- 1
- Katahi ka whakatika to ratou huihui katoa, a arahina ana ia ki a Pirato.
- 2
- Na, ka anga ratou ka whakapa hē ki a ia, ka mea, Kua mau i a matou tenei tangata e kukume ke ana i te iwi, e mea ana, kia kaua e hoatu te takoha ki a Hiha, e kī ana he kingi ia ko te Karaiti.
- 3
- Na, ka ui a Pirato ki a ia, ka mea, Ko koe ranei te kingi o nga Hurai? Ka whakahokia mai e ia ki a ia, ka mea, Kua korerotia mai na e koe.
- 4
- Na, ko te meatanga atu a Pirato ki nga tohunga nui ki nga mano, Kahore tetahi hē o tenei tangata i mau i a au.
- 5
- A nui atu ta ratou tohe, ka mea, E whakahihiri ana ia i te iwi, e whakaako ana puta noa i Huria, no Kariri te timatanga, a taea noatia a konei.
- 6
- A, te rongonga o Pirato ki Kariri, ka ui atu, No Kariri ranei tenei tangata?
- 7
- A ka rongo ia no te rangatiratanga o Herora ia, ka tonoa ia ki a Herora, i Hiruharama hoki ia i aua ra.
- 8
- A, te kitenga o Herora i a Ihu, nui rawa tona hari: no mua hoki tona hiahia kia kite i a ia, he maha hoki nga mea i rangona e ia mona; i mea hoki ia kia kite i tetahi tohu e meinga ana e ia.
- 9
- Na, he maha, nga kupu i ui ai ia ki a ia; heoi kahore kau he kupu i whakahokia mai e ia.
- 10
- Na, tu ana nga tohunga nui me nga Karaipi, a kaha rawa ta ratou whakapa hē ki a ia.
- 11
- Na, whakakorekorea ana ia e Herora ratou ko ona hoia, na, ka taunu ia ka whakakakahu i a ia ki te kahu whakapaipai, a whakahokia atu ana ki a Pirato.
- 12
- I taua rangi ano ka houhia te rongo a Pirato raua ko Herora: i mua hoki e mauahara ana ki a raua.
- 13
- Na, ka karangatia e Pirato nga tohunga nui, nga rangatira, me te iwi ano,
- 14
- Ka mea ia ki a ratou, Kua kawea mai nei e koutou tenei tangata ki a au, me te kī ano kei te kukume ke ia i te iwi: a ka oti nei ia te uiui e ahau i to koutou aroaro, kihai i mau i a au tetahi hē o tenei tangata i roto i nga mea i whakapangia nei e koutou ki a ia:
- 15
- Kihai ano hoki a Herora: i tonoa hoki koutou e ahau ki a ia; a kahore nei ana mahi e tika ai kia mate ia.
- 16
- Na, maku ia e whiu, ka tuku atu ai.
- 17
- (Kua takoto hoki te tikanga kia tukua atu tetahi ki a ratou i te hakari.)
- 18
- Na, ka panui ratou ki te karanga, ka mea, Whakamatea tenei, ko Parapa te tuku mai ki a matou:
- 19
- (Ko tenei hoki i makā ki te whare herehere mo te nananga i nana ai ia i roto i te pa, mo te patu tangata.)
- 20
- Na, ka karanga mai ano a Pirato, he mea hoki nāna kia tukua a Ihu.
- 21
- Heoi karanga ana ratou, mea ana, Ripekatia ia, ripekatia.
- 22
- Ka mea mai ano ia ki a ratou, ko te toru o nga meatanga, He aha ra te kino i meinga e tenei tangata? kahore ano i mau i a au tetahi hē ona e mate ai: maku ia e whiu, ka tuku atu ai.
- 23
- Heoi nui atu o ratou reo ki te tohe mai, ka tono kia ripekatia ia. A riro rawa i nga reo o ratou ko nga tohunga nui.
- 24
- Na, ka ki a Pirato kia waiho i ta ratou i tono ai.
- 25
- Na, tukua ana ki a ratou te tangata i makā ki te whare herehere mo te nananga mo te patu tangata, ta ratou hoki i tono ai; ko Ihu ia i tukua ki to ratou hiahia.
- 26
- A i a ratou e arahi ana i a ia, ka mau i a ratou a Haimona tetahi tangata o Hairini, e haere mai ana i nga whenua, a whakatakotoria ana ki a ia te ripeka, kia amohia i muri i a Ihu.
- 27
- Na, he nui te huihuinga o te iwi i aru i a ia, me nga wāhine hoki e tangi ana, e aue ana ki a ia.
- 28
- Na, ka tahuri a Ihu ki a ratou, ka mea, E nga tamahine o Hiruharama, kaua ahau e tangihia, engari me tangi ki a koutou, ki a koutou tamariki ano hoki.
- 29
- Tera hoki e puta mai nga ra e mea ai ratou, Koa tonu nga pākoko, me nga kopu kahore ano i whanau, me nga u kahore ano i ngotea.
- 30
- Ko reira timata ai ratou te mea ki nga maunga, Horo iho ki runga ki a matou: ki nga pukepuke hoki, Hipokina matou.
- 31
- Ki te meinga hoki enei mea e ratou ki te rakau kaimata, ka ahatia te rakau maroke?
- 32
- Na, tokorua ano hoki era, he hunga mahi kino, e arahina ngatahitia ana ratou kia whakamatea.
- 33
- A ka tae mai ratou ki te wahi e karangatia nei ko Angaanga, ka ripeka i a ia ki reira, me aua kai mahi kino, kotahi ki matou, kotahi ki maui.
- 34
- Na, ka mea a Ihu, E Pa, houhia te rongo ki a ratou: kahore hoki ratou e mahara ki ta ratou e mea nei. A wehewehea ana ona kakahu e ratou he mea maka ki te rota.
- 35
- Me te tu ano te iwi matakitaki ai. Na, ka whakahi mai ratou tahi ko nga rangatira, ka mea, Ko era atu i whakaorangia e ia; māna ano ia e whakaora, ki te mea ko te Karaiti ia, ko ta te Atua i whiriwhiri ai.
- 36
- I taunu hoki nga hoia ki a ia, i haere mai me te kawe mai i te winika ki a ia,
- 37
- Ka mea, Ki te mea ko koe te kingi o nga Hurai, mau koe e whakaora.
- 38
- A ka tuhituhia te tuhituhinga ki runga i a ia, no Kariki, no Roma, no Hiperu nga reta, KO TE KINGI TENEI O NGA HURAI.
- 39
- I kohukohu ano ki a ia tetahi o nga kai mahi kino i iri ra, i mea, Ki te mea ko koe te Karaiti, whakaorangia koe, tatou hoki.
- 40
- Na, ka whakahokia mai e tetahi, ka riri ki a ia, ka mea, E kore rani koe e mataku ki te Atua, kei tenei mate tahi nei hoki koe?
- 41
- Ka tika raia to taua; ka whiwhi hoki taua ki nga mea e tika mo a taua hanga: ko tenei ia kahore ana mahi hē.
- 42
- Na, ko tana meatanga mai ki a Ihu, E te Ariki, kia mahara koe ki a au ina haere mai koe i runga i to rangatiratanga.
- 43
- Ano ra ko Ihu ki a ia, He pono taku e mea atu nei ki a koe, Ko aianei koe noho ai ki a au ki pararaiha.
- 44
- Na, kua tata ki te ono o nga haora, a ka pouri a runga o to whenua katoa, a, te iwa ra ano o nga haora.
- 45
- I pouri ano te ra, i pakaru ano hoki te arai o to whare tapu i waenganui.
- 46
- A nui atu te reo o Ihu ki te karanga atu, i mea ia, E Pa, tenei toku wairua ka tukua atu nei ki ou ringa: ka mutu enei kupu, ka hemo.
- 47
- Na, te kitenga o te keneturio i taua mea, ka whakakororia ia i te Atua, ka mea, He pono, he tangata tika tenei.
- 48
- Me te hunga katoa hoki i huihui ki taua matakitakinga, i to ratou kitenga i aua mea i meatia, ka patuki ki o ratou uma, a hoki ana.
- 49
- A i te tu mai i tawhiti te hunga katoa i mohio ki a ia, ratou ko nga wāhine i aru mai i a ia i Kariri, e matakitaki ana ki enei mea.
- 50
- Na, tera tetahi tangata, ko Hohepa to ingoa, he tangata noho runanga; he tangata pai, he tangata tika:
- 51
- (Kihai ano hoki i whakaae ki ta ratou whakaaro, ki ta ratou mahi;) no Arimatia ia, no tetahi pa o nga Hurai: he tangata ano hoki ia e tatari ana ki te rangatiratanga o te Atua.
- 52
- I haere atu ia ki a Pirato, a tonoa ana e ia te tinana o Ihu.
- 53
- Na, ka tangohia iho e ia taua tinana, a takaia ana ki te rinena, ka waiho ki te rua i haua ki roto ki te kohatu, ki te wahi kahore i takotoria noatia e te tangata.
- 54
- Na, ko te ra takanga hakari ia, a meake puao te hapati.
- 55
- A i aru mai ano nga wāhine i haere tahi mai nei me ia i Kariri, a kite ana i te urupa, te whakatakotoranga ano hoki o tona tinana.
- 56
- Na ka hoki ratou, ka mahi i nga mea kakara me nga hinu; a noho ana i te hapati, he whakaaro hoki ki te ture.
Address: 
Phone: 
Email: