Judges Chapter 21 - Paipera Tapu 1868 | Te Paipera Tapu 1868

Judges Chapter 21 - Paipera Tapu 1868

1
Na, kua puaki noa ake te oati a nga tangata o Iharaira i Mitipa, i mea ratou, Kaua tetahi tangata o tatou e hoatu i tana tamahine hei wahine ma Peniamine.
2
Katahi ka haere mai te iwi ki te whare o te Atua, a noho ana i reira i te aroaro o te Atua, a, ahiahi noa; na, rahi noa atu o ratou reo, he nui te tangihanga.
3
I mea hoki ratou, Na te aha, e Ihowa, e te Atua o Iharaira, i puta ake ai tenei i roto i a Iharaira; i ngaro ai tetahi iwi i tenei ra i roto i a Iharaira?
4
Na, i te ata ka maranga wawe te iwi, a hangā ana he aata e ratou, a whakaekea ana he tahunga tinana, he whakamarietanga.
5
Na, ko te meatanga a nga tamariki a Iharaira, Ko wai o nga iwi katoa o Iharaira kahore i tae mai i roto i te whakaminenga ki a Ihowa? Kua takoto hoki he oati nui mo te tangata e kore e haere ki a Ihowa ki Mitipa: i mea ratou, Ka whakamatea rawatia.
6
A koingo tonu nga tamariki a Iharaira ki to ratou teina, ki a Peniamine; i mea, Kua hautopea atu tetahi iwi i tenei ra i roto i a Iharaira.
7
Me aha tatou ki etahi wahine ma nga mea o ratou i mahue; kua oatitia hoki a Ihowa e tatou e kore a tatou tamahine e hoatu e tatou hei wahine ma ratou?
8
Na, ka mea ano ratou, Ko tehea o nga iwi o Iharaira kahore nei i tae mai ki a Ihowa ki Mitipa? Na, kahore tetahi tangata o Iapehe-kireara i haere mai ki te puni ki te whakaminenga.
9
I tāua hoki te iwi, a kahore tetahi tangata i reira o nga tangata o Iapehe-kireara.
10
Na, ka tono te huihui i etahi tangata ki reira, kotahi tekau ma rua mano, he hunga toa, a ka whakahau i a ratou, ka mea, Tikina patua nga tangata o Iapehe-kireara ki te mata o te hoari, me nga wahine me nga tamariki.
11
A ko tenei ta koutou e mea ai, Ko nga tāne katoa, me nga wahine katoa i mohio, ara, i takoto ki te tāne, me huna e koutou.
12
A e wha rau nga kotiro i mau i a ratou i roto i nga tangata o Iapehe-kireara, he wahina kahore ano i mohio noa ki te tangata, ara, i takoto ki te tāne: na, kawea ana e ratou ki te puni ki Hiro, ki tera i te whenua o Kanaana.
13
Katahi ka unga tangata atu te huihui katoa hei korero atu ki nga tamariki a Peniamine i te teko i Kimono, hei karanga atu ki a ratou, Ka mau te rongo.
14
Na, ka hoki mai a Peniamine i taua wa; a ka homai ki a ratou nga wahine i whakaorangia e ratou i roto i nga wahine o Iapehe-kireara; otiia kihai ano i rato.
15
Heoi koingo tonu te iwi ki a Peniamine, no te mea kua wahia e Ihowa nga iwi o Iharaira.
16
Katahi ka mea nga kaumatua o te huihuinga, Me aha tatou ki etahi wahine ma nga mea i mahue, kua hunā nei hoki nga wahine a Peniamine?
17
I mea ano hoki ratou, Kia whai kāinga tupu nga morehu o Peniamine, kei moti rawa tetahi iwi i roto i a Iharaira.
18
Otiia e kore e taea te hoatu e tatou a tatou tamahine hei wahine ma ratou; no te mea kua oati nga tamariki a Iharaira, kua mea, Kia kangā te tangata e hoatu ana i te wahine ki a Peniamine.
19
Na, ka mea ratou, Nana, he hakari tena ki a Ihowa i Hiro, he mea whakarite i tenei tau, i tenei tau, i te taha te nota o Pete-ere, i te taha ki te rawhiti o te huarahi e tika atu ana i Pete-ere ki Hekeme, i te taha ki te tonga o Repona.
20
Na, ka whakahau atu ratou ki nga tamariki a Peniamine, ka mea, Haere ki nga mara waina whanga ai;
21
A e kite koutou, na, kua puta mai tena nga tamahine o Hiro ki te kanikani, na, ka haere atu koutou i nga mara waina, ka hopu i tana wahine, i tana wahine, i roto i nga tamahine o Hiro, a ka haere ki te whenua o Peniamine.
22
A ka tae mai o ratou mātua, o ratou tungane ranei, ki te korero i ta koutou he ki a matou, ko reira matou ka mea ai ki a ratou, Kia atawhai ki a matou, ara, ki a ratou: kihai hoki i riro i a matou he wahine ma tenei ma tenei o ratou i te mea e whawhai ana: ehara ano hoki i te mea na koutou i hoatu i tenei wa e he ai koutou.
23
Na, pera ana nga tamariki a Peniamine, a tangohia ana e ratou etahi wahine i roto i te hunga i kanikani ra; rite tonu ki a ratou te tokomaha, he mea hopu na ratou: a haere ana, noho ana ki to ratou kāinga tupu, kei te hanga o ratou pa, nohoia iho e ratou.
24
Katahi ka turia atu i reira i taua wa e nga tamariki a Iharaira ki tona iwi ki tona iwi, ki tona hapu ki tona hapu; heoi haere ana ratou i reira ki tona kāinga, ki tona kāinga.
25
I aua ra kahore o Iharaira kingi, ko ta ratou i mea ai ko nga mea i tika ki te titiro iho a tenei, a tenei.