- 1
- Atahi ka mea mai ki a ia nga tangata o Eperaima, He aha tenei mea i mea nei koe ki a matou, tē karangatia matou i tou haerenga atu ki te whawhai ki a Miriana? Na, nui atu ta ratou ngangau ki a ia.
- 2
- Na, ko tana meatanga atu ki a ratou, Ko tehea mahi aku inaianei hei rite mo ta koutou? He teka ianei pai atu te hamunga a Eperaima i te whawhakinga waina a Apietere?
- 3
- I homai e te Atua ki o koutou ringa nga rangatira o Miriana, a Orepe raua ko Teepe: a he aha te mea i taea e ahau hei rite mo ta koutou? Katahi ka iti haere ta ratou riri ki a ia i tana korerotanga i taua kupu.
- 4
- A haere mai ana a Kireono ki Horano, a whiti atu ana, ratou tahi ano ko ana tangata e toru nga rau; e ruhea ana, otiia me te whai ano.
- 5
- Na, ko taua meatanga atu ki nga tangata o Hukota, Homai etahi rohi taro ma te hunga e haere tahi nei matou, e hemo ana hoki ratou, a e whai ana ahau i a Tepa raua ko Taramuna i nga kingi o Miriana.
- 6
- Katahi ka mea mai nga rangatira o Hukota, Kei roto ianei tena i tou ringa nga ringa o Tepa raua ka Taramuna, e hoatu ai e matou he taro ma tou ope?
- 7
- Na, ko te meatanga atu a Kireono, Mo reira ka homai e Ihowa a Tepa raua ko Taramuna ki toku ringa, ka akina e ahau o koutou kikokiko ki nga tataramoa o te koraha, ki nga tumatakuru.
- 8
- Na, ka haere atu ia i reira ki runga ki Penuere, ka korerotia atu ko aua kupu ano; heoi, rite tonu ki ta nga tangata o Hukota i whakahoki mai ai ta nga tangata o Penuere i whakahoki mai ai ki a ia.
- 9
- Na, ka korero ano ia ki nga tangata o Penuere, ka mea, Ki te hoki ora mai ahau, ka wahia e ahau tenei pourewa.
- 10
- Na, i Karakoro a Tepa raua ko Taramuna, me a raua ope hoki, ki te whakaaro iho kotahi tekau ma rima nga mano, te hunga katoa i mahue o te ope katoa o nga tangata o te rawhiti: kotahi hoki te rau e rua tekau nga mano i hinga o te hunga unu hoari.
- 11
- Katahi ka haere a Kireono ki runga na te huarahi o te hunga noho teneti na te taha ki te rawhiti o Nopaha o Iokopeta a patua iho e ia te ope: e noho hu noa iho ana hoki te ope.
- 12
- Na, ka rere a Tepa raua ko Taramuna, a ka whaia e ia, ka mau nga kingi tokorua o Miriana a Tepa raua ka Taramuna, a whati ana i a ia te ope katoa.
- 13
- A i hoki mai a Kireono tama a Ioaha i te whawhai i te mea kahore nei i ara te ra.
- 14
- A hopukia ana e ia tetahi taitamariki o nga tangata o Hukota, a uia ana e ia: na, ka tuhituhia mai e tera nga rangatira o Hukota me nga kaumatua ano hoki o reira, e whitu tekau ma whitu nga tangata.
- 15
- Na, ko tona taenga mai ki nga tangata o Hukota, ka mea, Tenei a Tepa raua ko Taramuna i whakorekore ra koutou ki a au, i mea ra, Kei roto ranei tena i tou ringa nga ringa o Tepa raua ko Taramuna e hoatu ai e matou he taro ma o tangata e hemo na?
- 16
- Na, ka mau ia ki nga kaumatua o te pa, ki etahi tataramoa ano hoki o te koraha, ki etahi tumatakuru, a whakaakona ana e ia nga tangata o Hukota ki aua mea.
- 17
- I wahia iho hoki e ia te pourewa o Penuere, a patua iho nga tangata o taua pa.
- 18
- Katahi ia ka mea ki a Tepa raua ko Taramuna, He tangata pehea era i patua e korua ki Taporo? A ka mea mai raua, Ko koe ko ratou; rite tonu ki to nga tamariki a te kingi te ahua o tenei o tenei o ratou.
- 19
- Na, ko tana meatanga atu, Ko oku teina ratou, ko nga tama a toku whaea: e ora ana a Ihowa, me i whakaorangia era e korua, kihai ahau i patu i a korua.
- 20
- Katahi ia ka mea ki tana tamaiti matamua, ki a Ietere, Whakatika, patua raua. Heoi kihai taua tamaiti i unu i tana hoari: i wehi hoki; he tamariki hoki ia.
- 21
- Na, ka mea mai a Tepa raua ko Taramuna, Mau e whakatika, e rere ki runga i a maua; ko te tangata hoki ko tona kaha, rite tahi raua. Katahi ka whakatika atu a Kireono, a patua iho a Tepa raua ko Taramuna, tangohia mai ana hoki e ia nga heitiki i nga kaki o a raua kamera.
- 22
- Katahi ka mea mai nga tangata o Iharaira ki a Kireono, Hei kingi koe mo matou, a koe, to tamaiti, te tama hoki a to tamaiti: nau hoki matou i ora ai i te ringa o Miriana.
- 23
- Na, ko te meatanga atu a Kireono ki a ratou, Kaua ahau e waiho hei kingi mo koutou, kaua ano hoki taku tamaiti e waiho hei kingi mo koutou. Ko Ihowa hei kingi mo koutou.
- 24
- A i mea ano a Kireono ki a ratou, Me tono atu e ahau tetahi mea i a koutou; kia homai e koutou te whakakai o tona taonga parakete o tona taonga parakete. He whakakai koura hoki a ratou, no nga Ihimeeri hoki ratou.
- 25
- Na, ka mea mai ratou, Ae, me hoatu ano e matou. Na, ka wharikitia e ratou tetahi kakahu, a makā ana ki runga te whakakai o tona taonga parakete o tona taonga parakete.
- 26
- A kotahi mano e whitu rau nga hekere koura te taimaha o nga whakakai koura i tonoa e ia I tapiritia mai ano hoki ki nga heitiki ki nga poroporo, me nga kakahu papura o nga kingi o Miriana, ki nga mekameka ano hoki o nga kaki o nga kamera.
- 27
- Na, ka hangā e Kireono tetahi epora ki taua mea, a ka waiho ki tona pa ki Opora: na, ka whai atu a Iharaira katoa ki taua mea, ki reira puremu ai: a ka waiho hei rore mo Kireono ratou ko tona whare.
- 28
- Heoi hinga ana a Miriana i nga tamariki a Iharaira, kihai ano hoki i ara o ratou matenga i muri iho, Na, ka ata takoto te whenua, e wha tekau nga tau, nga ra hoki o Kireono.
- 29
- Na, ka haere a Ierupaara tama a Ioaha, a ka noho ki tona whare.
- 30
- A e whitu tekau nga tamariki a Kireono: he mea whanau mai i tona tinana: he tokomaha hoki ana wahine.
- 31
- Me tana wahine iti hoki i Hekeme, i whanau ano hoki tetahi tama ma raua; a huaina iho e ia tona ingoa ko Apimereke.
- 32
- Na, ka mate a Kireono tama a Ioaha; he pai hoki tona koroheketanga; a ka tanumia ki roto ki te rua o Ioaha o tona papa ki Opora o nga Apieteri.
- 33
- A, te matenga o Kireono, na, ka hoki nga tamariki a Iharaira, ka puremu ki nga Paara; a ka waiho a Paara-periti hei atua mo ratou.
- 34
- Kihai ano hoki nga tamariki a Iharaira i mahara ki a Ihowa ki to ratou Atua i whakaora nei i a ratou i te ringa o o ratou hoa riri katoa i tetahi taha i tetahi taha.
- 35
- Kihai ano hoki i puta to ratou aroha ki te whare o Ierupaara, ara, o Kireono; kihai i rite ki ana mahi pai katoa ki a Iharaira.
Address: 
Phone: 
Email: