- 1
- No te mea, nana, i aua ra, i taua wa ano hoki e whakahokia ai e ahau te whakaraunga o Hura raua ko Hiruharama,
- 2
- Ka huihuia ano e ahau nga iwi katoa, ka kawea ki raro ki te raorao o Iehohapata, ka tohe ano hoki ahau ki a ratou ki reira mo toku iwi, mo toku kāinga tupu ano hoki, mo Iharaira i whakamararatia nei e ratou ki roto ki nga iwi, a titoretorehia ana e ratou toku whenua;
- 3
- A kokiritia ana e ratou te niu mo toku iwi; hoatu ana e ratou te tamaiti hei utu mo te wahine puremu, hokona atu ana e ratou te kotiro ki te waina, hei inu ma ratou.
- 4
- He aha ano hoki ta koutou ki a au, e Taira raua ko Hairona, e nga rohe katoa o Parehetina? e homai ranei e koutou he utu ki a au? na, ki te homai e koutou he utu ki a au, hohoro tonu, kakama tonu taku whakahoki atu i te utu ki runga ki to koutou māhunga.
- 5
- Mo koutou i tango i taku hiriwa, i taku koura, a kawea ana e koutou aku mea pai e matenuitia ana ki roto ki o koutou temepara.
- 6
- A, hokona atu ana e koutou nga tamariki a Hura ratou ko nga tamariki o Hiruharama ki nga tamariki a nga Kariki, hei mea kia matara atu ai ratou i ta ratou rohe.
- 7
- Nana, ka ara mai ratou i a au i te wahi i hokona atu ai ratou e koutou, ka meinga ano e ahau kia hoki atu to koutou utu ki runga ki o koutou māhunga.
- 8
- Ka hokona atu ano e ahau a koutou tamariki, a koutou tamahine, ki te ringaringa o nga tamariki a Hura, a ma ratou e hoko atu ki nga Hapeana, ki te iwi i tawhiti: na Ihowa nei hoki te kupu.
- 9
- Karangatia tenei i roto i nga tauiwi; Kia rite nga mea mo te whawhai, whakaohokia nga marohirohi, kia whakatata mai nga tangata whawhai katoa, kia haere mai ratou.
- 10
- Patupatua a koutou hea parau hei hoari, a koutou toronaihi hei tao; me ki ake e te ngoi-kore, Kua kaha ahau.
- 11
- Huihui koutou, haere mai, e nga tauiwi katoa, kia rupeke mai koutou i tetahi taha, i tetahi taha: meinga o marohirohi, e Ihowa, kia heke iho ki reira.
- 12
- Kia whakaohokia nga tauiwi, kia haere hoki ratou ki te raorao o Iehohapata: ka noho hoki ahau ki reira ki te whakarite whakawa mo nga tauiwi katoa i tetahi taha, i tetahi taha.
- 13
- Tukua atu te toronaihi, kua pakari hoki te witi: haere mai, heke atu, kua ki hoki te poka waina; nga takotoranga waina purena tonu; he nui nei hoki ta ratou kino.
- 14
- He tini whaioio i te raorao e takoto rawa ai te tikanga; kua tata nei hoki te ra o Ihowa i te raorao e takoto ai te tikanga.
- 15
- Ka pouri te ra raua ko te marama, ka kore ano hoki te titi o nga whetu.
- 16
- Ka hamama mai ano hoki a Ihowa i Hiona, ka puaki mai ano hoki tona reo i Hiruharama, a ka wiri nga rangi me te whenua, ko Ihowa ia ta tona iwi e tumanako atu ai, ko ia ano te kaha o nga tamariki a Iharaira.
- 17
- A ka mohio koutou ko Ihowa ahau, ko to koutou Atua e noho nei i Hiona, i toku maunga tapu: katahi a Hiruharama ka tapu, a heoi ano haereerenga o nga tautangata i taua wahi.
- 18
- I taua rangi ano ka maturuturu iho te waina hou o nga maunga, ka rerengia ano hoki nga pukepuke e te waiu, ka rere ano hoki nga wai o nga awa katoa o Hura, ka pupū mai ano hoki he puna i roto i te whare o Ihowa, e makūkū ai te raorao o Hitimi.
- 19
- Ka waiho a Ihipa hei ururua, a Eroma hei koraha, ururua rawa, mo te mahi tutū ki nga tamariki a Hura, mo ta ratou whakahekenga i te toto hara-kore ki to ratou whenua.
- 20
- Ka noho tonu ia a Hura, a Hiruharama ano hoki, a tera whakatupuranga, tera whakatupuranga.
- 21
- Ka whakamākia atu ano hoki e ahau to ratou toto kihai i whakamākia e ahau: a ka noho a Ihowa ki Hiona.
Address: 
Phone: 
Email: