga, koia ano te pouri!
Address: 
Phone: 
Email: