Leviticus Chapter 8 - Paipera Tapu 1868 | Te Paipera Tapu 1868

Leviticus Chapter 8 - Paipera Tapu 1868

1
A i korero ano a Ihowa ki a Mohi, i mea,
2
Tikina atu a Arona ratou tahi ko ana tama, me nga kakahu, me te hinu whakawahi, me te puru mo te whakahere hara, me nga hipi toa e rua, me te kete taro rewena-kore;
3
Huihuia mai ano hoki te whakaminenga katoa ki te whatitoka o te tapenakara o te whakaminenga.
4
A rite tahi ki ta Ihowa i whakahau ai ta Mohi i mea ai; a huihuia mai ana te whakaminenga ki te whatitoka o te tapenakara o te whakaminenga.
5
Na, ka mea a Mohi ki te whakaminenga, Ko te mea tenei i whakahaua mai e Ihowa kia meatia.
6
Na, ka kawea mai a Arona ratou ko ana tama e Mohi, a horoia ana ratou e ia ki te wai.
7
A i whakakakahuria e ia te koti ki a ia, i whitikiria hoki te whitiki, i whakakakahuria atu hoki te koroka, i meatia atu ano hoki te epora ki a ia, a whitikiria ana ki a ia te whitiki whakairo o te epora, a herea iho e ia te epora ki a ia, ki taua mea.
8
A i meatia atu ano e ia te kouma ki a ia: i whakanohoia ano hoki e ia nga Urimi me nga Tumime ki te kouma.
9
A i potaea ano e ia te potae tohunga ki tona mātenga; i makā iho ano hoki e ia te paraharaha koura, te karauna tapu, ki te potae tohunga ki te wahi ki mua; i pera tonu ia me ta Ihowa i whakahau ai ki a Mohi.
10
Na, ka mau a Mohi ki te hinu whakawahi, a whakawahia ana e ia te tapenakara, me nga mea katoa i roto, hei whakatapu.
11
A e whitu ana tauhiuhinga atu i tetahi wahi o taua mea ki te aata, i whakawahia hoki e ia te aata me ona oko katoa, te takotoranga wai ano hoki me tona turanga, kia tapu ai.
12
A i ringitia ano e ia tetahi wahi o te hinu whakawahi ki runga ki te mātenga o Arona, a whakawahia ana ia kia tapu.
13
A i arahina mai ano e Mohi nga tama a Arona, a whakakakahuria ana nga koti ki a ratou, whitikiria ana hoki nga whitiki ki a ratou, potaea ana hoki nga potae ki a ratou; i peratia ano me ta Ihowa i whakahau ai ki a Mohi.
14
A i kawea mai ano e ia te puru mo te whakahere hara: na ka pokia iho nga ringaringa o Arona, ratou ko ana tama, ki runga ki te mātenga o te puru mo te whakahere hara.
15
Na, patua iho e ia; a ka tango a Mohi i te toto, a pania atu ana e tona maihao ki nga haona o te aata, a, tawhio noa, a horohoroa ana e ia te aata, na, ka ringitia e ia te toto ki te turanga o te aata, hei whakatapu, kia meinga ai te whakamarietanga ki runga.
16
Na, ka tango ano ia i nga ngako katoa o nga whekau, me te taupa i runga ake o te ate, me nga whatukuhu e rua; me te ngako i aua mea, a tahuna ana e Mohi ki runga ki te aata.
17
Ko te puru ia, me tona hiako, ona kikokiko, me tona paru, i tahuna e ia ki te ahi i waho o te puni; i peratia ano me ta Ihowa i whakahau ai ki a Mohi.
18
A i kawea mai ano e ia te hipi toa mo te tahunga tinana, a ka pokia iho nga ringaringa o Arona, ratou ko ana tama, ki runga ki te mātenga o te hipi.
19
A patua iho e ia; a tauhiuhia atu ana te toto e Mohi ki te aata, a, tawhio noa.
20
Na, ka tapatapahia e ia te hipi; a tahuna ana te pane e Mohi, me nga tapahanga, me te ngako.
21
Na, ka horoia e ia nga whekau, me nga waewae ki te wai; a tahuna katoatia ana e Mohi te hipi ki runga ki te aata: he tahunga tinana taua mea, he kakara reka, he whakahere ahi ki a Ihowa he pera me ta Ihowa i whakahau ai ki a Mohi.
22
Na, ka kawea mai e ia te rua o nga hipi toa, te hipi mo te whakatohungatanga: a ka pokia iho nga ringaringa o Arona, ratou ko ana tama, ki runga ki te mātenga o te hipi.
23
A patua iho e ia; na, ka tangohia e Mohi tetahi wahi o ona toto, a pania atu ana e ia ki te matamata o te taringa matau o Arona, ki te koromatua ano hoki o tona ringa matau, ki te koromatua ano hoki o tona waewae matau.
24
Na, ka arahina mai e ia nga tama a Arona, a pania atu ana e Mohi tetahi wahi o nga toto ki te matamata o a ratou taringa matau, ki nga koromatua hoki o o ratou ringa matau, ki nga koromatua ano hoki o o ratou waewae matau: a ka tauhiuhia atu e Mohi te toto ki te aata, a, tawhio noa.
25
Na, ka tangohia e ia te ngako, me te hiawero, me nga ngako katoa o nga whekau, me te taupa i runga ake o te ate, me nga whatukuhu e rua, me te ngako i aua mea, me te peke matau:
26
A i tangohia ano e ia i roto i te kete taro rewena-kore i te aroaro o Ihowa, kotahi keke rewena-kore, kotahi keke taro hinu, me tetahi o nga mea angiangi, a makā, iho e ia ki runga ki te ngako, ki runga hoki ki te peke matau:
27
A hoatu katoa ana e ia ki nga ringaringa o Arona, ki nga ringaringa ano hoki o ana tama, a poipoia ana hei whakahere poipoi ki te aroaro o Ihowa.
28
Na, ka tangohia mai e Mohi i o ratou ringaringa, a tahuna ana e ia ki runga ki te aata, ki runga ki te tahunga tinana: he whakatohungatanga aua mea, hei kakara reka; he whakahere ahi ki a Ihowa.
29
Na, ka tangohia te uma e Mohi, a poipoia ana e ia hei whakahere poipoi ki te aroaro o Ihowa: i a Mohi tena wahi o te hipi toa o te whakatohungatanga; ko ta Ihowa hoki i whakahau ai ki a Mohi.
30
Na, ka tango a Mohi i tetahi wahi o te hinu whakawahi, o te toto ano hoki i runga i te aata, a tauhiuhia atu ana e ia ki a Arona, ki ona kakahu, ki a ratou tahi ano ko ana tama, ki nga kakahu ano hoki o ana tama; a whakatapua ana e ia a Arona me ona kakahu, ratou tahi ano ko ana tama, me nga kakahu o ana tama.
31
Katahi ka mea a Mohi ki a Arona ratou ko ana tama, Kohuatia te kikokiko ki te whatitoka o te tapenakara o te whakaminenga; ka kai ngatahi ai ki reira me te taro hoki i te kete o nga whakatohungatanga; kia rite ki taku i whakahau ai, i mea ai, Me kai e Arona ratou ko ana tama.
32
A ko te toenga o te kikokiko o te taro me tahu e koutou ki te ahi.
33
Kaua ano hoki e haere atu i roto i te whatitoka o te tapenakara o te whakaminenga, kia whitu ra ano nga ra; kia taka ra ano nga ra o to koutou whakatohungatanga kia whitu hoki nga ra e whakatohunga ai ia i a koutou.
34
Ko nga mea i meatia, inaianei, he mea whakahau mai na Ihowa kia meatia, hei mea whakamarietanga, mo koutou.
35
Mo reira me noho koutou ki te whatitoka o te tapenakara o te whakaminenga i te ao i te po, kia whitu ra ano nga ra, ki te tiaki i nga mea a Ihowa, kei mate koutou: ko te mea hoki tenei i whakahaua mai ki ahau.
36
Na, ka meatia e Arona, ratou ko ana tama, nga mea katoa, i whakahaua mai e Ihowa, i korerotia mai hoki e Mohi.