Joshua Chapter 6 - Paipera Tapu 1868 | Te Paipera Tapu 1868

Joshua Chapter 6 - Paipera Tapu 1868

1
Na, he mea tutaki tonu a Heriko, i te wehi hoki i nga tamariki a Iharaira; kahore he tangata i haere atu ki waho, kahore hoki tetahi i haere mai ki roto.
2
A ka mea a Ihowa ki a Hohua, Titiro, kua hoatu e ahau ki tou ringa a Heriko, me tona kingi, ratou ko nga tangata marohirohi.
3
Taiawhiotia te pa, e koutou, e nga tangata hapai patu katoa, me haere, a tawhio noa te pa, kia kotahi ano awhiotanga. Kia ono nga ra e pena ai koe.
4
A kia tokowhitu nga tohunga hei mau i etahi tetere haona hipi e whitu ki mua i te aaka: a i te whitu o nga ra me taiawhio e koutou te pa, kia whitu nga taiawhiotanga, a ma nga tohunga e whakatangi nga tetere.
5
A, ka roa te tangi o te haona hipi, ka rangona e koutou te tangi o te tetere, me hamama katoa te iwi, kia nui te hamamatanga; na, ka hinga te taiepa o te pa i tona turanga, a ka piki atu te iwi, a ia tangata a ia tangata, i nga wahi e rite mai ana ki a ratou.
6
Na, ka karanga atu a Hohua tama a Nunu ki nga tohunga, ka mea ki a ratou, Hapainga ake te aaka o te kawenata, a, ma nga tohunga tokowhitu e mau nga tetere haona hipi e whitu ki mua i te aaka o Ihowa.
7
A i mea ia ki te iwi, Haere atu koutou, taiawhiotia hoki te pa, me haere hoki i mua i te aaka o Ihowa nga mea i rite i te patu.
8
Heoi, te korerotanga atu a Hohua ki te iwi, na, ka mau nga tohunga tokowhitu ki nga tetere haona hipi e whitu, a haere ana i mua i a Ihowa, me te whakatangi ano i nga tetere; i haere atu hoki te aaka o te kawenata o Ihowa i muri i a ratou.
9
A ko nga mea i rite i te patu i haere atu i mua i nga tohunga e whakatangi ana i nga tetere, ko te nuinga hoki i haere i muri i te aaka; haere ana era me te whakatangi ano i nga tetere.
10
Kua oti ano hoki te iwi te whakaako e Hohua; i mea ia, Kei hamama koutou, kei rangona hoki o koutou reo, kei puta mai hoki tetahi kupu i o koutou waha, a tae noa ki te ra e mea ai ahau ki a koutou, Hamama; hei reira koutou ka hamama.
11
Na, taiawhiotia ana te pa e te aaka o Ihowa, haere ana, a tawhio noa, kotahi ano taiawhiotanga: na, ka haere mai ratou ki te puni, a moe ana ki te puni.
12
A ka maranga wawe a Hohua i te ata, a hapainga ake ana e nga tohunga te aaka o Ihowa.
13
I mau ano hoki nga tohunga tokowhitu i nga tetere haona hipi e whitu i mua i te aaka o Ihowa, i haere tonu, me te whakatangi ano i nga tetere: ko nga mea hoki i rite i te patu i haere i mua i a ratou; ko te nuinga ia i haere atu i muri i te aaka o Ihowa: haere ana era, me te whakatangi ano i nga tetere.
14
A taiawhiotia ana e ratou te pa i te rua o nga ra, kotahi ano taiawhiotanga, a hoki mai ana ki te puni: a pera tonu ratou i nga ra e ono.
15
Na, i te whitu o nga ra, ka maranga wawe ratou i te puaotanga ake ano o te ra, ka taiawhio hoki i te pa, e whitu nga taiawhiotanga, ko taua ritenga ra ano; otiia e whitu a ratou taiawhiotanga i te pa i taua ra.
16
A, i te whitu o nga taiawhiotanga, ka whakatangi nga tohunga i nga tetere, a, ka mea a Hohua ki te iwi, Hamama, kua homai hoki e Ihowa te pa ki a koutou.
17
A, hei mea kanga te pa hei mea ma Ihowa, a reira, me nga mea katoa i roto; ko Rahapa ia, ko te wahine puremu, kia ora tera, me nga mea katoa i a ia i roto i te whare, mona i huna i nga tangata i tonoa atu e tatou.
18
Ko koutou ia, kia hopohopo koutou ki te mea kua oti te kanga, kei mea koutou kia kangā koutou, ki te tango koutou i tetahi wahi o te mea kua oti te kanga; a, ka mea i te ope Iharaira kia kangā; a, whakararua iho e koutou.
19
Engari nga hiriwa, me nga koura katoa, me nga mea parahi, me nga mea rino hoki, kia tapu ena, ma Ihowa; kia riro mai hoki ki roto ki te whare taonga o Ihowa.
20
Na, te hamamatanga o te iwi i te whakatangihanga a nga tohunga i nga tetere: a, ka rongo te iwi i te tangi o te tetere, te tino hamamatanga o te iwi, he nui te hamama, a hinga iho te taiepa i tona turanga ano, a piki atu ana te iwi ki roto ki te pa, ia tangata ia tangata i te wahi e rite mai ana ki a ia, na, ka horo te pa i a ratou.
21
A hunā iho e ratou nga mea katoa i roto i te pa, nga tane me nga wahine, nga taitamariki, me nga koroheke, me nga kau, me nga hipi, me nga kaihe, ki te mata o te hoari.
22
Otiia i mea a Hohua ki nga tangata tokorua i tuteia ai te whenua, Haere ki te whare o te wahine puremu, kawea mai hoki i reira te wahine, me nga mea katoa i a ia, whakaritea ta korua i oati ai ki a ia.
23
Na, ka haere aua taitamariki, nga tutei, a tangohia mai ana e raua a Rahapa, tona papa, tona whaea, ona tungane, me nga mea katoa i a ia; i kawea mai ano hoki e raua ona whanaunga katoa ki waho; a waiho ana i waho o te puni o Iharaira.
24
A tahuna ana e ratou te pa ki te ahi, me nga mea katoa i roto: ko te hiriwa ia, me te koura, me nga mea parahi, me nga mea rino, i hoatu e ratou ki roto ki te whare taonga o te whare o Ihowa.
25
A whakaorangia ake e Hohua a Rahapa te wahine puremu, me te nohoanga o tona papa, me nga mea katoa i a ia; a, e noho ana ano ia i waenganui o Iharaira, a, tae noa ki tenei ra, mona i huna i nga tangata i tonoa e Hohua ki te tutei i Heriko.
26
Na, ka whakaoati a Hohua i a ratou i taua wa, ka mea, Ka kangā te tangata ki te aroaro o Ihowa e whakatika ana, e hanga ana i tenei pa, i Heriko: ka whakaturia e ia, hei runga ano i tana tamaiti matamua, a, ka whakanohoia nga tatau, hei runga ano i tana tamaiti o muri.
27
A, i a Hohua tonu a Ihowa, a paku ana tona rongo puta noa i te whenua.