Mark Chapter 13 - Paipera Tapu 1868 | Te Paipera Tapu 1868

Mark Chapter 13 - Paipera Tapu 1868

1
A i a ia e haere atu ana i te temepara, ka mea tetahi o ana akonga ki a ia, E te Kai whakaako, nana, te tu o nga whare!
2
Na, ka whakahokia mai e Ihu, ka mea ki a ia, Ka kite koe i enei whare nunui? e kore tetahi kohatu e waiho i runga i tetahi kohatu, engari ka whakahoroa.
3
A i a ia e noho ana i maunga Oriwa i te ritenga mai o te temepara, ka ui puku atu ki a ia a Pita, a Hemi, a Hoani, a Anaru,
4
Korerotia mai ki a matou, ko ahea enei mea, a he aha te tohu ina tata enei mea katoa te rite?
5
Na, ko te whakahokinga mai a Ihu ki a ratou, ka anga ka korero, Kia tupato kei mamingatia koutou e te tangata:
6
He tokomaha hoki e haere mai i runga i toku ingoa, e mea, Ko ahau ia; a he tokomaha e mamingatia.
7
A e rongo koutou ki nga pakanga, ki nga rongo pakanga, kei ohorere koutou: kua takoto hoki he putanga mai mo aua mea; taihoa ia te mutunga.
8
E whakatika mai hoki tetahi iwi ki tetahi iwi, tetahi rangatiratanga ki tetahi rangatiratanga: a he tini nga wahi e puta ai te ru, ka puta ano hoki nga po mate kai me nga whakaohooho: ko nga timatanga enei o nga mamae.
9
Na, kia tupato koutou ki a koutou: ka tukua hoki koutou ki nga runanga; ka whiua i roto i nga whare karakia: ka whakaturia ki te aroaro o nga kawana, o nga kingi, mo te whakaaro ki a au, hei mea whakaatu ki a ratou.
10
Kua takoto ia te tikanga kia mātua kauwhautia te rongo pai ki nga tauiwi katoa.
11
A ka arahina koutou, ka tukua atu, kaua e manukanuka wawe ki ta koutou e korero ai, kaua ano hoki e maharahara: engari te mea e hoatu ki a koutou i taua haora, ko tena ta koutou e korero ai: ehara i te mea ma koutou nga korero, engari ma te Wairua Tapu.
12
Na, ka tukua te tuakana e te teina ki te mate, te tamaiti hoki e te pāpā; a e whakatika nga tamariki ki nga mātua, mea ai kia whakamatea.
13
A ka kinongia koutou e nga tāngata katoa, he mea hoki mo toku ingoa: te tangata ia e u ana, a taea noatia te mutunga, ko tenei e ora.
14
A e kite koutou i te mea whakarihariha, i te mea whakangaro, i ta Raniera poropiti i korero ai, e tu ana i te wahi e kore e tika, (kia mātau te kai titiro pukapuka,) ko reira me rere atu te hunga i Huria ki nga maunga:
15
Te tangata hoki i runga i te whare kei heke iho ki roto ki te whare, kei tapoko ki te tiki i tetahi mea i roto i tona whare:
16
Kaua ano hoki te tangata i te māra e hoki mai ki muri, ki te tiki i tona kakahu.
17
Aue te mate o te hunga e hapū ana, o nga mea hoki e whangai ana ki te u, i aua ra!
18
Ma koutou ia e inoi kei rokohanga koutou e te whati i te hotoke.
19
He whakapawera hoki aua ra, kahore ona rite o te orokohanganga ra ano i hangā nei e te Atua, a mohoa noa nei, kahore hoki he pera i muri nei.
20
A me i kahore aua ra i poroa i waenga e te Ariki, e kore tetahi kikokiko e ora: otira ka whakaaroa te hunga whiriwhiri i whiriwhiria e ia, ka poroa aua ra i waenga.
21
Ki te mea tetahi ki a koutou i reira, Na, tenei a te Karaiti; Na, tera; kaua e whakaponohia:
22
E whakatika hoki nga Karaiti teka, me nga poropiti teka, a ka hoatu e ratou nga tohu me nga mea whakamiharo, a me i taea, ka mamingatia ano hoki te hunga i whiriwhiria.
23
Kia tupato ra koutou: na, kua korerotia wawetia nei e ahau nga mea katoa ki a koutou.
24
Na, i aua ra, muri iho i taua whakapawera, ka whakapouritia te ra, e kore ano hoki e titi te atarau.
25
Ka taka iho nga whetu o te rangi, a ka ngaueue nga mea kaha o nga rangi.
26
Ko reira ano hoki kitea ai te Tama a te tangata, e haere mai ana i runga i nga kapua, me te kaha nui me te kororia.
27
Ko reira ano ia tono ai i ana anahera, a ka huihuia āna i whiriwhiri ai i nga hau e wha, i te pito o te whenua tae noa ki te pito o te rangi.
28
Na, kia akona koutou e te piki ki tetahi kupu whakarite; I tona manga e ngawari ana, a e puta ana nga rau, ka mohio koutou ka tata te raumati:
29
Whaihoki ko koutou, ina kite i enei mea e puta mai ana, ka mātau ka tata, kei nga kuwaha.
30
He pono taku e mea nei ki a koutou, E kore tenei whakatupuranga e pahemo, kia puta ra ano enei mea katoa.
31
Ko te rangi me te whenua e pahemo: ko aku kupu ia e kore e pahemo.
32
Otiia, kahore tetahi tangata e mātau ki taua ra, ki taua haora, kahore nga anahera o te rangi, kahore te Tama, ko te Matua anake.
33
Kia tupato, kia mataara, me te inoi ano: kahore hoki koutou e mātau ki te wa, ko ahea ranei.
34
Ka rite hoki ki te tangata e haere ana ki tawhiti, mahue iho i a ia tona whare, a tukua iho e ia nga tikanga ki ana pononga, tana mahi ma tetahi ma tetahi, a ka whakahau iho ki te kai tiaki tatau kia mataara.
35
Ae ra, kia mataara koutou: kahore hoki koutou e mātau ki te wa e haere mai ai te rangatira o te whare, ko te ahiahi, ko waenganui po ranei, ko te tangi o te heihei, ko te atatu ranei:
36
Kei puta whakarere mai, a ka rokohanga mai koutou e ia e moe ana.
37
Na, taku ka mea atu nei ki a koutou, e meatia ana ano ki te katoa, Kia mataara.