Job Chapter 4 - Paipera Tapu 1868 | Te Paipera Tapu 1868

Job Chapter 4 - Paipera Tapu 1868

1
Katahi a Eripata Temani ka oho mai, ka mea,
2
Ki te anga matou ki te korero ki a koe, e pouri ranei koe? otira e taea e wai te pehi te kupu?
3
Nana, he tokomaha i whakaakona e koe: nau hoki i whakakaha nga ringa kaha-kore.
4
Ara ana i o kupu te tangata e hinga ana; nau hoki i kaha ai nga turi kua piko.
5
Heoi te taenga mai nei ki a koe, pouri ana koe; te pānga ki a koe, ohorere ana koe.
6
He teka ianei kei to wehi he okiokinga whakaaro mou? kei te tapatahi ano hoki o ou huarahi he tumanakohanga mau?
7
Maharatia ra ko wai o nga tangata hara-kore i hunā? i whakangaromia ranei ki hea te hunga tika?
8
Ko taku ano tenei i kite ai. Nga kai parau o te he, nga kai rui i te he, ko taua mea ra ano ta ratou e kokoti ai.
9
Hunā ana ratou e to te Atua manawa, moti iho ratou i te hau o tona pongaponga.
10
Te hamamatanga o te raiona, te reo o te raiona tutu, nga niho o nga kuao raiona, whati ana.
11
Ngaro ana te raiona katua i te kore kai, marara noa atu nga kuao a te raiona.
12
I kawea pukutia mai ano he korero ki a au, ngoto ana tetahi wahi iti ki toku taringa.
13
I nga whakaaroaronga, he mea na nga kitenga o te po, i te mea ka au iho te moe o nga tangata,
14
Ka pa mai te wehi ki a au, me te ihiihi, a wiri ana oku wheua katoa.
15
Na, ka tika atu he wairua i toku aroaro, tutututu ana nga huruhuru o toku kikokiko.
16
Tu ana, heoi kihai ahau i mohio ki tona mate; he ahua te mea i toku aroaro. Tu puku ana; na, ka rongo ahau i te reo e ki ana,
17
He nui atu ranei te tika o te tangata i to te Atua? e nui atu ranei i to tona kai hanga te ma o te tangata?
18
Nana, kahore ia e whakawhirinaki ki ana pononga; a ki tana, he hē kei ana anahera.
19
Tera atu to te hunga, no te paru nei nga whare e noho nei ratou, kei te puehu nei to ratou turanga; mongamonga kau ratou i te aroaro o te purehurehu.
20
Kurukurua iho ratou i te takiwa o te ata, o te ahiahi; hunā rawatia ana ratou, kahore hoki e maharatia mai.
21
E kore ianei to ratou nui i nui ai ratou e riro? mate ana ratou, kahore hoki he matauranga.