- 1
- I reira ano etahi i taua taima e korero ana ki a ia ki nga tāngata o Kariri, i whakananua nei o ratou toto e Pirato ki a ratou patunga tapu.
- 2
- Na, ko te whakahokinga mai a Ihu, ka mea ki a ratou, E mea ana ranei koutou, he hara rawa aua tāngata o Kariri i nga tāngata katoa o Kariri, no te mea he pera o ratou mate?
- 3
- Na, ko taku kupu tenei ki a koutou, Kahore: engari ki te kore koutou e ripeneta, ka pera ano hoki koutou katoa te mate.
- 4
- Me taua tekau hoki ma waru i horoa nei e te pourewa o Hiroama, a mate iho, e mea ana oti koutou, he hara rawa ratou i nga tāngata katoa e noho ana i Hiruharama?
- 5
- Na, ko taku tenei ki a koutou, Kahore: engari ki te kore koutou e ripeneta, ka pera ano hoki koutou katoa te mate.
- 6
- A i korerotia e ia tenei kupu whakarite; He piki ta tetahi tangata, he mea whakato ki tana māra waina; na, ka haere ia, ka rapu hua i runga, a kihai i kitea.
- 7
- Katahi ia ka mea ki te kai mahi waina, Na, ka toru oku tau i haere mai nei ahau ki te rapu hua i runga i tenei piki, heoi kahore i kitea: tuakina; hei aha i maumauria ai hoki te whenua?
- 8
- Na, ko ta tera whakahokinga mai, ka mea ki a ia, E te ariki, waiho ano hoki i tenei tau, kia keria ra ano e ahau nga taha, a kia makā he wairakau:
- 9
- A ki te whai hua, ka waiho: ki te kahore, ka tuakina e koe.
- 10
- A i roto ia i tetahi o nga whare karakia, e whakaako ana i te hapati.
- 11
- Na, ko tetahi wahine, he wairua ngoikore tona, kotahi tekau ma waru nga tau, piko tonu, kihai rawa i ahei te whakatika ake.
- 12
- A, te kitenga o Ihu i a ia, ka karanga mai, ka mea ki a ia, E kui, ka oti tou ngoi-koretanga te wewete atu.
- 13
- Na, whakapakia iho e ia ona ringa ki a ia: a kihai i aha kua tika, a whakakororia ana i te Atua.
- 14
- Na, ka korero te rangatira o te whare karakia, i riri hoki mo Ihu i whakaora i te hapati, a ka mea ki te mano, E ono nga ra e tika ai te mahi: hei reira koutou haere mai ai kia whakaorangia, kauaka i te ra hapati.
- 15
- Na, ka whakahokia mai e te Ariki ki a ia, ka mea, Tangata tinihanga, e kore ianei tenei tangata tenei tangata o koutou e wewete i tana kau i te hapati, i tana kaihe ranei, ka arahi atu ai i te turanga ki te whakainu?
- 16
- A tenei tamahine nei a Aperahama, i herea nei e Hatana, kotahi tekau ma waru nga tau, kihai ianei i tika kia wetekina tenei here ona i te ra hapati?
- 17
- Ano ka korerotia enei mea a ia, ka whakama katoa te hunga e whakahe ana ki a ia: a hari katoa te mano ki nga mea kororia katoa i meinga e ia.
- 18
- Na, ka mea ia, E rite ana te rangatiratanga o te Atua ki te aha? a me whakarite e ahau ki te aha?
- 19
- E rite ana ki te pua nani i kawea e te tangata, i ruia ki tana kari; a ka tupu, ka whakarakaunui; no ka noho nga manu o te rangi ki ona manga.
- 20
- A i mea ano ia, Me whakarite e ahau te rangatiratanga o te Atua ki te aha?
- 21
- E rite ana ki te rewena i tangohia e tetahi wahine, a whaongia ana ki roto ki nga mehua paraoa e toru, no ka rewenatia katoatia.
- 22
- A ka haereerea e ia nga pa, nga kāinga koraha, whakaako ai, me te ahu atu ano ki Hiruharama.
- 23
- Na, ka mea tetahi ki a ia, E te Ariki, he torutoru koia te hunga e ora? Na, ko tana meatanga mai ki a ratou,
- 24
- Kia kaha te tohe ki te tomo ma te kuwaha kuiti: ko taku kupu hoki tenei ki a koutou, he tokomaha e whai ki te tomo, a e kore e taea.
- 25
- Kia whakatika kau te tangata i te whare, kia tutakina te tatau, katahi koutou ka anga ka tu ki waho, ka patuki ki te tatau, ka mea, E te Ariki, e te Ariki, uakina ki a matou; na, ka whakahokia mai e ia, a ka mea ki a koutou, Kahore ahau i mohio ki a koutou, no hea ranei;
- 26
- Ko reira koutou timata ai te mea, Kua kai matou kua inu ki tou aroaro, a i whakaako ano koe i o matou huarahi.
- 27
- A ka kī mai ano ia, Ka mea atu ahau ki a koutou, kahore ahau i mātau ki a koutou, no hea ranei; mawehe atu i a au, e nga kai mahi katoa i te kino.
- 28
- Ko te wa tena o te tangihanga me te teteatanga o nga niho, ina kite koutou i a Aperahama, i a Ihaka, i a Hakopa, me nga poropiti katoa, kei te rangatiratanga o te Atua, a ko koutou kua makā ki waho.
- 29
- A ka haere mai ratou i te rawhiti, i te weta, i te nota, i te tonga, ka noho ki te rangatiratanga o te Atua.
- 30
- Na, tera etahi o muri e meinga ki mua, me etahi o mua ki muri.
- 31
- I taua ra ano ka tae mai etahi o nga Parihi, ka mea ki a ia, Haere koe, whakarerea a konei: e hiahia ana hoki a Herora kia whakamatea koe.
- 32
- A ka mea ia ki a ratou, Haere, mea atu ki taua pokiha, Na, tenei ahau te pei rewera nei, te mahi nei i te mahi whakaora aianei, apopo, a i te toru o nga ra ka oti taku.
- 33
- Otiia me haereere ahau aianei, apopo, a tahi ra: e kore hoki e ahei kia mate he poropiti i waho o Hiruharama.
- 34
- E Hiruharama, e Hiruharama, e whakamate nei i nga poropiti, e aki nei ki te kamaka i te hunga e tonoa ana ki a koe; ano te tini o aku meatanga kia whakaminea o tamariki, kia peratia me te heihei e whakamine nei i ana pi ki raro ki ona parirau, a kihai koutou i pai!
- 35
- Na, ka mahue atu ki a koutou to koutou whare kia takoto noa ana: he pono taku e mea atu nei ki a koutou, E kore koutou e kite i a au, kia tae mai ra ano te ra e mea ai koutou, Ka whakapaingia ia e haere mai ana i runga i te ingoa o te Ariki.
Address: 
Phone: 
Email: