- 1
- A i korero ano a Ihowa ki a Mohi i Maunga Hinai, i mea,
- 2
- Korero atu ki nga tamariki a Iharaira, mea atu ki a ratou, E tae koutou ki te whenua e hoatu e ahau ki a koutou, na, ka whakahapati te whenua i tetahi hapati ki a Ihowa.
- 3
- E ono nga tau e whakatongia ai e koe to mara, e ono hoki nga tau e tapatapahia ai e koe to mara waina, e kohia ai hoki ona hua;
- 4
- Ko te whitu ia o nga tau hei hapati okiokinga mo te whenua, hei hapati ki a Ihowa: kaua e whakatongia e koe to mara, e tapatapahia hoki to mara waina.
- 5
- Kaua e kotia te mea i tupu noa ake i tera kotinga au, kaua ano hoki e whakiia nga karepe o to waina kihai nei i mahia: he tau okiokinga hoki tena mo te whenua.
- 6
- A hei kai ano ma koutou te hapati o te whenua; mau, ma to pononga tane, ma to pononga wahine, ma to kai mahi, ma to manene hoki e noho ana i a koe,
- 7
- Ma o kararehe hoki, ma te kirehe hoki o tou whenua, nga hua katoa o reira, hei kai.
- 8
- A me tatau ano e koe kia whitu nga tau hapati, kia whitu nga whitu o nga tau; a ko taua takiwa, ko nga tau hapati e whitu, ka kiia e koe e wha tekau ma iwa tau.
- 9
- Katahi ka whakatangihia e koe te tetere tangi nui i te tekau o nga ra o te whitu o nga marama, ko a te ra whakamarietanga mea ai koutou kia paku atu te tangi o te tetere, puta noa i to koutou whenua.
- 10
- A me whakatapu e koutou te rima tekau o nga tau, ka karanga ai i te haere noa puta noa atu i te whenua katoa ma nga tangata katoa o reira: hei iupiri nui tena ma koutou; a me hoki koutou ki tona kāinga ki tona kāinga, me hoki ano ki ona whanaunga ki ona whanaunga.
- 11
- Ko tena tau, ko te rima tekau, hei iupiri ma koutou: kaua e rui, kaua ano hoki e kokoti i te mea tupu noa ake o tena tau, kaua ano hoki e whakiia nga waina kihai nei i mahia.
- 12
- Ko te iupiri hoki ia; kia tapu ki a koutou; me kai e koutou ona hua, nga mea hoki o te mara.
- 13
- Me hoki koutou i tenei tau iupiri, ki tona kāinga ki tona kāinga.
- 14
- Ki te hokona atu ano hoki e koe tetahi mea ki tou hoa, ki te hokona mai ranei tetahi mea e te ringa o tou hoa, kaua e tukinotia tetahi e tetahi:
- 15
- Kia rite au utu ki tou hoa ki te maha o nga tau i muri iho i te iupiri; kia rite ano hoki ki te maha o nga tau hua tana hokonga ki a koe:
- 16
- Kia rite ki te maha o nga tau to whakanuinga i te utu o taua mea, kia rite hoki ki te torutoru o nga tau to whakaitinga i ona utu: i whakaaro hoki ia ki te maha o nga tau hua i tana hokonga ai ki a koe.
- 17
- Ae ra, kaua koutou e tukino ki tetahi ki tetahi, engari me wehi koe ki tou Atua: ko Ihowa hoki ahau ko to koutou Atua.
- 18
- Mo reira me mahi e koutou aku tikanga, me pupuru aku whakariteritenga, me mahi hoki; a ka noho koutou i runga i te whenua rangatira,
- 19
- A ka tukua mai ona hua e te whenua, a ka kai koutou, ka makona, ka noho humarie hoki ki reira.
- 20
- A ki te mea koutou, He aha he kai ma tatou i te whitu o nga tau? titiro hoki, e kore tatou e rui, e kore hoki e kohi i a tatou hua:
- 21
- Maku ra e whakahau iho taku manaakitanga ki runga ki a koutou i te ono o nga tau, a ka whai hua mo nga tau e toru.
- 22
- A ka rui koutou i te waru o nga tau, ka kai ano i nga hua pakoko, a tae noa ki te iwa o nga tau, me kai e koutou nga mea pakoko, kia riro mai ra ano nga hua o tena tau.
- 23
- Kaua e hokona te whenua, he mea oti tonu atu; noku hoki te whenua, he manene hoki koutou, he noho noa ki a au.
- 24
- Me whakaae ano hoki koutou ki te utu e hoki mai ai te whenua, puta noa atu i te whenua e nohoia ana e koutou.
- 25
- Ki te mea kua rawa-kore tou teina, a kua hokona e ia tetahi wahi o tona kāinga, a ki te haere mai tetahi o ona whanaunga ki te utu kia hoki mai ai, na, me utu e ia te mea i hokona atu e tona teina.
- 26
- A ki te kahore he kai hoko a taua tangata, a e taea ano e ia te utu;
- 27
- Na, me tatau e ia nga tau i hokona ai, a ka whakahokia nga toenga iho ki te tangata nana i hoko; ka hoki ai ki tona kāinga.
- 28
- Otiia ki te kahore e taea e ia te whakahoki ki a ia, na me waiho tana i hoko ai ki te ringa o te tangata nana i hoko, a tae noa ki te tau iupiri: a i te iupiri ka riro mai, a ka hoki ia ki tona kāinga.
- 29
- Ki te hokona hoki e te tangata tetahi whare nohoanga i roto i te pa taiepa, e whai hokinga mai ano, a tino taka noa he tau i muri iho i tona rironga; kotahi tino tau hei whakahokinga mai mo taua whare.
- 30
- A ki te kahore e utua, a tino taka noa te tau, katahi ka whakapumautia mo ake tonu atu te whare i roto i te pa taiepa mo te tangata nana i hoko, puta noa i ona whakatupuranga: e kore e riro mai i te iupiri.
- 31
- Ko nga whare ia o nga kāinga koraha, kahore nei he taiepa a, tawhio noa, ka kiia e rite ana ki nga parae o te whenua: ka hoki ano ena ina utua, ka riro atu ano i te iupiri.
- 32
- Ko nga pa ia o nga Riwaiti, me nga whare o nga pa e nohoia ana e ratou, e hoki mai ki nga Riwaiti, ina utua i nga wa katoa.
- 33
- Ki te hokona ano hoki e te tangata tetahi mea a nga Riwaiti, ka riro mai ano te whare i hokona, te pa ranei i nohoia e ia, i te iupiri: he kāinga pumau hoki mo ratou i roto i nga tamariki a Iharaira nga whare o nga pa o nga Riwaiti.
- 34
- Ko te mara ia i te taha o o ratou pa kaua e hokona; no te mea he kāinga pumau tonu iho tena no ratou.
- 35
- A ki te rawa-koretia tou teina, a ka wiri tona ringa i roto i a koe; na, me atawhai ia e koe, ahakoa manene, noho-noa ranei; kia ora ai ia i roto i a koe.
- 36
- Kaua e tangohia i a ia he moni whakatuputupu, he whakanuinga ranei; engari me wehi koe ki tou Atua; kia ora ai tou teina i roto i a koe.
- 37
- Kaua to moni e hoatu ki a ia hei mea whakatuputupu, kaua ano hoki o kai e hoatu ki a ia, me te whakaaro ano ki tetahi whakanuinga ake.
- 38
- Ko Ihowa ahau ko to koutou Atua, i whakaputaina mai ai koutou i te whenua o Ihipa, kia hoatu ai ki a koutou te whenua o Kanaana, moku hoki kia waiho hei Atua mo koutou.
- 39
- A ki te rawa-koretia tou teina, e noho ana i roto i a koe, a ka hokona ki a koe; kaua ia e whakamahia e koe ki te mahi pononga;
- 40
- Kia rite ia i roto i a koe ki te kai mahi, ki te noho-noa, ka mahi ano ia ki a koe, a tae noa ki te tau iupiri:
- 41
- Ko reira ia mawehe atu ai i a koe, ratou tahi ano ko ana tamariki, a ka hoki ki ona whanaunga, ka hoki ano ki te kāinga o ona mātua.
- 42
- He pononga hoki ratou naku, naku ano hoki ratou i whakaputa mai i te whenua o Ihipa; kaua ratou e hokona hei pononga.
- 43
- Kei whakatupu rangatira nanakia koe ki a ia; engari me wehi ki tou Atua.
- 44
- Kei nga iwi i tetahi taha ou i tetahi taha he pononga tane, he pononga wahine mau; me hoko etahi o ratou hei pononga tane, hei pononga wahine.
- 45
- Ma koutou ano hoki e hoko etahi o nga tamariki a nga manene e noho ana i roto i a koutou, etahi hoki o roto o o ratou hapu i roto i a koutou, o nga mea i whanau i a ratou ki to koutou whenua: a puritia iho ma koutou.
- 46
- Me waiho hoki ena e koutou hei taonga tupu e tukua iho ki a puritia e a koutou tamariki i muri i a koutou; hei pononga ratou ma koutou, ake ake ake: kaua ia e whakatupu rangatira nanakia ki a koutou whakakoutou, ki o koutou teina, ki nga tamariki a Iharaira.
- 47
- Ki te whai rawa hoki te manene, noho noa ranei, i roto i a koe, a ka rawa-koretia tou teina e noho ana i tona taha, a ka hoko i a ia ki te manene, ki te noho noa ranei i roto i a koe, ki te toronga ranei o te hapu o te manene:
- 48
- E whakahokia mai ano ia mo te utu i muri iho i tona hokonga; ma tetahi o ona teina ia e whakahoki mai.
- 49
- Ma tona matua keke, ma te tamaiti ranei a tona matua keke ia e whakahoki mai, ma tetahi ranei o ona whanaunga tupu o tona hapu ia e whakahoki mai; mana ano ranei ia e whakahoki mai, ki te taea e ia.
- 50
- Na, ka tatau ia, raua ko te tangata nana ia i hoko, ka timata i te tau i hokona ai ia ki a ia, tae noa ki te tau iupiri: a ka rite te utu e hokona ai ia ki te maha o nga tau; kia rite ona ra ki o te kai mahi.
- 51
- Ki te mea e maha ana ano nga tau, kia rite ki ena tau te utu mo tona hokinga mai e whakahokia atu e ia i roto i te moni i hokona ai ia.
- 52
- A ki te torutoru nga tau e toe ana ki te takiwa atu ki te tau iupiri, na, ka tatau ano raua, a kia rite ki ona tau te utu mo tona hokinga mai e whakahokia atu e ia ki a ia.
- 53
- Kia rite ano hoki tana noho ki a ia ki ta te kai mahi e utua ana i tenei tau i tenei tau: kaua hoki tera e whakatupu rangatira nanakia ki a ia i tau tirohanga atu.
- 54
- A ki te kahore ia e hokona i enei tau, na me haere atu ia i te tau iupiri, ratou tahi ko ana tamariki.
- 55
- He pononga hoki naku nga tamariki a Iharaira, ko aku pononga ratou i whakaputaina mai e ahau i te whenua o Ihipa; ko Ihowa ahau ko to koutou Atua.
Address: 
Phone: 
Email: