- 1
- A ka tomo atu a Ihu, a tika atu ana i waenganui o Heriko.
- 2
- Na, ko tetahi tangata ko Hakiaha te ingoa i karangatia ai, he rangatira pupirikana, he tangata taonga ano hoki:
- 3
- I whai ia kia kite i a Ihu he pehea ranei ia; heoi kihai i taea e ia i te mano, he tangata poto hoki.
- 4
- Na, ka oma ia ki mua, a kake ana ki tetahi hikamora, kia kite i a ia: meake hoki ia tika ra reira,
- 5
- Ano ka tae a Ihu ki taua wahi, ka titiro atu, ka kite i a ia, a ka mea ki a ia, E Hakiaha, eahua, heke iho; me noho hoki ahau ki tou whare aianei.
- 6
- A hohoro tonu ia te heke iho, koa tonu hoki ki a ia hei manuwhiri māna.
- 7
- Na, ka amuamu katoa nga tāngata i kitea ai, ka mea, Kua riro ia ki te tangata hara noho ai.
- 8
- Na, ka tu a Hakiaha, ka mea ki te Ariki, E te Ariki, na, he hoatu taku i te hawhe o aku taonga ki te hunga rawa-kore: a ki te mea kua riro mai i a au te mea a tetahi i te whakapae teka, ka takiwhatia aku utu.
- 9
- Na, ko te meatanga atu a Ihu ki a ia, No naianei te oranga i tae mai ai ki tenei whare, he tama nei hoki ia na Aperahama.
- 10
- I haere mai hoki te Tama a te tangata ki te rapu ki te whakaora i te mea i ngaro.
- 11
- A i a ratou e whakarongo ana ki enei mea, ka korerotia ano hoki e ia tetahi kupu whakarite, no te mea e tata ana ia ki Hiruharama, a e mea ana ratou, ko reira pu ano whakakitea mai ai te rangatiratanga o te Atua.
- 12
- Na, ka mea ia, I haere tetahi rangatira nui ki te whenua mamao, kia riro mai ai i a ia tetahi rangatiratanga, ka hoki mai ai.
- 13
- A karangatia ana āna pononga kotahi tekau, a kotahi tekau nga pauna, i hoatu e ia ki a ratou, ka mea ki a ratou, Mahia enei kia hoki mai ra ano ahau.
- 14
- Otira i kino tona iwi ki a ia, ka tono karere i muri i a ia, ka mea, E kore matou e pai ki tenei hei kingi mo matou.
- 15
- A, tona hokinga mai, i te rironga mai o te rangatiratanga i a ia, na, ka mea kia karangatia ki a ia aua pononga, i hoatu nei e ia te moni ki a ratou, kia kite ai ia i ta tetahi i ta tetahi i mahi ai.
- 16
- Ka tae mai to mua, ka mea atu, E te ariki, ka ngahuru nga pauna kua mahia ki to pauna.
- 17
- A ka mea atu ia ki a ia, Ka pai, e te pononga pai: pono tonu tau mahi i te mea nohinohi rawa, na, hei rangatira koe mo nga pa kotahi tekau.
- 18
- A, te haerenga mai o te tokorua, ka mea, E te ariki, e rima nga pauna kua mahia ki to pauna.
- 19
- A ka mea ia ki tenei, Hei rangatira ano hoki koe mo nga pa e rima.
- 20
- Na, te haerenga mai o tetahi, ka mea, E te ariki, na, to pauna; i te rongoa hoki i a au i roto i te tauera:
- 21
- I mataku hoki ahau ki a koe, no te mea he tangata uaua koe: e tango ana koe i te mea kihai i whakatakotoria iho e koe, e kotikoti ana i te mea kihai i ruia e koe.
- 22
- Na, ko tana meatanga atu ki a ia, Kei ta to mangai he whakahēanga maku i a koe, e te pononga kino. I mohio koe he tangata uaua ahau, e tango ana i te mea kihai i whakatakotoria e ahau, e kotikoti ana i te mea kihai i ruia e ahau:
- 23
- A he aha koe tē hoatu ai i taku moni ki te takotoranga moni, penei kua riro mai taua mea i a au, me ona hua ano, i toku taenga mai?
- 24
- Na, ka mea ia ki te hunga e tu tata ana, Tangohia te pauna i a ia, hoatu hoki ki tera i nga pauna kotahi tekau.
- 25
- (Ka mea ratou ki a ia, E te ariki, kotahi nei tekau ana pauna.)
- 26
- Ko taku kupu hoki tenei ki a koutou, Ki te whai mea tetahi, ka hoatu ano ki a ia; a ki te kahore he mea a tetahi, ko ana mea ake ka tangohia i a ia.
- 27
- Tena ko aua hoa riri oku kihai nei i pai ki a au hei kingi mo ratou, arahina mai ki konei, me patu ki toku aroaro.
- 28
- Ano ka mutu enei korero, ka turia atu e ia ki mua, ka haere ki Hiruharama.
- 29
- Ano ka tata ia ki Petapaki ki Petani, ki te maunga e karangatia nei ko to nga Oriwa, na, tokorua ana akonga i tonoa e ia,
- 30
- I mea ia, Haere korua ki te kāinga e anga mai ana ki a korua; ano ka tomo atu, ka kite korua i tetahi kuao kaihe e here ana, he mea kahore ano i nohoia noatia e te tangata: wetekina, arahina mai.
- 31
- A ki te mea tetahi ki a korua, He aha i wetekina ai e korua? kia penei ta korua kī atu, E mea ana te Ariki ki a ia māna.
- 32
- Na, te haerenga atu o nga tāngata i tonoa, rokohanga atu, rite tonu ki tana i korero ai ki a raua.
- 33
- Na, i a raua e wewete ana i to kuao, ka mea ona rangatira ki a raua, He aha korua ka wewete ai i te kuao na?
- 34
- Na, ko ta raua meatanga atu, E mea ana te Ariki ki a ia māna.
- 35
- Na, ka arahina mai ia ki a Ihu: a pangā iho e raua o raua kakahu ki runga ki te kuao, whakanohoia ana a Ihu ki runga.
- 36
- A i a ia a haere ana, ka wharikiria o ratou kakahu ki te huarahi.
- 37
- A, tona tatanga atu ki te heketanga o maunga Oriwa, na, koa noa iho te huihui katoa o nga akonga, ka anga ka whakamoemiti ki te Atua, he nui hoki te reo, mo nga merekara katoa i kite ai ratou;
- 38
- Ka mea, Ka whakapaingia te Kingi e haere mai ana i runga i te ingoa o te Ariki: He rongo mau ki runga ki te rangi, he kororia ki runga rawa.
- 39
- Na, ka mea etahi o nga Parihi i roto i te mano ki a ia, E te Kai whakaako, riria o akonga.
- 40
- Na, ka whakahokia atu e ia ka korero ki a ratou, Ko taku kupu tenei ki a koutou, me i noho puku enei, kua karanga ake nga kamaka.
- 41
- Ano ka tata ia, a ka kite i te pa, ka tangihia e ia,
- 42
- Ka mea, Me i mohio koe, a koe ano, ahakoa i tenei ra nei ano ou, ki nga mea e mau ai tou rongo! ko tenei kua huna atu i to tirohanga.
- 43
- Tera hoki e tae mai nga ra ki a koe, e hangā ai e ou hoa riri he parepare mou a taka noa, a ka karapotia koe, ka kopania hoki i nga taha katoa.
- 44
- A ka whakahoroa koe ki raro, me o tamariki i roto i a koe; e kore ano hoki e waiho tetahi kamaka i runga i tetahi kamaka i roto i a koe; no te mea kihai koe i mātau ki te wa i tirohia ai koe.
- 45
- A ka tomo ia ki te temepara, ka anga ka pei ki waho i te hunga o reira e hoko mai ana e hoko atu ana;
- 46
- A ka mea ki a ratou, Kua oti te tuhituhi, Ko toku whare hei whare inoi: a kua meinga nei e koutou hei ana mo nga kai pahua.
- 47
- A whakaako ana ia i te temepara ia ra ia ra. Otiia e rapu ana nga tohunga nui me nga Karaipi me nga rangatira o te iwi kia whakangaromia ia;
- 48
- Heoi kihai i kitea ta, ratou e mea ai: no te mea e u ana nga tāngata katoa ki a ia, e whakarongo ana.
Address: 
Phone: 
Email: