Job Chapter 21 - Paipera Tapu 1868 | Te Paipera Tapu 1868

Job Chapter 21 - Paipera Tapu 1868

1
Ano ra ko Hopa; i mea ia,
2
Ata whakarongo mai ki taku kupu, a hei tenei he kupu whakamarie ma koutou.
3
Tukua ahau kia korero; a ka mutu aku korero, tawai tonu koutou.
4
Ahau nei, ki te tangata koia taku tangi? a me he mea ki te tangata, he aha taku wairua tē pouri ai?
5
Titiro mai ki a au, miharo ai; kopania atu te ringa ki te mangai.
6
Mahara kau au, ka wehi ahau, mau pu te wehi o oku kikokiko.
7
Na te aha te hunga kino i ora ai, i koroheke ai? marohirohi ana to ratou kaha.
8
Pumau tonu o ratou uri ki to ratou aroaro, ki to ratou taha ano, o ratou whanau ano kei to ratou tirohanga atu.
9
O ratou whare kei runga i te rangimarie, kahore he wehi, kahore hoki ā te Atua patu ki a ratou.
10
E kaha ana tana puru ki te ekeeke, kahore hoki e he; ka whanau tana kau, kahore hoki he whakatahe.
11
E tukua mai ana e ratou a ratou kohungahunga ano he kahui hipi, e pekepeke ana a ratou tamariki.
12
He hunga hapai ratou i te timipera, i te hāpa, e koa ana ki te tangi o te okana.
13
O ratou ra pau tonu i runga i te ahuareka, kitea rawatia ake kua heke ki te rua.
14
Koia ratou ka mea ai ki te Atua, Mawehe atu i a matou; kahore hoki o matou hiahia kia matau atu ki ou huarahi.
15
He aha a te Runga-rawa, e mahi ai matou ki a ia? he aha hoki te rawa ki a matou ki te inoi matou ki a ia?
16
Nana kahore he pai mo ratou i o ratou ringaringa ake: matara atu i a au te whakaaro a te hunga kino,
17
Ano te maha o nga matenga o te rama o te hunga kino, o nga pānga mai ano hoki o to ratou whakangaromanga ki a ratou! E tuwhaina mai e te Atua nga mamae i a ia e riri ana.
18
Ka rite ratou ki te kakau witi i mua i te hau, ki te papapa e kahakina atu ana e te paroro.
19
Ka rongoatia atu e te Atua tona kino hei mea mo ana tamariki; ka utua tana, a ka mohio ia.
20
E kite ano ona kanohi i tona hunanga, a ka inumia e ia te riri a te Kaha-rawa.
21
He aha hoki tana manakohanga atu ki tona whare i muri i a ia; ka poroa hoki ona marama i waenga.
22
E whakaako ianei tetahi i te Atua ki te matauranga? ko te kai whakarite hoki ia i te whakawa mo te hunga whakakake.
23
Tenei tangata, mate iho ia, pakari rawa ano hoki ona kaha, ata takoto ana ana mea katoa, kahore hoki he raruraru.
24
Ki tonu ona u i te waiu, a e makuku ana ona wheua i te hinu.
25
Mate iho hoki tera tangata, kawa tonu tona wairua, kahore hoki he pai hei kai mana.
26
Ka takoto ngatahi raua ki te puehu, a ko te iro hei hipoki mo raua.
27
Nana, e mohio ana ahau ki ā koutou whakaaro, ki ta koutou ngarahu nanakia ano hoki moku.
28
E ki ana hoki koutou, Kei hea te whare o te rangatira? kei hea hoki te tapenakara, nga nohoanga o te hunga kino?
29
Kahore ianei koutou i ui ki te hunga e haere atu ana i te ara? kahore ranei koutou i mohio ki ā ratou tohu?
30
Kei te rongoa nei hoki te tangata kino mo te ra o te whakangaromanga; ka whakaputaina mai ratou i te ra o te riri.
31
Ko wai e whakaatu i tona ara ki tona aroaro? ko wai hoki hei homai i te utu mo tana mahi ki a ia.
32
Heoi ka kawea ia ki te urupa; kei te puranga he wahi mona.
33
Ka reka ki a ia nga pokuru o te awaawa, ka whai mai ano hoki nga tangata katoa i a ia; e kore nei hoki e taea te tatau te hunga i mua i a ia.
34
He pehea ra ta koutou whakamarie tinihanga i a au, e toe na hoki te he i roto i ā koutou kupu e whakahoki mai na?