Joshua Chapter 8 - Paipera Tapu 1868 | Te Paipera Tapu 1868

Joshua Chapter 8 - Paipera Tapu 1868

1
Na, ka mea mai a Ihowa ki a Hohua, Kaua e mataku, kaua e pawera: tangohia ki a koe te hunga hapai patu katoa, a, whakatika, haere ki runga ki Hai: titiro hoki, kua hoatu e ahau ki tou ringa te kingi o Hai, me tona iwi, me tona pa, me tona whenua:
2
A kia rite tau e mea ai ki Hai me tona kingi, ki tau i mea ai ki Heriko me tona kingi: ko ona taonga ia, me ona kararehe, me tango ma koutou: whakatakotoria, he pehipehi mo te pa ki tera pito.
3
Na, ko te whakatikanga atu o Hohua, me te hunga hapai patu katoa ki te whakaeke i Hai: a whiriwhiria ana e Hohua e toru tekau mano o nga tangata, he hunga marohirohi, tonoa atu ana ratou e ia i te po.
4
A, i whakahau ano ia i a ratou, i mea, Kia mahara, me whakatakoto e koutou mo te pa, ki tera pito o te pa: kei matara rawa atu koutou i te pa, kia tumatohi hoki koutou katoa;
5
A maku, ina te hunga katoa hoki i a au, e whakatata atu ki te pa: a, ka puta mai ratou ki te tu i a matou, ka pera me to mua, na, ka rere matou i to ratou aroaro.
6
Na, ka puta mai ratou ki muri i a matou, a ka manukawhakitia e matou i roto i te pa; e mea hoki ratou, E rere ana ratou i o tatou aroaro, pera hoki me to mua: ko te mea ia e rere ai matou.
7
Hei reira koutou whakatika mai ai te pehipehi, ka tomo ki roto ki te pa; ma Ihowa hoki ma to koutou Atua e tuku mai ki o koutou ringa.
8
A, ka riro mai te pa i a koutou, tahuna te pa ki te ahi: peratia me ta Ihowa i ki mai ai. Kia mahara, kua whakaritea atu nei e ahau ki a koutou.
9
Na, tonoa atu ana ratou e Hohua: a haere ana ratou ki te whakatakoto, a noho ana i waenganui o Pete-ere o Hai, ki te taha ki te hauauru o Hai: ko Hohua ia i moe i waenganui o te iwi i taua po.
10
Na, maranga wawe ana a Hohua i te ata, a, tirohia marietia ana e ia te iwi, na, haere atu ana ia, me nga kaumatua o Iharaira i mua o te iwi ki Hai.
11
A, ko te iwi katoa, ko nga mea hapai patu, ko tona nuinga, i haere atu, i whakatata atu, a, ka tae atu ki mua mai o te pa, a noho rawa atu ki te taha ki te nota o Hai: a, he wharua i te takiwa o matou o Hai.
12
Na, ka tango ia i etahi tangata tata tonu ki te rima o nga mano, a ungā ana e ia ki te whakatakoto ki waenganui o Pete-ere o Hai, ki te taha ki te hauauru o te pa.
13
A, ka oti i a ratou te whakanoho te iwi, ara te ope katoa, tera i te pito ki te nota o te pa, me a matou pehipehi i te pito ki te taha ki te hauauru o te pa, na, ka haere a Hohua i taua po ano ki waenganui o te wharua.
14
A, te kitenga mai o te kingi o Hai, na, hohoro ana ratou, maranga wawe ana; te tino putanga mai o nga tangata o te pa ki te tu i a Iharaira ki te riri, a ia, me tona iwi katoa` i te wa i whakaritea, i te ritenga mai o te mānia; kihai hoki ia i mohio he pehipehi mona kei tera pito o te pa.
15
A whakawhati ana a Hohua ratou ko Iharaira katoa i a ratou ano i o ratou aroaro; a rere ana i te huarahi ki te koraha.
16
Katahi ka karangatia katoatia te iwi i roto i Hai ki te whai i a ratou: na, whai ana ratou i muri i a Hohua, a manukawhakitia mai ana ratou i roto i te pa.
17
A, kahore he tangata o Hai raua ko Pete-ere i noho ki te haere atu ki te whai i a Iharaira: na, whakarerea ana e ratou te pa kia takoto kau ana, a whai ana i muri i a Iharaira.
18
Na ko te meatanga mai a Ihowa ki a Hohua, Whatorona atu te timata i tou ringa ki Hai; no te mea ka hoatu e ahau a reira ki tou ringa. Na whatorona atu ana e Hohua te timata i tona ringaringa ki te pa.
19
Na, whakatika tonu mai te pehipehi i to ratou wahi, a rere ana i te toronga atu ano o tona ringaringa: a tomokia ana te pa e ratou, a horo ana, na, hohoro tonu ta ratou tahu i te pa ki te ahi.
20
A, te tahuritanga mai o nga tangata o Hai, ka titiro, na! ko te paowa o te pa e kake ana ki te rangi, na, kahore o ratou kaha ki te rere penei ranei, pera ranei: na, ka tahuri mai te hunga i rere whaka te koraha ki nga mea i whai atu.
21
A, te kitenga o Hohua ratou ko Iharaira katoa kua horo te pa i te pehipehi, a ko te paowa o te pa e kake ana ki runga, na, ka tahuri mai ratou, ka patu i nga tangata o Hai.
22
A, puta mai ana hoki era i roto i te pa hei arai mai mo ratou; na makā iho ana ratou ki waenganui o Iharaira; ko enei i tenei taha, ko era hoki i tera taha: na, tukitukia iho ratou e ratou, a kahore noa i mahue tetahi morehu, tetahi oranga o ratou.
23
A, hopukia oratia ana e ratou te kingi o Hai, a kawea mai ana ki a Hohua.
24
Ano ka poto i a Iharaira te patu nga tangata katoa o Hai i te parae, i te koraha i whaia nei ratou ki reira, a ka hinga katoa ratou i te mata o te hoari, a poto noa ratou, katahi ka hoki katoa a Iharaira ki Hai ka tukituki hoki i reira ki te mata o te hoari.
25
A, ko nga tangata katoa i hinga i taua ra, ko nga tane me nga wahine, kotahi tekau ma rua nga mano, nga tangata katoa hoki o Hai.
26
Kahore hoki a Hohua i whakahoki iho i tona ringaringa, i torona atu e ia me te timata, a ngaro noa i a ia nga tangata katoa o Hai.
27
Ko nga kararehe ia me nga taonga o taua pa, i tangohia e Iharaira ma ratou, i pera ano me te kupu a Ihowa i akona e ia ki a Hohua.
28
A, tahuna ana e Hohua a Hai, e meinga iho hei puranga mo a mua tonu atu, hei ururua, a, tae noa mai ki tenei ra.
29
Ko te kingi hoki o Hai i taronatia e ia ki runga ki te rakau, a ahiahi noa: a, ka to te ra, ka whakahau a Hohua kia tangohia iho tona tinana i runga i te rakau, kia makā e ratou ki te kuwaha o te keti o te pa, kia whakapurangatia hoki etahi kohatu ki runga i a ia, he nui te puranga e takoto na ano, a taea noatia tenei ra.
30
Na, hangā ana e Hohua tetahi aata ma Ihowa ma te Atua o Iharaira ki runga ki Maunga Epara,
31
Pera me ta Mohi me ta te pononga a Ihowa i whakahau ai ki nga tamariki a Iharaira, he mea e rite ana ki tera i tuhituhia i roto i te pukapuka o te ture a Mohi, he aata kamaka toitu, kihai nei i akina iho te rino ki runga; a whakaekea ana e ratou he tahunga tinana ma Ihowa ki runga i taua mea, patua ano hoki e ratou he whakamarietanga.
32
A tuhituhia ana e ia i reira ki nga kohatu nga kupu o te ture a Mohi, i tuhituhia ki te aroaro o nga tamariki a Iharaira.
33
A ko Iharaira katoa, ratou ko ona kaumatua, ko nga rangatira, ko ona kai whakariterite, i tu ki tetahi taha o te aaka ki tetahi taha, i mua o nga tohunga, o nga Riwaiti, o nga kai amo i te aaka o te kawenata a Ihowa, ratou tahi ko te noho noa iho, ko te tangata tupu; ko tetahi taanga o ratou i te ritenga atu o Maunga Keritimi, ko tetahi taanga hoki o ratou i te ritenga atu o Maunga Epara; i rite tonu ki ta Mohi ki ta te pononga a Ihowa i whakahau ai i mua, hei manaaki i te iwi o Iharaira.
34
A muri iho ka korerotia e ia nga kupu katoa o te ture, nga manaakitanga me nga kanga, rite tahi ki nga mea katoa i tuhituhia ki te pukapuka o te ture.
35
Kahore he kupu o nga mea katoa i whakahaua e Mohi i kore te korerotia e Hohua ki te aroaro o te huihui katoa o Iharaira, o nga wahine hoki, ratou ko nga tamariki, ko nga noho noa iho i kopikopiko tahi nei ratou.