- 1
- A i korero ano a Ihowa ki a Mohi, i mea,
- 2
- Me korero ano koe ki nga tamariki a Iharaira, Ahakoa no nga tamariki a Iharaira, no te manene ranei e noho ana i a Iharaira, te tangata i hoatu e ia tona uri ki a Moreke, ina, me whakamate ia: me aki e nga tangata whenua ki te kohatu.
- 3
- Ka u atu ano hoki toku mata ki taua tangata, a ka hatepea atu e ahau i roto i tona iwi; mona i hoatu i tona uri ki a Moreke, whakapoke ai i toku wahi tapu, whakanoa ai hoki i toku ingoa tapu.
- 4
- A ki te hunā e nga tangata whenua o ratou kanohi, kei kite i taua tangata, ina hoatu e ia tona uri ki a Moreke, a e kore e whakamate i a ia;
- 5
- Ko reira u atu ai toku mata ki taua tangata, ki ona whanaunga hoki, a ka hatepea atu e ahau i roto i to ratou iwi, a ia, me nga tangata katoa e whai ana i a ia, puremu atu ai, puremu ai ki a Moreke.
- 6
- Ki te tahuri ano tetahi wairua ki nga waka atua, ki nga mata maori, whai atu ai, puremu atu ai ki a ratou, ka u atu ano toku mata ki taua wairua, a ka hatepea atu i roto i tona iwi.
- 7
- Engari whakatapua koutou, kia tapu ano hoki: ko Ihowa hoki ahau ko to koutou Atua.
- 8
- A kia mau ki aku tikanga, me mahi ano hoki: ko Ihowa ahau e whakatapu nei i a koutou.
- 9
- No te mea hoki ki te kangā e tetahi tangata tona papa, tona whaea ranei, me whakamate rawa: kua kangā e ia tona papa, tona whaea ranei; ko runga ano i a ia ona toto.
- 10
- A ki te puremu tetahi tangata ki te wahine a te tangata, me whakamate rawa te kai puremu ki te wahine a tona hoa, te kai puremu raua ko te wahine i puremutia.
- 11
- Me te tangata hoki i takoto ki te wahine a tona papa, kua hurahia e ia tona papa kia takoto tahanga: me whakamate raua tokorua; ko runga i a raua o raua toto.
- 12
- Ki te takoto hoki te tangata ki tana hunaonga wahine, me whakamate rawa raua tokorua: he mahi anuanu ta raua; ko runga i a raua o raua toto.
- 13
- Ki te takoto hoki he tangata ki a raua whakatene ki te pera me te takotoranga ki te wahine, he mahi whakarihariha ta raua, me whakamate rawa raua; ko runga i a raua o raua toto.
- 14
- Ki te tango hoki te tangata i te wahine raua ko tona whaea, he mea kino tena: me tahu ratou ki te ahi, te tane me nga wahine: kei whai kino koutou i roto i a koutou.
- 15
- Ki te takoto hoki he tangata ki te kararehe, me whakamate rawa ia: me whakamate ano hoki e koutou te kararehe.
- 16
- Ki te whakatata hoki he wahine ki tetahi kararehe, a ka takoto ki a ia, me whakamate e koe te wahine raua ko te kararehe: me whakamate rawa raua; ko runga i a raua o raua toto.
- 17
- Ki te tango hoki te tangata i tona tuahine, i te tamahine a tona papa, i te tamahine ranei a tona whaea, a ka kite i a ia e takoto tahanga ana, a ka kite ano te wahine i a ia e takoto tahanga ana: he mea kino tena; a ka hatepea atu raua i te tirohanga a to raua iwi: nana hoki i hura tona tuahine kia takoto tahanga; ka wahā e ia tona kino.
- 18
- Ki te takoto hoki te tangata ki te wahine i a ia e paheke ana, a ka hura i a ia kia takoto tahanga; kua takoto kau i a ia tona puna, kua whakaaturia ano e te wahine te puna o ona toto: a ka hatepea atu raua i roto i to raua iwi.
- 19
- Kaua ano hoki e hurahia kia takoto tahanga te teina, te tuakana ranei o tou whaea, te tuahine ranei o tou papa: e hurahia ana hoki e ia tona whanaunga tupu: ka wahā e raua to raua kino.
- 20
- Ki te takoto hoki he tangata ki te wahine a tona matua keke, kua hurahia e ia kia takoto tahanga tona matua keke: ka wahā e raua to raua hara: ka mate uri-kore raua.
- 21
- Ki te tango hoki te tangata i te wahine a tona tuakana, teina ranei, he mea poke tena: kua hurahia e ia tona tuakana, teina ranei, kia takoto tahanga; e kore raua e whai tamariki.
- 22
- Engari kia mau ki aku tikanga katoa me aku whakariteritenga katoa, me mahi ano hoki: kei ruakina atu koutou e te whenua ka kawea atu nei koutou e ahau ki reira noho ai.
- 23
- Kaua ano koutou e haere i runga i nga ritenga o te iwi ka peia nei e ahau i to koutou aroaro: na ratou hoki enei mahi katoa, koia i whakarihariha ai ahau ki a ratou.
- 24
- I mea ai hoki ki a koutou, Ka riro mai to ratou whenua i a koutou, ka hoatu hoki e ahau ki a koutou hei kāinga pumau, he whenua a rerengia ana e te waiu, e te honi: ko Ihowa ahau ko to koutou Atua, nana nei koutou i wehe mai i roto i nga iwi.
- 25
- Mo reira me wehe ke e koutou nga kararehe poke-kore me nga mea poke, nga manu hoki, nga mea poke, me nga mea poke-kore: kaua ano hoki e waiho hei whakaanuanutanga mo o koutou wairua tetahi kararehe, manu ranei, tetahi mea ranei e ngoki ana i te whenua, o nga mea i wehea atu e ahau i a koutou hei mea poke.
- 26
- A ka tapu koutou ki a au: no te mea e tapu ana ahau a Ihowa, a kua wehea mai ano koutou e ahau i roto i nga iwi, kia waiho maku.
- 27
- Me whakamate rawa ano hoki te tangata, te wahine ranei, he atua maori tona; me te mata maori hoki: me aki raua ki te kohatu: ko runga i a raua o raua toto.
Address: 
Phone: 
Email: