- 1
- Katahi ka haere atu nga tamariki katoa a Iharaira, a huihui ana te whakaminenga, me te mea he tangata kotahi, no Rana mai ano a Peere-hepa atu ana, no te whenua ano hoki o Kireara, ki a Ihowa ki Mitipa.
- 2
- A i puta mai ano nga rangatira o te iwi katoa, o nga iwi katoa o Iharaira, i roto i te huihui o te iwi o te Atua, e wha rau aua mano, he hunga haere i raro, he hunga unu hoari.
- 3
- A i rongo ano nga tamariki a Peniamine kua tae mai nga tamariki a Iharaira ki Mitipa. Na, ka mea nga tamariki a Iharaira, Korerotia mai te peheatanga o tenei mea kino.
- 4
- Na, ka whakahokia mai e te Riwaiti e te tangata nāna te wahine i kohurutia, a ka mea, I haere ahau ki Kipea, ki tera i a Peniamine, maua ko taku wahine iti, moe ai i te po.
- 5
- Na, ko te whakatikanga mai o nga tangata o Kipea ki a au, kei te karapoti i te whare, he mea hoki moku, i te po; i mea ratou kia patua ahau: na, whakaititia ana e ratou taku wahine, a mate iho.
- 6
- Na, ka mau ahau ki taku wahine, a tapatapahia ana e ahau, hoatu ana kia kawea puta noa i te whenua, i te kāinga tupu o Iharaira, mo ratou i mahi i te mahi kino, i te mahi poauau i roto i a Iharaira.
- 7
- Na, he tamariki katoa koutou na Iharaira; homai ki konei ta koutou kupu, me ta koutou whakaaro.
- 8
- Katahi ka whakatika katoa te iwi, ano he tangata kotahi, ka mea, E kore tetahi o tatou e haere ki tona teneti, e kore ano hoki tetahi o tatou e peka atu ki tona whare.
- 9
- Engari ko ta tatou mea tenei e mea ai ki Kipea: hei te rota te tikanga mo ta tatou whawhai ki reira.
- 10
- Me tango hoki e tatou etahi tangata, kia tekau, i roto i te rau, puta noa i nga iwi katoa o Iharaira, he rau hoki i roto i te mano, he mano i roto i te tekau mano, hei mau o mo te iwi; a ka tae ratou ki Kipea o Peniamine ka rite ta ratou e mea ai ki nga mea poauau katoa i mahia e ratou i roto i a Iharaira.
- 11
- Heoi huihui ana nga tangata katoa o Iharaira hei whakaeke mo te pa, piri tonu me te mea he tangata kotahi ratou.
- 12
- Na, ka tono tangata atu nga iwi o Iharaira puta noa i te iwi katoa o Peniamine, hei mea, He aha tenei mea kino kua meatia i roto i a koutou?
- 13
- Na, homai aianei aua tangata, nga tamariki a Periara i Kipea, kia whakamatea e matou, kia whakakorea ai te kino i roto i a Iharaira. Otiia kihai nga tamariki a Peniamine i pai ki te whakarongo ki te reo o o ratou tuakana, o nga tamariki a Iharaira.
- 14
- Na, ka huihui mai nga tamariki a Peniamine, i roto i nga pa ki Kipea, ka haere mai ki te whawhai ki nga tamariki a Iharaira.
- 15
- Na, ka tāua i taua ra nga tamariki a Peniamine, o nga pa, e rua tekau ma ono mano nga tangata, he hunga unu hoari; tera atu ano nga tangata o Kipea: i tāua ratou e whitu rau tangata, whiriwhiri rawa.
- 16
- Kei roto ano hoki i tenei hunga katoa etahi tangata, e whitu nga rau, he hunga whiriwhiri, he maui; enei katoa he hunga e piua ai te kohatu ki te huruhuru mahunga, a e kore e heke.
- 17
- I tāua ano hoki nga tangata o Iharaira, nga mea ehara i a Peniamine: e wha rau mano tangata, he hunga unu hoari: he hunga hapai pakanga enei katoa.
- 18
- Katahi nga tamariki a Iharaira ka whakatika, ka haere ki te whare o te Atua, ka ui atu ki te Atua, ka mea Ko wai o matou hei timata te haere ki te whawhai ki nga tamariki a Peniamine? Na, ko te meatanga mai a Ihowa, Ma Hura e timata.
- 19
- Na, ka maranga nga tamariki a Iharaira i te ata, a ka noho ki Kipea.
- 20
- Na, ko te haerenga atu o nga tamariki a Iharaira ki te whawhai ki a Peniamine; a whakariteritea ana a ratou ngohi e nga tamariki a Iharaira mo te whawhai ki Kipea.
- 21
- Na, ka puta mai nga tamariki a Peniamine i roto i Kipea, a pirau rawa i a ratou ki te whenua i taua ra, e rua tekau ma rua mano, nga tangata o Iharaira.
- 22
- Heoi ka whakatenatena te iwi, nga tangata o Iharaira, i a ratou ano, a whakaritea ana ano a ratou ngohi kia whawhai ai ki taua wahi ano i whakatakotoria ai e ratou i te ra tuatahi.
- 23
- (I haere ano hoki nga tamariki a Iharaira, i tangi ki te aroaro o Ihowa, a, ahiahi noa, i ui atu hoki ki a Ihowa, i mea, Me haere atu ano hoki ahau ki te whawhai ki nga tamariki a Peniamine a taku teina? Na, ko te meatanga mai a Ihowa, Haere ki te whawhai ki a ia.)
- 24
- Na, ko te whakatatanga mai o nga tamariki a Iharaira ki nga tamariki a Peniamine i te rua o nga ra.
- 25
- A i puta mai ano a Peniamine i roto i Kipea, i te rua o nga ra ki te tu i a ratou, a pirau rawa ano i a ratou ki te whenua kotahi tekau ma waru mano o nga tamariki a Iharaira: he hunga unu hoari katoa enei.
- 26
- Katahi ka haere nga tamariki katoa a Iharaira, me te iwi katoa, a ka tae ki te whare o te Atua; na, ka tangi ratou, a ka noho i reira ki te aroaro o Ihowa, kahore rawa hoki i kai i taua ra, ahiahi noa: me te whakaeke ano hoki i nga tahunga tinana, i nga whakamarietanga ki te aroaro o Ihowa.
- 27
- Na, ka ui ano nga tamariki a Iharaira ki a Ihowa; (i reira hoki te aaka o te kawenata a te Atua i aua ra,
- 28
- Ko Pinehaha hoki, tama a Ereatara, tama a Arona, te tu ana i tona aroaro i aua ra;) ka mea ratou, Me haere atu ano hoki ahau ki te whawhai ki nga tamariki a Peniamine a toku teina, me whakamutu ranei? Na, ko te meatanga mai a Ihowa, Haere, ko apopo hoki ratou hoatu ai e ahau ki tou ringa.
- 29
- Katahi ka whakatakotoria he pehipehi e Iharaira mo Kipea, a, taka noa taka noa.
- 30
- Na, ka haere nga tamariki a Iharaira ki nga tamariki a Peniamine i te toru o nga ra, a whakatakotoria ana nga ngohi hei whawhai ki Kipea, hei pera ano me mua ra.
- 31
- Na, ko te putanga mai o nga tamariki a Peniamine ki te tu i te iwi, manukawhakitia mai ana ratou i te pa; na, ka timata ratou te patu i etahi o te iwi, te tukituki, te pera me mua ra, i nga huarahi e tika atu ra, ko tetahi ki te whare o te Atua, ko tetahi ki Kipea i te parae, ki te whakaaro iho e toru tekau nga tangata o Iharaira.
- 32
- Na, ko te meatanga a nga tamariki a Peniamine, Kua hinga ratou i a tatou, kua pera me to te timatanga. Otiia i mea nga tamariki a Iharaira, Kia rere atu tatou; me manukawhaki mai ratou i roto i te pa ki nga huarahi.
- 33
- Katahi ka whakatika ake nga tangata katoa o Iharaira i o ratou wahi, a ka tu a matua ki Paaratamara: i puta mai ano hoki nga pehipehi o Iharaira i to ratou wahi, i te wahi tarutaru o Kipea.
- 34
- Na, haere tonu atu ki Kipea nga tangata kotahi tekau nga mano, he hunga whiriwhiri i roto i a Iharaira katoa, a ka nui haere te whawhai: kihai hoki enei i mohio e tata ana te kino ki a ratou.
- 35
- Na, patua iho e Ihowa a Peniamine i te aroaro o Iharaira, a ngaro iho a Peniamine i nga tamariki a Iharaira i taua ra, e rua tekau ma rima mano kotahi rau, he hunga unu hoari enei katoa.
- 36
- Heoi ka kite nga tamariki a Peniamine e patua ana ratou: i tukua mai nga Peniamini e nga tangata o Iharaira, i whakamanawa atu hoki ki te pehipehi i whakatakotoria e ratou ki Kipea.
- 37
- Na, hohoro tonu te pehipehi, huakina ana e ratou a Kipea; te unuhanga mai hoki o te pehipehi, na, patua iho e ratou te pa katoa ki te mata o te hoari.
- 38
- Na, kua oti tetahi tohu te whakarite e nga tangata o Iharaira ki te pehipehi, ara, kia nui te kake o te mura, o te paowa, i roto i te pa.
- 39
- Heoi te whatinga o nga tangata o Iharaira i te mea e whawhai ana, na, ka anga a Peniamine, ka patu, ka tukituki i nga tangata o Iharaira; ki te whakaaro iho e toru tekau nga tangata: i mea hoki ratou, Koia rawa ano! e hinga ana ano ratou i a tatou, e pera ana ano me to te whawhaitanga tuatahi.
- 40
- Heoi ka timata nei te mura o te pa te kake ki runga, me te pou paowa, na, ka titiro a Peniamine ki muri i a ratou, na, kua pau te pa i te ahi, e kake ana tera ki te rangi.
- 41
- A, te tahuritanga atu o nga tangata o Iharaira, na, kanakana kau nga tangata o Peniamine; i kite hoki ratou kua tae te he ki a ratou.
- 42
- Na, ka whati atu ratou i te aroaro o nga tangata o Iharaira ki te huarahi ki te koraha; heoi ka mau ano ratou i te hoa riri; Na, te hunga i puta mai i roto i nga pa, kei te whakangaro i a ratou, he mea karapoti na ratou.
- 43
- Na, ka karapotia a Peniamine e ratou, a whaia ana, takatakahia ana, koia ano te ngawari! i te ritenga atu o Kipea i te taha ki te rawhiti.
- 44
- A kotahi tekau ma waru mano o nga tangata o Peniamine i hinga: he hunga maia enei katoa.
- 45
- Na, ka whati ratou, a rere ana ki te koraha ki te kamaka o Rimono: a e rima mano tangata i hamua e ratou ki nga huarahi, na, ka whaia ano ratou ki Kiromo, a patua iho o ratou e rua mano tāngata.
- 46
- Na, te hunga katoa i hinga o Peniamine i taua ra, e rua tekau ma rima mano, he hunga unu hoari: he hunga maia katoa enei.
- 47
- A e ono rau tangata i tahuri, i rere ki te koraha ki te teko o Rimono, a e wha nga marama i noho ai ki te teko o Rimono.
- 48
- A i tahuri atu ano nga tangata o Iharaira ki nga tamariki a Peniamine, a patua iho ratou ki te mata o te hoari, nga tangata o nga pa, me nga kararehe, me nga mea katoa i tupono atu ai ratou: i tungia ano hoki e ratou ki te ahi nga pa katoa i tae atu ai ratou.
Address: 
Phone: 
Email: