Joel Chapter 2 - Paipera Tapu 1868 | Te Paipera Tapu 1868

Joel Chapter 2 - Paipera Tapu 1868

1
Whakatangihia te tētere ki Hiona, karangatia te whakaoho ki toku maunga tapu, kia wiri nga tangata katoa o te whenua: kei te haere mai hoki te ra o Ihowa, kua tata mai ano.
2
He ra pouri, he ra tuku pu, he ra kapua, he pouri kerekere, ano ko te ata kua horapa noa atu i runga i nga maunga: he iwi e nui ana, e kaha ana; kahore ona rite i mua, kahore ano hoki he pera i nga wa i muri, a taea noatia nga tau o era whakatupuranga, o era whakatupuranga.
3
I mua i a ratou ko te ahi e kai ana, i muri i a ratou ko te mura e ngiha ana; i mua i a ratou ano ko te kari o Erena te whenua, i muri i a ratou he taru-kore, maroke rawa; ina, e kore tetahi mea e puta i a ratou.
4
To ratou ahua kei to nga hoiho ahua; to ratou oma ano hoki rite tonu ki to nga kai eke hoiho.
5
To ratou mokowhiti rite tonu te haruru ki to nga hariata i runga i nga tihi o nga maunga, rite tonu ki te haruru o te mura ahi e kai ana i te kakau witi, ki te iwi kaha kua oti te whakararangi mo te whawhai.
6
Ka mamae nga iwi i to ratou aroaro: he amene mai i te mangu ta nga kanohi katoa.
7
To ratou oma rite tonu ki to nga marohirohi, ta ratou piki i te taiepa rite tonu ki ta nga tangata whawhai; haere tonu ratou i tona ara, i tona ara, a kore o ratou huarahi e korara.
8
E kore tetahi e tutetute i tona hoa; ka haere ratou i tona ara, i tona ara; a ka hinga ratou ki runga ki te hoari, e kore ratou e tu.
9
Ka kopikopiko ratou i roto i te pa; ka oma ratou ki runga ki te taiepa; ka piki ratou ki runga ki nga whare; ka haere ratou ki roto ki nga matapihi, ano he tahae.
10
Ru ana te whenua i to ratou aroaro, wiri ana nga rangi: te ra raua ko te marama pouri tonu, ka mutu ano te titi o nga whetu.
11
Ka puaki ano hoki te reo o Ihowa i te aroaro o tana ope: he nui whakaharahara hoki no tana puni: he kaha hoki ia e mahi nei i tana kupu: he nui nei hoki te ra o Ihowa, he wehi rawa; ko wai e kaha ake ki tena?
12
Na, tahuri mai ano hoki aianei, e ai ta Ihowa, o koutou ngakau katoa i runga ano i te noho puku, i te tangi, i te aue:
13
Haea ano hoki o koutou ngakau, hāunga o koutou kakahu, a tahuri mai ki a Ihowa, ki to koutou Atua, he aroha hoki tana, he mahi tohu, e aweke ana ki te riri, he nui tona atawhai, a ripeneta ana hoki ki te kino.
14
Ko wai e mohio ana me kahore ia e tahuri, e ripeneta, a ka mahue he manaakitanga i muri i a ia, ara, he whakahere toto-kore, he ringihanga ma Ihowa ma to koutou Atua?
15
Whakatangihia te tētere ki Hiona, whakatapua he nohopuku, karangatia he huihuinga nui.
16
Whakaminea mai te iwi, whakatapua te whakaminenga, whakaramemenetia mai nga kaumatua, whakaminea mai nga tamariki, ratou ko nga mea ngote u: kia puta mai te tane marena hou i roto i tona ruma, te wahine marena hou ano hoki i roto i tona whare moenga.
17
Kia tangi nga tohunga, nga minita o Ihowa, i te takiwa o te whakamahau, o te aata, me to ratou ki atu ano, Tohungia, e Ihowa, to iwi, kaua ano hoki to kāinga tupu e tukua ki te ingoa kino, ara, ko nga tauiwi hei rangatira mo ratou: kia korerotia hei aha i roto i nga iwi, Kei hea to ratou Atua?
18
Katahi ka hae a Ihowa ki tona whenua, ka manawapa ano hoki ki tona iwi.
19
A ka whakahokia mai e Ihowa, ka ki mai ia ki tona iwi, Tenei ahau te tuku atu nei i te witi ki a koutou, i te waina, i te hinu, e makona ai koutou; e kore ano koutou e tukua e ahau i muri ake nei hei ingoa kino i roto i nga tauiwi.
20
Ka meinga ano e ahau kia matara atu i a koutou te ope o te nota, ka aia atu ano ia e ahau ki te whenua wai-kore, maroke rawa; tona mata anga tonu ki te moana i te rawhiti, tona tuara ki te moana whakamutunga, ka puta ake ano hoki tona piro, ka puta ake ano tona haunga kino, he nui hoki no tana mahi.
21
Kaua e wehi, e te oneone; whakamanamana, kia koa; no te mea he nui te mahi a Ihowa.
22
Kaua e wehi, e nga kararehe o te parae, ka pihi hoki nga tarutaru o te koraha, kei te hua ano hoki nga hua o te rakau, e tukua mai ano to ratou kaha e te piki, e te waina.
23
Na, whakamanamana, e nga tamariki a Hiona, kia koa ki a Ihowa ki to koutou Atua, ka tika hoki tana homaitanga i te ua ki a koutou, ka meinga ano hoki e ia to mua ua, me to muri ua ano, kia heke iho ma koutou i te marama tuatahi.
24
Ka kapi ano hoki nga patunga witi i te witi; te waina ano hoki me te hinu o nga rua, purena tonu.
25
Ka utua ano hoki koutou mo nga tau i kainga e te mawhitiwhiti, e te tatarakihi, e te moka, e te whangawhanga, e taku ope nui i tukua atu e ahau ki a koutou.
26
Ka kai noa atu ano hoki koutou, ka makona, ka whakamoemiti ano hoki ki te ingoa o Ihowa o to koutou Atua mo tana mahi whakamiharo ki a koutou: e kore ano toku iwi e whakama, a ake ake ake.
27
Ka mohio ano koutou kei waenga ahau i a Iharaira, ko ahau ano hoki a Ihowa, ko to koutou Atua, kahore atu ano hoki: e kore ano toku iwi e whakama, a ake ake ake.
28
Na, tenei ake ka ringihia e ahau taku wairua ki nga kikokiko katoa, a e poropiti a koutou tamariki, a koutou tamahine, ka moemoea o koutou kaumatua, ka kite ano hoki a koutou taitamariki i nga whakakitenga.
29
I aua ra ano hoki ka ringihia e ahau toku wairua ki nga pononga tane, ki nga pononga wahine.
30
Ka hoatu ano e ahau nga mea whakamiharo i te rangi, i te whenua, he toto, he kapura, he pou paowa.
31
Ka rereke te ra, ka pouri, ka whakatoto te marama, i te mea kiano i puta mai te ra nui, te ra wehi o Ihowa.
32
Na, te hunga katoa e karanga ana ki te ingoa o Ihowa, ka mawhiti: no te mea ka whai whakaoranga a Hiona, ka pera ano me ta Ihowa i ki ai, a Hiruharama ano hoki, me nga morehu ano e karangatia ana e Ihowa.