- 1
- A i korero ano a Ihowa ki a Mohi, i mea,
- 2
- Korero atu ki a Arona, ratou ko ana tama, kia wehea atu ratou i nga mea tapu a nga tamariki a Iharaira, kei whakanoatia hoki e ratou toku ingoa tapu ki nga mea e whakatapua ana e ratou maku: ko Ihowa ahau.
- 3
- Mea atu ki a ratou, Ki te whakatata mai tetahi o o koutou uri katoa, puta noa i o koutou whakatupuranga, ki nga mea tapu e whakatapua ana e nga tamariki a Iharaira ma Ihowa, me te mau ano tona poke, ka hatepea atu taua wairua i toku aroaro: ko Ihowa ahau.
- 4
- Ki te mea he repara tetahi o nga uri o Arona, ki te mea ranei he rere tona; kei kainga e ia nga mea tapu; kia kore ra ano ona poke. Ki te pa hoki tetahi ki te mea i poke i te tupapaku, ki te tangata ranei kua paheke atu tona purapura moenga;
- 5
- Ki te pa ranei tetahi ki te mea ngoki, e poke ai ia, ki te tangata ranei e poke ai ia, ahakoa he aha ranei he aha ranei tona poke;
- 6
- Ka poke, a, ahiahi noa, te tangata i pa ki taua mea, kaua ano hoki ia e kai i nga mea tapu, ki te kahore i horoia e ia tona kikokiko ki te wai.
- 7
- A ka to te ra, ka kore ona poke, a muri iho ka kai i nga mea tapu; no te mea ko tana kai tena:
- 8
- He mea mate maori, i haea ranei e te kirehe, kaua tena e kainga e ia, kei poke: ko Ihowa ahau.
- 9
- Ina, kia mau ratou ki taku i whakariterite ai, kei whai hara ratou i taua mea, a ka mate ki te whakanoatia e ratou: ko Ihowa ahau te whakatapu nei i a ratou.
- 10
- Kaua tetahi manene e kai i te mea tapu: kaua te tangata e noho ana ki te tohunga, te kai mahi ranei e kai i te mea tapu.
- 11
- Otiia ki te hokona tetahi tangata e te tohunga ki tana moni, e kai ano ia, me te tangata ano i whanau ki tona whare: e kai ano raua i tana kai.
- 12
- Ki te mea hoki kua marenatia te tamahine a te tohunga ki te tangata ke, kaua ia e kai i nga mea i whakaherea o nga mea tapu.
- 13
- Otiia ki te mea he pouaru te tamahine a te tohunga, i whakarerea atu ranei, a kahore ana tamariki, kua hoki mai ano hoki ki te whare o tona papa, kua pera me ia i tona taitamahinetanga, e kainga ano e ia te kai a tona papa; kaua ia te tangata ke e kai i tena mea.
- 14
- A ki te kai pohehe te tangata i te mea tapu, me tapiri mai e ia te wahi whakarima o taua mea, a ka homai tahi mai me te mea tapu ki te tohunga.
- 15
- Kei whakanoatia e ratou nga mea tapu a nga tamariki a Iharaira, e whakaherea ana e ratou ma Ihowa;
- 16
- Kei whakawahā hoki ratou ki te kino o te he, ina kainga e ratou a ratou mea tapu: ko au nei hoki ko Ihowa to ratou kai whakatapu.
- 17
- A i korero ano a Ihowa ki a Mohi, i mea,
- 18
- Korero atu ki a Arona, ratou ko ana tama, ki nga tamariki katoa ano hoki a Iharaira, mea atu ki a ratou, Ahakoa he aha te tangata o te whare o Iharaira, o nga manene ranei i roto i a Iharaira, e mea ana ki te kawe mai i tana whakahere, he ki taurangi hoki nana, he whakahere tuku noa ranei nana, he mea e whakaherea ana e ratou ma Ihowa hei tahunga tinana;
- 19
- Hei te tane koha-kore, kia manakohia ai koutou, no roto i nga kau, i nga hipi ranei, i nga koati ranei.
- 20
- Kaua rawa ia e whakaherea tetahi mea he koha tona: no te mea e kore e manakohia hei mea ma koutou.
- 21
- Ki te whakaherea ano hoki e tetahi he patunga hei whakamarietanga ki a Ihowa, hei whakamana mo te ki taurangi, hei whakahere noa ake ranei, he kau, he hipi ranei, hei te mea koha-kore, kia manakohia ai: kei whai koha taua mea.
- 22
- He mea matapo, he whati, he kopa, he mea whai puku, he papaka, he mea hakihaki ranei, kaua ena e whakaherea ma Ihowa, kaua ano hoki e homai hei whakahere ahi ki runga ki te aata ma Ihowa.
- 23
- Na, he puru, he reme ranei, e hira ake ana, kua kore ranei, tetahi wahi ona, e whakaherea ano tena e koe hei whakahere noa ake; otiia e kore e manakohia mo te ki taurangi.
- 24
- Kaua e whakaherea e koutou ma Ihowa te mea i romia, te mea ranei i kurua, i unuhia ranei, i pokaia ranei; kaua ano hoki ena mea e meatia ki to koutou whenua.
- 25
- Kaua ano hoki tetahi o enei e whakaherea e koutou hei kai ma to koutou Atua, ina homai e te tangata iwi ke; kei roto hoki i a ratou te mea whakahe mo ratou, e whai koha ana hoki ratou: e kore enei e manakohia hei mea ma koutou.
- 26
- A i korero ano a Ihowa ki a Mohi, i mea,
- 27
- Ka whanau he kau, he hipi, he koati ranei, kia whitu nga ra e waiho ai ki tona whaea; a i te waru o nga ra, i o muri iho hoki, ka manakohia hei whakahere ahi ma Ihowa.
- 28
- Otiia ahakoa he kau, he hipi ranei, kaua raua ko tana kuao e patua i te rangi kotahi.
- 29
- Ka patua ano hoki e koutou he patunga whakawhetainga ki a Ihowa, hei te patunga e manakohia ai koutou.
- 30
- Me kai i taua rangi ano; kaua e waiho tetahi wahi ki te ata: ko Ihowa ahau.
- 31
- Na, kia mau ki aku whakahaunga, mahia hoki; ko Ihowa ahau.
- 32
- Kaua ano hoki e whakanoatia e koutou toku ingoa tapu; engari me whakatapu ahau i roto i nga tamariki a Iharaira: ko Ihowa ahau te whakatapu nei i a koutou,
- 33
- I whakaputa mai nei hoki i a koutou i te whenua o Ihipa, kia waiho ai hei Atua mo koutou: ko Ihowa ahau.
Address: 
Phone: 
Email: