- 1
- Tena ra, karanga, ka whakahoki kupu mai ranei tetahi ki a koe; ka anga atu ano koe ki a wai o te hunga tapu?
- 2
- E patua ana hoki te kuare e te aritarita, e whakamatea ana te whakaaro-kore e te hae.
- 3
- I kite ahau i te kuare e hou ana ona pakiaka; kitea rawatia ake kua kangā e ahau tona nohoanga.
- 4
- Kei tawhiti atu āna tama i te oranga, mongamonga noa ratou i te kuwaha, kahore hoki he kai whakaora.
- 5
- Ana hua, ka kainga e te tangata kai-kore, ka tangohia mai ano e ia i roto ano i nga tataramoa, ka pau ano hoki o ratou rawa i te kai pahua.
- 6
- Na, e kore te he e puta ake i te puehu, e kore ano te raruraru e tupu ake i te oneone;
- 7
- Hei mea ano ia mo te raruraru te tangata ina whanau; tona rite kei nga korakora e rere nei whakarunga.
- 8
- Ko au ia ka rapu i ta te Atua; me tuku atu taku korero ki te Atua,
- 9
- E mahi nei i nga mea nui e kore e taea te rapu atu, i nga mea whakamiharo e kore nei e taea te tatau;
- 10
- E homai nei i te ua ki te mata o te whenua, e unga nei i te wai ki te mata o nga parae;
- 11
- E whakanoho nei i te hunga iti ki te wahi tiketike, a whakanekehia ake ana te hunga pouri ki te ora;
- 12
- E whakataka nei i nga whakaaro a te hunga tinihanga, kore ake e mahia e o ratou ringaringa ta ratou i mea ia.
- 13
- Te hunga whakaaro, mau ana i a ia i runga ano i to ratou tinihanga; nga whakaaro a te hunga kotiti ke, porahurahu kau ana.
- 14
- I te awatea nei, tutaki ana ratou ki te pouri; whawha ana ratou i te poutumarotanga, ano ko te po.
- 15
- Otiia e whakaorangia ana e ia te rawa-kore i te hoari, i to ratou mangai, i te ringaringa ano o te tangata kaha.
- 16
- Ka ai ano he tumanakohanga atu ma te ware; kokopi tonu ia te mangai o te kino.
- 17
- Nana, ka hari te tangata e akona mai ana e te Atua. Na, kaua e whakahawea ki ta to Kaha-rawa papaki.
- 18
- He whakamamae hoki tana, he takai ano; e patu ana ia, a ko ona ringa ano hei whakaora.
- 19
- E ono nga matenga ka whakaorangia ano koe e ia; ahakoa e whitu, e kore te he e pa ki a koe.
- 20
- I te mate-kai ka hokona koe e ia kei mate; i te tatauranga ano, kei pangia e te hoari.
- 21
- Ka hunā koe kei whiua e te arero, e kore ano hoki koe e wehi i te whakangaromanga ina tae mai.
- 22
- E kata ano koe ki te whakangaromanga raua ko te hemo kai; e kore ano hoki koe e wehi i nga kirehe o te whenua.
- 23
- No te mea ka takoto to kawenata ki nga kohatu o te parae; ka mau ano hoki ta koutou rongo ko nga kirehe o te parae.
- 24
- Ka mohio ano koe kei runga i te whenua-rangatira to tapenakara, ka haereere ano koe ki to nohoanga, tē ai he hara.
- 25
- Ka mohio ano koe he nui ou uri, he pera ano tou whanau me te tarutaru o te whenua.
- 26
- Ka ata rite ou tau ina tae koe ki te urupa, ka pera ano me te purenga witi e kake ake ana i tona wa e rite ai.
- 27
- Nana, tenei, he mea rapu na matou, ko te mea tika hoki ia, whakarangona mai, ka mohio iho hei pai mou.
Address: 
Phone: 
Email: