Joshua Chapter 23 - Paipera Tapu 1868 | Te Paipera Tapu 1868

Joshua Chapter 23 - Paipera Tapu 1868

1
A ka maha nga ra i muri iho i ta Ihowa meatanga i a Iharaira kia okioki i o ratou hoa riri katoa i tetahi taha i tetahi taha, a, ka maha haere nga ra o Hohua, ka koroheketia.
2
Na, ka karanga atu a Hohua ki a Iharaira katoa, ki o ratou kaumatua, ki o ratou ariki, ki o ratou kai whakariterite, me o ratou rangatira, a ka mea ki a ratou, Kua koroheketia ahau, kua maha oku ra:
3
A, kua kite koutou i nga mea katoa i mea ai a Ihowa to koutou Atua ki enei iwi katoa, na te whakaaro hoki ki a koutou; no te mea ko Ihowa ko to koutou Atua, mana ta koutou riri.
4
Titiro, kua oti te wahi o enei iwi, ka mahue nei, te wehewehe atu e ahau mo koutou, hei kāinga tupu mo o koutou iwi, o Horano atu, me nga iwi katoa i hunā e ahau, a, tae noa ki te moana nui, ki te toenetanga o te ra.
5
A, ko Ihowa ko to koutou Atua, mana ratou e pei atu i to koutou aroaro, mana hoki ratou e huna i to koutou aroaro; a, ka riro mai to ratou oneone i a koutou, ka pera me ta Ihowa me ta to koutou Atua kupu ki a koutou.
6
Mo reira kia uaua rawa koutou ki te pupuri, ki te mahi i nga mea katoa i tuhituhia ki te pukapuka o te ture a Mohi, kei peka ke atu i reira ki matau ki maui;
7
Kei haere hoki ki roto ki enei iwi, i mahue tahi nei koutou; kei whakahuatia hoki nga ingoa o o ratou atua, kei oatitia hoki ratou, kei mahi ki a ratou, kei koropiko ki a ratou:
8
Engari me awhi atu koutou ki a Ihowa ki to koutou Atua, me pera me ta koutou i mea ai, a, tae noa ki tenei ra.
9
He nui hoki, he kaha nga iwi kua peia nei e Ihowa i mua i a koutou: a, ko koutou nei, kahore ano tetahi tangata kia tu ki to koutou aroaro, a, taea noatia tenei ra.
10
Kia kotahi tangata o koutou hei whai i te mano: no te mea ko Ihowa ko to koutou Atua, mana ta koutou riri, ka pera me tana i korero ai ki a koutou.
11
Na tiakina marietia o koutou ngakau, kia aroha ai koutou ki a Ihowa ki to koutou Atua.
12
No te mea hoki, ki te anga koutou ki te hoki atu, ki te awhi ki nga toenga o enei iwi, o enei ka mahue nei i roto i a koutou, a ka marenatia ki roto ki a ratou, ka whakauru hoki ki roto ki a ratou, me ratou hoki ki roto ki a koutou:
13
Kia tino mohio koutou e kore a Ihowa to koutou Atua e pei atu ano i enei iwi i mua i a koutou; a, ka waiho ratou hei rore, hei mahanga mo koutou, hei whiu hoki mo o koutou kaokao, hei koikoi ano hoki i roto i o koutou kanohi, kia hunā ra ano koutou i runga i tenei whenua pai, ka homai nei e Ihowa e to koutou Atua ki a koutou.
14
Nana, ko aianei ahau haere ai i te huarahi o te whenua katoa; a, e mohio ana o koutou ngakau katoa, o koutou wairua katoa, kahore ano i taka tetahi mea o nga mea pai katoa i korerotia e Ihowa e to koutou Atua mo koutou; kua pono katoa ki a koutou, kahore ano tetahi mea o ena i taka.
15
Na, tenei ake ka rite ki te putanga mai ki a koutou o nga mea pai katoa, i korerotia e Ihowa e to koutou Atua ki a koutou; ka whakaputa mai ano a Ihowa i nga mea kino katoa ki a koutou, kia whakangaromia ra ano koutou e ia i runga i tenei whenua pai, ka homai nei e Ihowa e to koutou Atua ki a koutou.
16
Ki te whakapaheketia e koutou te kawenata a Ihowa a to koutou Atua, i whakaritea mai e ia ki a koutou, ki te haere, ki te mahi atu ki nga atua ke, ki te koropiko atu ki a ratou; ko reira mura ai te riri a Ihowa ki a koutou, a, ka hunā whakareretia atu koutou i runga i te whenua pai, ka homai nei e ia ki a koutou.