Luke Chapter 4 - Paipera Tapu 1868 | Te Paipera Tapu 1868

Luke Chapter 4 - Paipera Tapu 1868

1
Na, kī tonu a Ihu i te Wairua Tapu, a hoki mai ana i Horano; na, ka kawea ia e te Wairua ki te koraha,
2
A e wha tekau nga ra i whakamatautauria ai ia e te rewera. Kihai ano hoki i kai i tetahi mea i aua ra: ka pahemo, muri iho ka hia kai.
3
Na, ka mea te rewera ki a ia, Ki te mea ko koe te Tama a te Atua, kiia iho tenei kohatu kia meinga hei taro.
4
Na, ka whakahokia mai e Ihu ki a ia, ka mea, Kua oti te tuhituhi, E kore e ora te tangata ki te taro kau, engari ki nga kupu katoa a te Atua.
5
Katahi te rewera ka kawe i a ia ki runga ki tetahi maunga tiketike, a mea kau iho kua whakakitea katoatia ki a ia nga rangatiratanga katoa o te ao.
6
Ka mea te rewera ki a ia, Maku e hoatu ki a koe tenei rangatiratanga katoa, me te kororia o enei mea: kua tukua mai hoki ki ahau; a ka hoatu e ahau ki taku e pai ai.
7
Na, ki te koropiko mai koe ki toku aroaro, mou katoa.
8
Na, ka whakahokia mai e Ihu ki a ia, ka mea, Haere ki muri i a au, e Hatana: kua oti hoki te tuhituhi, Me koropiko koe ki te Ariki ki tou Atua, me mahi ano ki a ia anake.
9
Na, ka kawea ia ki Hiruharama, a whakaturia ana ki runga ki te keokeonga o te temepara, a ka mea ki a ia, Ki te mea ko koe te Tama a te Atua, rere atu i konei ki raro:
10
Kua oti hoki te tuhituhi, Ka korerotia iho koe e ia ki ana anahera kia tiakina koe:
11
Ma ratou koe e hiki ake ki o ratou ringaringa, kei tūtuki tou waewae ki te kohatu.
12
Na, ka whakahokia mai e Ihu, ka mea ki a ia, Kua takoto te korero, Aua e whakamatautau ki te Ariki ki tou Atua.
13
A ka mutu katoa te whakamatautauranga a te rewera, ka mawehe atu i a ia mo tetahi wahi.
14
Na, ka hoki a Ihu i runga i te kaha o te Wairua ki Kariri: a haere ana tona rongo, a puta noa i nga wahi tata katoa.
15
A ka whakaako ia i roto i o ratou whare karakia, me te whakakororia te katoa ki a ia.
16
Na, ka haere atu ia ki Nahareta, ki te wahi i whangainga ai ia: ka tomo atu i te ra hapati ki te whare karakia, ko tana hanga hoki ia, ka whakatika ki te korero pukapuka.
17
A ka hoatu ki a ia te pukapuka a Ihaia poropiti. Ano ka wherahia te pukapuka, ka tupono ia ki te wahi i tenei tuhituhinga,
18
Kei ahau te Wairua o te Ariki, nāna nei hoki ahau i whakawahi, hei kauwhau i te rongo pai ki te hunga rawa-kore; kua tonoa mai ahau e ia ki te whakaora i te hunga ngakau marū, ki te kauwhau ki nga herehere kia haere noa, ki nga matapo kia titiro, ki te tuku i te hunga e kurua ana kia haere noa atu,
19
Ki te kauwhau i te tau manakohanga mai a te Ariki.
20
Na, ka kopia e ia te pukapuka, a hoatu ana ki te kai tiaki, noho ana. A matatau tonu mai ki a ia nga kanohi o te hunga katoa i roto i te whare karakia.
21
Katahi ia ka anga ka korero ki a ratou, No naianei, i o koutou taringa e whakarongo mai nei, i mama ai tenei Karaipiture.
22
A i whakapai ratou katoa ki a ia, miharo ki nga kupu pai i puta mai tona mangai. Ka mea ratou, Ehara ianei tenei i te tamaiti a Hohepa?
23
Ka mea mai ia ki a ratou, Tera rawa e puaki mai i a koutou tenei kupu whakarite ki a au, E rata, rongoa koe i a koe ano: ko nga mea i rongo ai matou kua meinga ki Kaperenauma, meinga hoki ki konei ki tou whenua.
24
A i mea ano ia, He pono taku e mea nei ki a koutou, E kore te poropiti e manakohia i tona ake whenua.
25
Otira he pono taku e mea atu nei ki a koutou, He tokomaha nga pouaru i roto i a Iharaira i nga ra i a Iraia, i te rangi kua oti te kopani i nga tau e toru i nga marama e ono, i te mate-kaitanga nui o te whenua katoa;
26
Heoi kihai i tonoa a Iraia ki tetahi o ratou, ki te wahine pouaru anake, ki Harepata o Hairona.
27
He tokomaha hoki nga repera i roto i a Iharaira, i nga ra o Eriha poropiti; a kihai tetahi o ratou i whakamakia, ko Naamana anake o Hiria.
28
A kī tonu i te riri te hunga katoa i te whare karakia, i te rongonga ai ki enei mea;
29
Na, ko to ratou whakatikanga ake, ka maka i a ia ki waho o te pa, a arahina ana ki te pari o te puke i hangā ai to ratou pa, whakataka ai i a ia ki raro.
30
Otira, i tika ia ra waenganui o ratou, a haere ana,
31
A ka tae mai ki Kaperenauma, ki tetahi pa o Kariri, ka whakaako hoki i a ratou i nga hapati.
32
Na, ka miharo ratou ki tana ako: i whai mana hoki tana kupu.
33
A i te whare karakia tetahi tangata he wairua rewera poke tona, a nui atu tona reo ki te karanga,
34
Ka mea, Kāti ra; he aha matou nāu, e Ihu o Nahareta? kua tae mai koe ki te whakangaro i a matou? e mohio ana ahau ki a koe; ko te Mea Tapu a te Atua.
35
Na, riria iho ia e Ihu, ka mea ia, Kāti to korero, puta mai hoki i roto i a ia. Katahi te rewera ka turaki i a ia ki waenganui, a puta mai ana i roto i a ia, kihai hoki tera i ahatia.
36
Na, tau ana te miharo ki a ratou katoa, a ka korerorero tetahi ki tetahi, ka mea, He aha tenei kupu? mana tonu nei hoki tana tono i nga wairua poke, kaha tonu, a puta mai ana ki waho.
37
A pakū ana tona rongo puta noa i nga wahi tutata katoa.
38
A, tona whakatikanga mai i te whare karakia, tomo tonu atu ki te whare o Haimona. Na, e mate ana te hungawai wahine o Haimona, he nui te kiri ka; a ka inoi ratou ki a ia mona.
39
Na, ka tu ia ki runga i a ia, a riria iho te kiri ka; a mutu ake: na, era tonu ake ia kei te taka mea ma ratou.
40
I te toenetanga o te ra, ka kawea mai ki a ia e nga tāngata katoa nga mea o ratou e mate ana i te tini o nga mate; na, whakapakia iho e ia ona ringaringa ki tenei ki tenei o ratou, a ora ake ratou.
41
A he tokomaha te hunga i puta mai nga rewera i roto i a ratou, i karanga hoki aua wairua, i mea, Ko koe te Karaiti te Tama a te Atua. A riria ana ratou e ia, kihai i tukua kia korero: i mātau hoki ratou ko te Karaiti ia.
42
Ka ao te ra, ka puta atu ia, ka haere ki tetahi wahi koraha: a ka rapu nga mano i a ia, a ka tae atu ki a ia, na, puritia ana ia, kei whakarerea ratou e ia.
43
Ka mea atu ia ki a ratou, Me kauwhau e ahau te rangatiratanga o te Atua ki era atu pa ano hoki: koia hoki ahau i tonoa mai ai.
44
A kauwhau ana ia i nga whare karakia o Kariri.