Job Chapter 34 - Paipera Tapu 1868 | Te Paipera Tapu 1868

Job Chapter 34 - Paipera Tapu 1868

1
I korero tonu mai a Erihu, i mea,
2
Whakarongo mai ki aku kupu, e te hunga whakaaro nui, kia whai taringa mai ki a au, e te hunga mohio.
3
E whakamatau ana hoki te taringa i nga kupu, e pera ana hoki me ta te mangai meatanga iho ki te reka o te kai.
4
Ta tatou e whiriwhiri ai ma tatou ko te whakarite whakawa; kia mohiotia ano hoki e tatou, e tenei e tenei, ko te aha te mea pai.
5
Kua mea nei hoki a Hopa, He tika taku, kua whakapeaua ketia hoki e te Atua te whakawa moku.
6
Kei a au nei te tika, a kia whakakahoretia e ahau? kahore he hē, heoi e kore toku werohanga e mahu.
7
Ko wai te tangata i rite ki a Hopa, me te mea he wai te tawai e inumia ana e ia?
8
Kua uru nei ki te tira o nga kai mahi o te he, a e haere tahi ana me nga tangata kino.
9
Kua mea nei, Kahore he painga ki te tangata ki te ahuareka atu ia ki te Atua.
10
Na, whakarongo mai ki a au, e nga tangata ngakau mohio. Aue, kia kino koia te Atua! kia he a te Kaha-rawa!
11
Ka utua hoki e ia te tangata mo tana mahi, ka rite hoki ki to te tangata ara nga mea e whakawhiwhia mai e ia ki a ia.
12
Tika rawa, e kore te Atua e kino, e kore ano hoki a te Kaha-rawa e whakaputa ke i te whakarite whakawa.
13
Na wai ia i mea hei kai tirotiro mo te whenua? na wai hoki i whakatakoto nga tikanga mo te ao katoa?
14
Ki te anga mai tona ngakau ki te tangata, ki te kohia atu e ia ki a ia tona wairua me tona manawa;
15
Ka hemo ngatahi nga kikokiko katoa, a ka hoki te tangata ki te puehu.
16
Na ki te mea he ngakau mohio tou, whakarongo mai ki tenei; kia whai taringa mai ki toku reo e korero atu nei.
17
Ki te mea e kino ana tetahi ki te whakahaere tikanga e whai kingitanga ranei ia? e whakakino ranei koe ki te mea tika rawa?
18
He mea pai ranei te ki atu ki te kingi, Ko Periara? ki nga rangatira, He kino?
19
A kia pera ano ranei ki a ia? e kore nei hoki ia e whakapai ki te kanohi o nga rangatira, te tangata rawa e kore e hohoro i te rawa-kore te mohiotia e ia, he mea mahi nei hoki ratou katoa na ona ringa.
20
Kihai i aha kua mate ratou, i waenganui po ka wiri te iwi, ka pahemo atu; kua riro te hunga nunui; kahore hoki he ringaringa.
21
Kei runga hoki i nga ara o te tangata ona kanohi, e kitea ana hoki e ia ona hikoinga katoa.
22
Kahore he pouri, kahore he atarangi o te mate e piri ai nga kai mahi i te kino.
23
E kore hoki e nui atu i te tika te mea e whakawaha e ia ki te tangata; e anga ai ia ki te whakawa i te Atua.
24
Ka wawahia e ia nga tangata nunui, tē taea te tatau, a whakaturia ake etahi atu i muri i a ratou.
25
E mohio ana hoki ia ki ā ratou mahi, na, hurihia ake ratou e ia i te po, a mongamonga noa ratou.
26
Hei hunga kino ratou, pakia iho ratou e ia i te tirohanga mai ano a te tangata.
27
Mo ratou i tahuri atu i te whai i a ia, kihai hoki i whakaaro ki tetahi o ana ara:
28
A meinga ana e ratou kia tae atu te tangi o te rawa-kore ki a ia; e whakarongo ana ano ia ki te tangi o nga tangata e tukinotia ana.
29
Ki te meinga e ia kia ata noho, ko wai hei whakararuraru? ka hunā tona mata, ko wai e kite i a ia? kotahi tonu te meatanga ki te iwi, ki te tangata.
30
Kore ake te ngutu kau e whai kingitanga, kore ake te iwi e mahangatia.
31
He mea tika ano hoki te ki atu ki te Atua, Kua pehia nei ahau e te whiu, e kore ahau e mahi i te he i muri nei.
32
Te mea kihai i kitea e ahau mau e whakaatu mai ki a au; ki te mea i mahi ahau i te he, ka mutu taku.
33
Kia rite koia ki tau e pai ai? whakakino noa koe, whakapai noa koe, mana te whakautu, kahore hoki aku. Na, mau e korero mai tau i mohio ai.
34
Kia korero mai nga tangata ngakau mahara ki a au; kia whakarongo mai te tangata whakaaro nui ki a au.
35
Kahore he matauranga o Hopa i a ia i korero ra, kahore hoki he mahara i roto i ana kupu.
36
He pai ki a au me i whakamatautauria a Hopa, a te mutunga ra ano, mo ana kupu i whakahokia mai nei e ia, he mea i rite ki a nga tangata kino.
37
E tapiritia iho ana hoki e ia te tutu ki runga ki tona hara, kei te papaki ia i ona ringa i waenganui i a tatou; whakanuia ana e ia ana kupu ki te Atua.