- 1
- Katahi ka whakahokia mai e Hopa; i mea ia,
- 2
- Aue, me i ata paunatia toku mamae, me i huihuia, me i whakairihia toku aitua ki runga ki te pauna.
- 3
- He taimaha hoki aianei i te onepu o te moana, i horomia ai aku kupu.
- 4
- Kei roto hoki i a au nga pere a te Kaha-rawa; inumia ake toku wairua e ta ratou riri: rarangi tonu nga whakawehi a te Atua hei hoa riri moku.
- 5
- E tangi ano ranei te kaihe mohoao i te mea kei te tarutaru ia? e tangi ano ranei te kau i te mea e kai ana?
- 6
- He mea kahore nei ona reka, e taea ranei te kai ki te kahore he tote? he reka ranei te whakakahukahu o te hua manu?
- 7
- Nga mea kihai nei toku ngakau i pai kia pa atu, ko enei mea whakapouri hei kai maku.
- 8
- Aue, me i riro mai taku i tono atu ai, me i homai e te Atua taku e tumanako atu nei.
- 9
- Me i pai te Atua kia whakangaromia ahau, kia tukua mai tona ringa hei hatepe atu i a au.
- 10
- Penei kua whai whakamarietanga ano ahau, kua wharikarika ano ahau i runga i te mamae: kaua ahau e tohungia e ia; kihai hoki nga kupu a te Mea Tapu i hunā e ahau.
- 11
- He aha toku kaha, e whai tumanakohanga atu ai ahau? he aha hoki toku mutunga, e roa ai ahau ki te ora?
- 12
- He kaha kohatu ranei toku kaha? he parahi ranei oku kikokiko?
- 13
- Kahore ranei he awhinatanga moku i roto i a au? kua oti ano ranei nga whakaaro te pei i roto i a au?
- 14
- Ki te mamae te ngakau o tetahi, e puta mai te aroha o tona hoa; tena ko tenei kua mahue i a ia te wehi i a te Kaha-rawa.
- 15
- He mahi tinihanga ta oku teina, he pera ano me te awa; rere ana ratou ano he waipuke no nga awaawa,
- 16
- Kua mangu nei i te hukapapa, ngaro ana te hukarere i roto.
- 17
- I te wa e mahana ai, ka memeha atu; i te weraweratanga, moti iho ratou i to ratou wahi.
- 18
- Ngau ke ana o ratou huarahi e rere ai; riro ana ratou ki te kore, a ngaro iho.
- 19
- E tirotirohia ana e nga tira o Tema; tatari ana nga tangata haere o Hepa ki a ratou.
- 20
- Whakama ana ratou mo ratou i whakamanawa atu ki reira; te haerenga mai ki aua awa, kanakana kau ana.
- 21
- Na, he kahore noa iho koutou. Kua kite nei koutou i a au kua mongamonga noa, a wehi ana.
- 22
- I mea ranei ahau, Mauria mai ki a au, homai hoki tetahi wahi o o koutou rawa hei hakari maku?
- 23
- I mea ranei, Whakaorangia ahau i te ringa o te hoa riri; hokona ahau i roto i te ringa o te kai tukino?
- 24
- Whakaakona mai ahau, a ka whakarongo puku ahau; whakaaturia mai ki a au te mea i he ai ahau.
- 25
- Ano te kaha o nga kupu tika! ko te aha ia te riria ana e a koutou kupu?
- 26
- E mea ana ranei koutou kia riria nga kupu? he hau kau nei hoki nga korero a te tangata kua pau ana whakaaro.
- 27
- Ae ra, e taupokina ana e koutou te pani, e keria ana e koutou te rua mo to koutou hoa.
- 28
- Na, whakaae mai, titiro mai ki a au; ka kitea hoki e koutou ki te mea he korero teka taku.
- 29
- Tena ra, tahuri mai; kaua hoki te he e waiho, ina, tahuri mai ano, ko reira au tika ai.
- 30
- He hē koia kei toku arero? e kore ranei toku hinengaro e mohio ki nga mea kino?
Address: 
Phone: 
Email: