Leviticus Chapter 14 - Paipera Tapu 1868 | Te Paipera Tapu 1868

Leviticus Chapter 14 - Paipera Tapu 1868

1
A i korero ano a Ihowa ki a Mohi, i mea,
2
Ko te ture tenei mo te repara i te ra e purea ai ia; Me kawe mai ia ki te tohunga:
3
A ka haere atu te tohunga ki waho o te puni, a ka titiro te tohunga, a ki te mea kua ora te repara i pa ki taua tangata i reparatia;
4
Katahi ka whakahau atu te tohunga kia tikina ma te tangata e purea ana, kia rua nga manu, ki nga mea ora, ki nga mea poke-kore, me te rakau hita, me te ngangana, me te hihopa:
5
A ka whakahau te tohunga kia patua tetahi o nga manu ki roto ki tetahi oko oneone, ki runga i te wai ora:
6
Na, ka mau ia ki te manu ora, me te rakau hita, me te ngangana, me te hihopa, a ka toua tahitia me te manu ora ki te toto o te manu i patua ki runga i te wai ora:
7
A kia whitu ana tauhiuhinga atu te tangata e purea mai ana i te repara, a ka kiia he poke-kore, a ka tukua atu te manu ora ki te mata o te parae.
8
A me horoi ona kakahu e te tangata e purea ana, me heu katoa hoki ona huruhuru; ka horoi ano hoki i a ia ki te wai, kia kore ai ona poke: a, muri iho ka haere mai ia ki te puni; otiia kia whitu nga ra e noho ai ia i waho i tona teneti.
9
Na, i te whitu o nga ra, me heu katoa e ia ona huruhuru o tona mātenga, me tona pahau, me ona tukemata; ona huruhuru katoa hoki, me heu atu e ia; me horoi hoki e ia ona kakahu, me horoi ano hoki ona kikokiko ki te wai, a ka kore ona poke.
10
A i te waru o nga ra me tiki e ia nga reme toa e rua, i nga mea koha-kore, me tetahi atu reme, ki te uha, ki te tau-tahi, ki te koha-kore, kia toru hoki nga wahi whakatekau o te paraoa hei whakahere toto-kore, ki te mea i konatunatua ki te hinu, kia kotahi hoki te roko hinu.
11
A ma te tohunga, ma te kai pure, e whakatu te tangata, e purea ana, me aua mea hoki, ki te aroaro o Ihowa, ki te whatitoka o te tapenakara o te whakaminenga:
12
Na, ka mau te tohunga ki tetahi o nga reme toa, a ka whakaherea hei whakahere mo te he, me te roko hinu hoki, a ka poipoia hei whakahere poipoi ki te aroaro o Ihowa:
13
Me patu ano e ia te reme ki te wahi e patua ai e ia te whakahere hara me te tahunga tinana, ki te wahi tapu: ma te tohunga hoki te whakahere hara, mana ano hoki te whakahere mo te he: he mea tino tapu tena:
14
Na, ka mau te tohunga ki tetahi wahi o te toto o te whakahere mo te he, a ka pania atu e te tohunga ki te matamata o te taringa matau o te tangata e purea ana, ki te koromatua hoki o tona ringa matau, ki te koromatua ano hoki o tona waewae matau:
15
Na, ka mau te tohunga ki tetahi wahi o te roko hinu, a ka ringitia ki te kapu o tona ake ringa maui:
16
A ka toua e te tohunga tona maihao matau ki te hinu i tona ringa maui, a kia whitu ana tauhiuhinga atu i te hinu ki tona maihao, ki te aroaro o Ihowa:
17
A me pani atu e te tohunga tetahi wahi o te toenga o te hinu i tona ringa ki te matamata o te taringa matau o te tangata e purea ana, ki te koromatua hoki o tona ringa matau, ki te koromatua ano hoki o tona waewae matau, ki runga i te toto o te whakahere mo te he:
18
A ko te toenga iho o te hinu i te ringa o te tohunga, me mea atu e ia ki runga ki te mātenga o te tangata e purea ana: a ka mea whakamarietanga te tohunga mona ki te aroaro o Ihowa.
19
A ka whakaherea e te tohunga te whakahere hara, ka mea whakamarietanga hoki mo te tangata e purea atu ana tona poke; a, muri iho ka patua e ia te tahunga tinana:
20
A ka whakaekea atu te tahunga tinana me te whakahere toto-kore e te tohunga ki runga ki te aata: a ka mea whakamarietanga te tohunga mona, a ka kore ona poke.
21
A ki te mea he rawa-kore ia, a e kore ena mea e taea e ia; katahi ka tikina e ia, kia kotahi reme hei whakahere mo te he, hei mea poipoi, hei whakamarietanga mona, kia kotahi ano hoki te wahi whakatekau paraoa, ki te mea i konatunatua ki te hinu hei whakahere toto-kore, me tetahi roko hinu;
22
Me etahi kukupa kia rua, etahi pi kukupa ranei kia rua, nga mea hoki e taea atu e tona ringa; a ko tetahi hei whakahere hara, ko tetahi hoki hei tahunga tinana.
23
A me kawe mai e ia aua mea i te waru o nga ra ki te tohunga hei purenga mona, ki te whatitoka o te tapenakara o te whakaminenga, ki te aroaro o Ihowa.
24
Na, ka mau te tohunga ki te reme mo te whakahere mo te he, me te roko hinu, a ka poipoia e te tohunga hei whakahere poipoi ki te aroaro o Ihowa.
25
A ka patua e ia te reme e whakaherea ana mo te he, a ka tango te tohunga i tetahi wahi o te toto o te whakahere mo te he, ka pani atu ai ki te matamata o te taringa matau o te tangata e purea ana, ki te koromatua hoki o tona ringa matau, ki te koromatua ano hoki o tona waewae matau:
26
A ka ringitia e te tohunga tetahi wahi o te hinu ki te kapu o tona ake ringa maui:
27
A ka tauhiuhia e te tohunga ki tona maihao matau tetahi wahi o te hinu i tona ringa maui, kia whitu nga meatanga ki te aroaro o Ihowa:
28
A ka pania atu e te tohunga tetahi wahi o te hinu i tona ringa ki te matamata o te taringa matau o te tangata e purea ana, ki te koromatua hoki o tona ringa matau, ki te koromatua ano hoki o tona waewae matau, ki te wahi i te toto o te whakahere mo te he:
29
A ko te toenga o te hinu i te ringa o te tohunga me mea atu e ia ki te mātenga o te tangata e purea ana, hei mea whakamarietanga mona ki te aroaro o Ihowa.
30
A me whakahere atu e ia tetahi o nga kukupa, o nga pi kukupa ranei, o nga mea hoki i taea atu e tona ringa;
31
Ae ra, o nga mea i taea atu e tona ringa, ko tetahi hei whakahere hara, ko tetahi hei tahunga tinana, me te whakahere toto-kore hoki: a ka mea whakamarietanga te tohunga mo te tangata e purea ana, ki te aroaro o Ihowa.
32
Ko te ture tenei mo te tangata i pangia e te repara, e kore nei e taea e tona ringa nga mea mo tono purenga.
33
A i korero ano a Ihowa ki a Mohi raua ko Arona, i mea,
34
E tae koutou ki te whenua o Kanaana e hoatu nei e ahau hei kainga tupu mo koutou, a ka whakapangia atu e ahau te repara ki tetahi whare o te whenua e nohoia e koutou;
35
A ka haere mai te tangata nona te whare, ka korero ki te tohunga, ka mea, Ki taku titiro iho, me te mea kua pangia te whare:
36
Na, ka whakahau te tohunga kia whakawateatia te whare, i te mea kahore ano te tohunga i haere noa kia kite i te mea i pa mai; kei poke nga mea katoa o roto o te whare; a, ka oti, ka haere te tohunga kia kite i te whare:
37
Na, ka tirohia iho e ia te mea i pa mai, a ki te mea kua pangia nga taha o te whare, a kua whai koputaputa he mea ma-kakariki, tuawhero ranei, a ki te titiro atu kua ngoto atu ki roto ki te taha;
38
Katahi ka puta mai te tohunga ki waho o te whare ki te kuwaha o te whare, a ka tutakina atu te whare, kia whitu nga ra:
39
A ka haere mai ano te tohunga i te whitu o nga ra, a ka titiro; a ki te mea kua horapa atu ki nga taha o te whare te mea i pa mai:
40
Katahi ka whakahau te tohunga kia tangohia nga kohatu i pangia, kia makā hoki ki te wahi poke ki waho o te pa:
41
A ka mea ano ia kia waruhia a roto o te whare, a taka noa, a me riringi atu e ratou te puehu i waruhia e ratou ki waho o te pa, ki te wahi poke:
42
A ka tikina atu ano e ratou etahi atu kohatu, ka whakanoho atu ai ki te wahi o aua kohatu; me tiki ano e ia he moata ke, ka pani atu ai ki te whare.
43
A ki te hoki mai te mea i pa mai, a ka tupu ano ki te whare i muri iho i tana tangohanga i nga kohatu, i tana waruhanga hoki i te whare, i te paninga atu hoki;
44
Na, ka haere mai te tohunga, a ka titiro; a ki te mea kua horapa atu ki te whare te mea i pa mai, he repara ngau kino to te whare: e poke ana.
45
Na, ka wawahi iho ia i te whare, i ona kohatu, me nga rakau, me te moata katoa o te whare: a ka kawea atu ki waho o te pa ki te wahi poke.
46
Ki te haere hoki tetahi ki roto ki te whare, i te mea e tutaki ana, ka poke ia, a, ahiahi noa.
47
Ki te takoto hoki tetahi ki roto i te whare, me horoi e ia ona kakahu: ki te kai ano hoki tetahi ki roto i te whare, me horoi ano e ia ona kakahu.
48
A ki te haere te tohunga ki roto, a ka titiro atu, a kihai i horapa ki te whare te mea i pa mai, i muri iho i te paninga o te whare: na, ka kiia e te tohunga he poke-kore te whare, no te mea kua kore taua mea i pa mai ra.
49
A ka tikina e ia etahi manu, kia rua, hei horohoro mo te whare, me te rakau hita, me te ngangana, me te hihopa:
50
A ka patua e ia tetahi o nga manu ki roto ki te oko oneone, ki runga i te wai ora.
51
Na, ka mau ia ki te rakau hita, ki te hihopa, ki te ngangana, me te manu ora, ka tou ai ki te toto o te manu i patua, ki te wai ora hoki, na, kia whitu ana tauhiuhinga atu ki te whare:
52
A ka horohoroa e ia te whare ki te toto o te manu, ki te wai ora hoki, ki te manu ora, ki te rakau hita, ki te hihopa, me te ngangana;
53
A ka tukua atu te manu ora ki waho o te pa, ki te mata o te parae, a ka meinga he whakamarietanga mo te whare: a ka kore ona poke.
54
Ko te ture tenei mo nga pānga katoatanga mai o te repara, mo te patito hoki,
55
Mo te repara hoki o te kakahu, o te whare,
56
Mo te puku, mo te paku, mo te wahi tua-kanapa nei:
57
Hei whakaatu ko ahea poke ai, ko ahea poke-kore ai: ko te ture tenei mo te repara.