- 1
- Na, he rangi ano ka haere mai nga tama a te Atua, ka tu ki te aroaro o Ihowa. A ka haere mai ano a Hatana i roto i a ratou ki te aroaro o Ihowa tu ai.
- 2
- Na, ko te meatanga mai a Ihowa ki a Hatana, I haere mai koe i hea? Ano ra ko Hatana ki a Ihowa, i mea ia, I te kopikopiko, i te haereere i te whenua.
- 3
- Katahi a Ihowa ka mea mai ki a Hatana, Tina mahara iho ranei tou ngakau ki taku tangata ki a Hopa; kahore he rite mona i te whenua, he tangata ngakau tapatahi, he tika, e wehi ana i te Atua, e mawehe atu ana i te kino? u tonu ano hoki tona tapatahitanga. Heoi e whakaoho ana koe i a au ki te he mona, kia whakangaromia pakupakutia ia.
- 4
- Na, ka whakahokia mai e Hatana ki a Ihowa; i mea ia, He kiri mo te kiri; ko nga mea katoa hoki a te tangata ka hoatu hei utu mona kia ora.
- 5
- Engari kia totoro atu tou ringa, kia pa atu ki tona wheua, ki ona kikokiko, ina, ka kanga ia i a koe ki tou aroaro.
- 6
- Na, ko te meatanga mai a Ihowa ki a Hatana, Nana, kei tou ringa ia: otiia kia tupato kei mate rawa ia.
- 7
- Te tino haerenga mai o Hatana i te aroaro o Ihowa; patua iho e ia a Hopa ki nga whewhe kino i te kapu ano o tona waewae, a tae noa ki tona tumuaki.
- 8
- Na, ka mau ia ki tetahi maramara rīhi hei waru i a ia, a noho ana i roto i te pungarehu.
- 9
- Katahi tana wahine ka mea ki a ia. Kia pehea ake te roa o te u o tou tapatahitanga? kangā te Atua, kia mate koe.
- 10
- Ano ra ko ia ki a ia, Rite tonu to kupu ki te kupu a tetahi o nga wahine kuare, Ha! kia whiwhi tatou ki te pai i te Atua, a kia kaua tatou e whiwhi ki te kino? I tenei katoa kihai i hara nga ngutu o Hopa.
- 11
- Na, ka rongo etahi hoa o Hopa, tokotoru, ki tenei he katoa i pa mai nei ki a ia, haere mai ana ratou i tona wahi, i tona wahi, a Eripata Temani, a Pirirara Huhi, a Topara Naamati, he mea whakarite hoki na ratou ki a ratou ano kia haere mai ki te tangi ki a ia, te whakamarie i a ia.
- 12
- Na, te marangatanga o o ratou kanohi i tawhiti, kihai ratou i mohio ki a ia. Heoi kua ara to ratou reo, tangi ana ratou: haea ana e ratou tona koroka, tona koroka, meatia iho e ratou he puehu ki runga ki o ratou mahunga, he mea akiri atu whaka-te-rangi.
- 13
- Na, noho ana ratou i tona taha ki te whenua, e whitu nga ra, e whitu nga po, kihai hoki i puaki te kupu a tetahi ki a ia: i kite hoki ratou he nui rawa tona pouri.
Address: 
Phone: 
Email: