- 1
- A, muri iho i te matenga o Mohi o te pononga a Ihowa, na, ka korero a Ihowa ki a Hohua tama a Nunu, ki te tangata a Mohi, ka mea,
- 2
- Kua mate a Mohi taku pononga; na, whakatika, whiti atu i tenei Horano, a koe, me tenei iwi katoa, ki te whenua ka hoatu nei e ahau ki a ratou, ki nga tamariki a Iharaira.
- 3
- Ko nga wahi katoa e takahia e nga kapu o o koutou waewae ka hoatu e ahau a reira, ki a koutou, ka rite ki taku i korero ai ki a Mohi.
- 4
- Te rohe ki a koutou kei te koraha, kei Repanona nei, te awa nui atu ana, ara, Awa Uparati, ko te whenua katoa o nga Hiti a tae noa ki te moana nui, ki te toenetanga o te ra.
- 5
- E kore tetahi tangata e tu ki tou aroaro i nga ra katoa e ora ai koe: i a Mohi ahau, ka pera ano ahau ki a koe: e kore ahau e whakarere i a koe, e kore hoki e mawehe atu i a koe.
- 6
- Kia kaha, kia maia rawa: ta te mea, mau tenei iwi e whakawhiwhi ki te whenua i oati ai ahau ki o ratou matua, kia hoatu ki a ratou.
- 7
- Ae ra, kia kaha, kia maia rawa, kia mau ki te mahi i nga ture katoa, i whakahaua atu ki a koe e Mohi e taku pononga: kei peka atu koe ki tahaki, ki matau ki maui, kia tika ai tau i nga wahi katoa e haere ai koe.
- 8
- Kei whakarerea atu e tou waha tenei pukapuka o te ture; engari kia u ou whakaaro ki reira i te ao i te po, kia mau ai koe ki te mahi i nga mea katoa kua oti te tuhi ki reira: ma reira ka whai wahi ai koe i tou huarahi, ma reira hoki koe kake ai.
- 9
- Kahore ianei ahau i whakahau atu ki a koe? Kia kaha, kia maia; kaua e wehi, kaua hoki e pawera: ta te mea, kei a koe a Ihowa tou Atua i nga wahi katoa e haere ai koe.
- 10
- Na, ka whakahau atu a Hohua i nga rangatira o te iwi, ka mea,
- 11
- Haere ma waenganui o te ope, ka whakahau atu i te iwi, ka mea, Takā he o mo koutou; ta te mea, kia toru ake ra ka whiti koutou i Horano nei, ka haere ki te tango i te whenua ka homai nei e Ihowa e to koutou Atua kia nohoia e koutou.
- 12
- A, i korero ano a Hohua ki nga Reupeni, ki nga Kari, ki tetahi taanga hoki o te iwi o Manahe, i mea,
- 13
- Kia mahara ki te kupu i whakahau ai a Mohi te pononga a Ihowa ki a koutou, i mea ai, Kua mea a Ihowa to koutou Atua i a koutou kia okioki, kua homai hoki e ia tenei whenua ki a koutou.
- 14
- Ko a koutou wahine, ko a koutou tamariki, me a koutou kararehe, me noho ki te whenua i hoatu e Mohi ki a koutou i tenei taha o Horano; ko nga tangata marohirohi katoa ia o koutou me haere topuni atu i te aroaro o o koutou tuakana, hei whakauru mo ratou.
- 15
- Kia meinga ra ano e Ihowa o koutou tuakana kia okioki, kia peneitia me koutou, a kia whiwhi ratou ki te whenua ka homai nei e Ihowa e to koutou Atua ki a ratou; ka hoki ai koutou ki te whenua i riro mai nei i a koutou, ka noho ai hoki ki te wahi i hoatu e Mohi a te pononga a Ihowa ki a koutou i tenei taha o Horano, i te putanga mai o te ra.
- 16
- Na, ka whakahokia mai e ratou ki a Hohua, a ka mea, Ko nga mea katoa e whakahaua mai e koe ki a matou ka meatia e matou, me haere ano matou ki nga wahi katoa e ungā ai matou e koe.
- 17
- Me matou i rongo ki nga meatanga katoatanga a Mohi, waihoki ka rongo ano matou ki a koe: kia noho raia a Ihowa tou Atua ki a koe, me ia hoki i noho ki a Mohi.
- 18
- Te tangata e tutu ana ki to ki, a e kore e rongo ki au kupu, ki nga mea katoa e whakahau ai koe ki a ia, me whakamate: ko koe ia kia kaha, kia maia.
Address: 
Phone: 
Email: