Luke Chapter 20 - Paipera Tapu 1868 | Te Paipera Tapu 1868

Luke Chapter 20 - Paipera Tapu 1868

1
A i tetahi o aua ra, i a ia e whakaako ana i te iwi i roto i te temepara, a e kauwhau ana i te rongo pai, ka tae mai nga tohunga nui, nga Karaipi, me nga kaumatua ki a ia,
2
Ka korero ki a ia, ka mea, Korerotia mai ki a matou te mana i mea ai koe i enei mea? na wai hoki i hoatu tenei mana ki a koe?
3
Ka whakahokia mai e ia, a ka mea ki a ratou, Maku hoki e ui ki a koutou kia kotahi kupu; a ma koutou e mea mai ki a au:
4
Te iriiringa a Hoani, no te rangi ranei, no nga tāngata ranei?
5
A ka korero ratou ki a ratou ano, ka mea, Ki te mea tatou, No te rangi; ka mea mai ia, Ha, he aha koutou tē whakapono ai ki a ia?
6
A ki te mea tatou, No nga tāngata; ka akina tatou e te iwi katoa ki te kamaka: e mea ana hoki ratou he poropiti a Hoani.
7
Na, ka whakahokia mai e ratou, E kore e kitea no hea ranei.
8
Na, ko te meatanga atu a Ihu ki a ratou, E kore ano hoki e korerotia e ahau ki a koutou te mana i mea ai ahau i enei mea.
9
Na, ka anga ia ka korero i tenei kupu whakarite ki te iwi; I whakatokia tetahi māra waina e tetahi tangata, a tukua ana ki nga kai mahi, a haere ana ki tawhiti, a maha noa nga ra.
10
A i te po i tika ai ka tonoa he pononga ki nga kai mahi, kia homai ai e ratou ki a ia etahi o nga hua o te māra waina: otira ka whiua ia e nga kai mahi, whakahokia kautia ana,
11
Na, ka tonoa ano hoki e ia tetahi atu pononga: a ka whiua ano hoki ia e ratou, ka tukinotia, whakahokia kautia ana.
12
Na, ka tonoa ano hoki tetahi e ia, te tuatoru: a tukitukia ana ia e ratou, makā ana ki waho.
13
Na, ka mea te rangatira o te māra waina, Me pehea ahau? Ka tonoa taku tama taku e aroha nei: tera pea ratou e hopohopo ki a ia ina kite i a ia.
14
A, te kitenga o nga kai mahi i a ia, ka korerorero ki a ratou ano, ka mea, Ko te rangatira tenei mona te kāinga: tena, tatou ka whakamate i a ia, kia riro mai ai te kāinga mo tatou.
15
Na, makā ana ia ki waho o te māra waina, whakamatea iho. Na, ka aha te rangatira o te marā waina ki a ratou?
16
Ka haere mai ia, ka whakangaro i aua kai mahi, a ka hoatu te māra waina ki etahi atu. A ka rongo ratou, ka mea, Kauaka.
17
Ka titiro atu ia ki a ratou, ka mea, He aha ra tenei kua oti te tuhituhi, Ko te kohatu i kapea e nga kai hanga, kua meinga tenei hei upoko mo te kokonga?
18
Na, ki te hinga tetahi ki runga ki tenei kohatu, na, mongamonga noa; a ki te hinga tenei ki runga ki tetahi, ngotangota noa ia, ano he puehu.
19
Na, ka whai nga tohunga nui me nga Karaipi kia hopukia ia i taua wa ano; a ka mataku ratou i te iwi: i mohio hoki ratou i korerotia e ia tenei kupu whakarite mo ratou.
20
A ka ata tirohia ia e ratou, tonoa mai ana he kai whakarongo, ko te ahua kei to te hunga tika, hei hopu mo tana korero, kia tukua ai ia ki te rangatiratanga ki te kaha o te kawana.
21
A ka ui atu ratou ki a ia, ka mea, E te Kai whakaako, e mohio ana matou he tika tau e korero nei e whakaako nei, e kore ano hoki e manakohia e koe te kanohi tangata, engari e whakaako pono ana koe i te huarahi o te Atua:
22
He mea tika ranei te hoatu takoha e matou ki a Hiha, kauaka ranei?
23
Otira i kitea e ia to ratou hianga, a ka mea ki a ratou, He aha koutou ka whakamatautau nei i a au?
24
Kia kite ahau i tetahi pene. No wai tona ahua me te tuhituhinga? Na, ka whakahokia mai e ratou, ka mea, No Hiha.
25
Katahi ia ka mea ki a ratou, Hoatu rapea ki a Hiha nga mea a Hiha, ki te Atua ano hoki nga mea a te Atua.
26
Heoi kihai i taea e ratou te hopu i tetahi korero ana i te aroaro o te iwi: na, ka miharo ratou ki tana kupu, a whakarongo kau ana.
27
Na, ka tae mai etahi o nga Haruki e mea nei kahore he aranga mai; ka ui ki a ia,
28
Ka mea, E te Kai whakaako, i tuhituhi a Mohi ki a matou, Ki te mate te tuakana o tetahi tangata, a he wahine ano tana, a ka mate uri-kore ano ia, me tango te wahine e tana teina, ka whakatupu uri ai mo tana tuakana.
29
Na, tokowhitu taua whanau: ka tango to mua i te wahine, a mate uri-kore ana.
30
Na, ka tango te tokorua i te wahine, a ka mate uri-kore ano ia.
31
Na, ka tango te tokotoru i a ia; penei ana hoki nga tokowhitu: kahore ā ratou tamariki i waiho ai, a mate iho ratou.
32
Na, muri iho i te katoa ka mate ano hoki te wahine.
33
Na, i te aranga mai ma wai o ratou te wahine? he wahine hoki ia na te tokowhitu.
34
Ka whakahokia mai e Ihu, ka mea ki a ratou, E marena ana, e hoatu ana ki te marena, nga tamariki o tenei ao:
35
Tena ko te hunga e paingia ana kia whiwhi ki tera ao, ki te aranga mai ano hoki i roto i te hunga mate, e kore e marena, e kore ano hoki e hoatu ki te marena:
36
E kore ano hoki ratou e ahei kia mate: e rite ana hoki ki nga anahera; he tamariki hoki ratou na te Atua, he tamariki na te aranga mai.
37
Na, te oranga mai o te hunga mate, kua whakakitea mai tena e Mohi i te rakau, i te Ariki e korerotia ana e ia, Ko te Atua o Aperahama, ko te Atua o Ihaka, ko te Atua o Hakopa.
38
Ehara hoki ia i te Atua no te hunga mate, engari no te hunga ora: e ora katoa ana hoki i roto i a ia.
39
Na, ka whakahokia mai e etahi o nga Karaipi, ka mea, E te Kai whakaako, e pai ana to korero.
40
A kihai ratou i maia ki te ui atu ano ki a ia ki tetahi mea.
41
Na, ka mea mai ia ki a ratou, Na te aha ratou i mea ai he tamaiti na Rawiri a te Karaiti?
42
Kua mea nei a Rawiri i te pukapuka o nga waiata, I mea te Ariki ki toku Ariki, Hei toku ringa matau koe noho ai,
43
Kia meinga ra ano e ahau o hoa riri he turanga waewae mou.
44
Na, ka karangatia nei ia e Rawiri he Ariki, a na te aha i tama ai ki a ia?
45
A, i te iwi katoa e whakarongo ana, ka mea ia ki ana akonga,
46
Kia tupato ki nga Karaipi, ko ta ratou nei e rawe ai ko nga kakahu roroa ina haereere ratou, a e whakapai ana ki nga ohatanga i nga kāinga hoko, me nga nohoanga rangatira i nga whare karakia, me nga nohoanga rangatira i nga hākari;
47
Pau ake hoki i a ratou nga whare o nga pouaru, a e inoi roa ana, he ahua kau: nui rawa te mate e pa ki a ratou.