- 1
- A i korero ano a Ihowa ki a Mohi, i mea,
- 2
- Whakahaua atu nga tamariki a Iharaira kia kawea mai e ratou ki a koe he hinu oriwa, ki te mea para-kore, ki te mea i tukia, mo te whakamārama, kia ka tonu ai nga rama.
- 3
- Me whakapai tonu tena mea e Arona ki waho mai o te arai o te whakaaturanga, i roto i te tapenakara o te whakaminenga, ki te aroaro o Ihowa i te ahiahi a tae noa ki te ata: hei tikanga tenei mo ake tonu atu, puta noa i o koutou whakatupuranga.
- 4
- Me whakapai tonu e ia nga rama i runga i te turanga para-kore o nga rama ki te aroaro o Ihowa.
- 5
- Me tiki ano hoki e koe he paraoa, ka tunu ai i nga keke kotahi tekau ma rua o taua mea: kia rua nga whakatekau ki te keke kotahi.
- 6
- Ka whakatakoto ai e koe, kia rua nga rarangi, kia ono ki te rarangi kotahi, ki runga ki te tepara para-kore i te aroaro o Ihowa.
- 7
- Me maka ano hoki e koe he parakihe para-kore ki runga i tetahi rarangi i tetahi rarangi, kia ai taua mea i runga i te taro hei whakamaharatanga, hei whakahere ahi hoki ki a Ihowa.
- 8
- Me whakararangi tonu e ia, i tenei hapati i tenei hapati, ki te aroaro o Ihowa, he mea na nga tamariki a Iharaira; hei kawenata tenei mo ake tonu atu.
- 9
- A ma Arona, ratou ko ana tama, tena mea; me kai hoki e ratou ki te wahi tapu; he tino tapu hoki tena mana i roto i nga whakahere ahi a Ihowa; hei tikanga tenei mo ake tonu atu.
- 10
- A i haere atu i roto i nga tamariki a Iharaira tetahi tama a tetahi wahine o Iharaira, ko tona papa no Ihipa: na, ka whawhai tenei tama a te wahine o Iharaira ki tetahi tangata o Iharaira i roto i te puni;
- 11
- Na, ka kohukohua te ingoa o Ihowa e te tama a te wahine o Iharaira, ka kanga hoki. A kawea mai ana ia e ratou ki a Mohi: (a ko Heromiti te ingoa o tona whaea, he tamahine ia na Tipiri, no te iwi o Rana:)
- 12
- Na, ka hoatu ia e ratou kia tiakina, kia whakaaturia mai ra ano ki a ratou te whakaaro a Ihowa.
- 13
- Na, ka korero mai a Ihowa ki a Mohi, ka mea,
- 14
- Kawea atu ki waho o te puni te tangata i kanga ra; a kia popoki ki runga ki tona mātenga nga ringaringa o nga tangata katoa i rongo ki a ia, ka aki ai te whakaminenga katoa i a ia ki te kohatu.
- 15
- Me korero atu ano e koe ki nga tamariki a Iharaira, ka mea atu, Ki te kanga tetahi tangata i tona Atua, ka wahā e ia tona hara.
- 16
- Ki te kohukohua hoki te ingoa o Ihowa e tetahi tangata, ka tino whakamatea ia, me tino aki ia e te whakaminenga katoa ki te kohatu: ko te manene raua tahi ko te tangata whenua ka whakamatea, ina kohukohua e ia te ingoa o Ihowa.
- 17
- Ki te whakamate hoki tetahi i tetahi tangata me tino whakamate ano ia.
- 18
- Ki te whakamate hoki tetahi i te kararehe, me utu e ia; he kararehe mo te kararehe.
- 19
- Ki te mate hoki i te tangata tetahi wahi o tona hoa; me mea ki a ia tana i mea ai:
- 20
- He whati mo te whati, he kanohi mo te kanohi, he niho mo te niho: te mate i meatia e ia ki te tangata, me mea ano ki a ia.
- 21
- Ki te whakamate hoki tetahi i te kararehe, me utu e ia: ki te whakamate hoki tetahi i te tangata, me whakamate ano ia.
- 22
- Kia kotahi ano ta koutou whakarite whakawa mo te manene, mo te tangata whenua: ko Ihowa hoki ahau ko to koutou Atua.
- 23
- Na, ka korero atu a Mohi ki nga tamariki a Iharaira, kia kawea atu ki waho o te puni te tangata nana te kanga, kia akina hoki ki te kamaka. A meatia ana e nga tamariki a Iharaira ta Ihowa i whakahau ai ki a Mohi.
Address: 
Phone: 
Email: