Mark Chapter 14 - Paipera Tapu 1868 | Te Paipera Tapu 1868

Mark Chapter 14 - Paipera Tapu 1868

1
Na, kia rua ake nga ra ko te Kapenga, me te hakari o te taro rewena-kore: a ka rapu nga tohunga nui me nga Karaipi i tetahi tinihanga e mau ai ia, e whakamatea ai.
2
I mea ano ratou, Kauaka i te hakari, kei ngangau te iwi.
3
A i a ia i Petani i te whare o Haimona repera, i a ia ano e noho ana, ka haere mai tetahi wahine me tetahi pouaka kohatu kī tonu i te hinu kakara, he tino nara, he mea utu nui; a wahia ana e ia te pouaka kohatu, ringihia ana ki tona mātenga.
4
A i whakatakariri etahi i roto i a ratou, i mea, Hei aha tenei maumau o te hinu kakara?
5
Maha atu hoki i nga pene e toru rau te utu, me i hokona tenei hinu, na, ka hoatu ki te hunga rawa-kore. Na, ka amuamu ratou ki a ia.
6
Ka mea atu a Ihu, Kāti ano u ana; he aha ta koutou e whakapawerawera i a ia? he mahi pai tana i mea nei ki a au.
7
Kei a koutou tonu hoki te hunga rawa-kore i nga wa katoa, a hei atawhainga ratou ma koutou i nga wa e pai ai koutou: e kore ia ahau e noho tonu ki a koutou.
8
Ko tāna ake kua whakapaua mai e ia: kua whakaaro wawe ia kia whakawahia toku tinana mo te tanumanga.
9
He pono taku e mea nei ki a koutou, Ko nga wahi o te ao katoa e kauwhautia ai tenei rongo pai, ka korerotia ano hoki ta tenei wahine i mea ai, hei whakamaharatanga ki a ia.
10
Na, ka haere a Hura Ikariote, tetahi o te tekau ma rua, ki nga tohunga nui, ki te tuku i a ia ki a ratou.
11
Ano ka rongo ratou, ka hari, ka whakaae kia hoatu he moni māna, ka rapu ia ki te wa pai e tukua ai ia.
12
A i te ra tuatahi o te taro rewena-kore, i te wa e patua ai e ratou te Kapenga, ka mea ana akonga ki a ia, Ko hea koe pai ai kia haere matou ki te taka, kia kai ai koe i te Kapenga?
13
A tokorua ana akonga i tonoa e ia, ka mea ia ki a raua, Haere ki te pa, a ka tutaki ki a korua he tangata e mau ana i te kahaka wai: haere i muri i a ia.
14
A ka mea atu ki te tangata o te whare e tomo ai ia, E mea ana te Kai whakaako, Kei hea te ruma e kai ai matou ko aku akonga i te Kapenga?
15
A ka whakaaturia e ia ki a korua he ruma nui i runga, oti rawa te whariki, te whakapai: hei reira taka ai ma tatou.
16
Na, haere ana āna akonga, a, te taenga atu ki te pa, ka kitea tana i korero ai ki a raua: a, takā ana e raua te Kapenga.
17
Ano ka ahiahi, ka haere atu ia me te tekau ma rua.
18
I a ratou e noho ana, e kai ana, ka mea a Ihu, He pono taku e mea nei ki a koutou, Ko tetahi o koutou kei toku taha nei e kai ana, māna ahau e tuku atu.
19
Na, ka pa te pouri ki a ratou, ka kī takitahi atu ki a ia, Ko ahau koia? me tetahi atu, Ko ahau koia?
20
Na, ka whakahokia mai e ia, ka mea ki a ratou, Ko tetahi o te tekau ma rua ka toutou tahi nei māua ki te rihi.
21
E haere ana te Tama a te tangata, e pera ana me te mea i tuhituhia mona: otiia aue te mate mo te tangata e tukua ai te Tama a te tangata! he mea pai mo taua tangata me i kaua ia e whanau,
22
A i a ratou e kai ana, ka mau a Ihu ki te taro, a ka mutu te whakapai, ka whawhati, na, ka hoatu ki a ratou, ka mea, Tangohia, kainga: ko toku tinana tenei.
23
Na, ka mau ia ki te kapa, a ka mutu te whakawhetai, ka hoatu ki a ratou: a ka inumia e ratou katoa.
24
I mea ano ia ki a ratou, Ko oku toto enei, ko o te kawenata hou, e whakahekea ana mo te tini.
25
He pono taku e mea nei ki a koutou, E kore ahau e inu i te hua o te waina a mua ake nei, kia taea ra ano taua ra e inumia houtia ai e ahau i te rangatiratanga o te Atua.
26
Ano ka mutu ta ratou himene, ka haere atu ki maunga Oriwa.
27
Katahi a Ihu ka mea ki a ratou, Ka hē koutou katoa ki a au i tenei po: kua oti hoki te tuhituhi, Ka patua e ahau te hepara, a ka whakamararatia nga hipi.
28
Otira muri iho i toku aranga mai, ka haere ahau ki mua i a koutou ki Kariri.
29
Ka mea a Pita ki a ia, Ahakoa hē te katoa, e kore ra ahau e hē.
30
Na, ka mea mai a Ihu ki a ia, He pono taku e mea atu nei ki a koe, Ko akuanei, i tenei po ano, i te mea kahore ano kia rua noa nga tangihanga o te tikaokao, ka toru āu whakakahoretanga ki a au.
31
Katahi ka tino nui rawa tana meatanga atu, Ahakoa kua takoto te tikanga kia mate tahi taua, e kore ahau e whakakahore ki a koe. I pera ano hoki te korero ā ratou katoa.
32
To ratou taenga atu ki te wahi, ko tona ingoa nei ko Kehemane; ka mea ia ki ana akonga, Hei konei koutou noho ai, kia inoi ahau.
33
Na, ka mau ia ki a Pita, ratou ko Hemi, ko Hoani, a ka timata te koera te tumatatenga;
34
Na, ka mea ia ki a ratou, Karapoti pu toku wairua i te pouri, tata pu ki te mate: hei konei koutou noho ai, kia mataara.
35
Na, ka haere ia ki pahaki tata atu, ka takoto ki te whenua, ka inoi, me kahore e ahei kia pahemo atu tenei haora i a ia.
36
A ka mea, E Apa, e Pa, ka taea e koe nga mea katoa; tangohia atu tenei kapa i a au: otiia kaua e waiho i taku e pai ai, engari i tau.
37
Na, ka haere mai ia, a rokohanga mai e moe ana ratou, a ka mea ki a Pita, E Haimona, e moe ana koe? e kore e taea e koe te mataara kia kotahi haora?
38
Kia mataara koutou, me te inoi, kei uru ki te whakamatautauranga. E hihiko ana te wairua, ko te kikokiko ia e ngoi-kore ana.
39
Ka haere atu ano ia, ka inoi, ka whakahua i taua kupu ano.
40
A, tona hokinga mai, rokohanga mai ano e moe ana ratou, (i taimaha hoki o ratou kanohi,) a kihai ratou i mātau ki ta ratou e whakahoki atu ai ki a ia.
41
Na, haere mai ana ano ia, ko te toru o nga haerenga, a ka mea ki a ratou, Moe tonu, takoto marire: heoi ra, kua taea te haora; na, ka tukua te Tama a te tangata ki nga ringaringa o te hunga hara.
42
Maranga, ka haere tatou; na, ka tata te kai tuku i a au.
43
A korero kau ia, kua puta mai a Hura, tetahi o te tekau ma rua, a he tini nga tāngata i a ia, me nga hoari, me nga patu, he mea tono mai na nga tohunga nui, na nga Karaipi, na nga kaumatua.
44
Na, kua oti tetahi tohu te whakarite ki a ratou e tona kai tuku; i mea ia, Ko taku tangata e kihi ai, ko ia tera; hopukina, kia mau te arahi atu.
45
Na, tona taenga mai, tika tonu atu ki a ia, ka mea, E te Kai whakaako, e te Kai whakaako; a kihi ana i a ia.
46
Na, ka pa o ratou ringaringa ki a ia, hopukina ana ia.
47
Na, ka unuhia he hoari e tetahi o te hunga e tu ana i reira, a hāua iho e ia te pononga o te tohunga nui, a tapahia ana tona taringa.
48
Na, ka kī mai a Ihu, ka mea ki a ratou, He tahae ahau, i haere mai ai koutou me nga hoari me nga patu ki te hopu i au?
49
I a koutou ahau e whakaako ana i te temepara i tena ra i tena ra, a kihai koutou i hopu i a au: otira kia rite nga Karaipiture.
50
Na, whakarere ana ratou katoa i a ia, a oma ana.
51
Na, ka arumia ia e tetahi taitamariki, heoi nei ona kakahu ko tetahi rinena; a ka hopukina atu ia e nga taitamariki:
52
Na, ka mahue i a ia te rinena, oma tahanga ana i a ratou.
53
Katahi, ka kawea a Ihu e ratou ki te tino tohunga: a kua huihui mai ki a ia nga tohunga nui katoa, me nga kaumatua, me nga Karaipi.
54
A i aru mai a Pita i a ia i tawhiti, tae noa ki roto ki te whare o te tohunga nui: a noho tahi ana me nga kai mahi, pāinaina ai ki te taha o te ahi.
55
Na, i rapu nga tohunga nui me te runanga katoa i te korero mo Ihu, e whakamatea ai; heoi kihai i kitea.
56
He tokomaha hoki nga kai whakapae teka mona, otiia kihai i rite a ratou korero.
57
Na, ka whakatika etahi, ka whakapae teka ki a ia, ka mea,
58
I rongo matou ki a ia e mea ana, Maku e whakahoro tenei whare tapu i hangā e te ringa, a kia toru nga ra ka hangā e ahau tetahi atu, ehara i te mea i hangā e te ringa.
59
Heoi kihai nei ano hoki i rite a ratou korero.
60
Na, ka whakatika te tino tohunga i waenganui, ka ui atu ki Ihu, ka mea, Kahore āu kupu? he aha ta enei e whakaatu nei mou?
61
Heoi kihai i kuihi, kahore he kupu i whakahokia mai e ia. Ka ui atu ano te tino tohunga ki a ia, ka mea ki a ia, Ko koe ranei a te Karaiti, te Tama Ana e whakapaingia nei?
62
Ka mea mai a Ihu ki a ia, Ko ahau ano ia: a tera koutou e kite i te Tama a te tangata e noho ana i te ringa matau o te kaha, e haere mai ana i roto i nga kapua o te rangi.
63
Katahi ka haehae te tino tohunga i ona kakahu, ka mea, Hei aha atu ma tatou nga kai whakaatu?
64
Kua rongo koutou ki te kohukohunga: e pehea ana a koutou whakaaro? Na, ka whakaae ratou katoa ka tika kia mate.
65
Katahi ka anga etahi ka tuwha ki a ia, ka arai i tona kanohi, ka kuru i a ia, ka mea ki a ia, Poropiti mai: i pahiatia ano hoki ia e nga pononga.
66
A i a Pita i te whare i raro, ka haere mai tetahi o nga kotiro a te tohunga nui:
67
A, tona kitenga i a Pita e pāinaina ana, ka titiro atu ki a ia, ka mea, I a Ihu o Nahareta ano hoki koe.
68
Na, ka whakakahore ia, ka mea, E kore ahau e mātau, e kore ano hoki e mahara ki tau korero. Haere ana ia ki te whakamahau; a ka tangi te tikaokao.
69
A ka kite ano te kotiro i a ia, ka anga ka korero ki te hunga e tu tata ana, No ratou hoki tenei.
70
Na, ka whakakahore ano ia. A muri tata iho, ka korero atu ano ki a Pita te hunga e tu tata ana, He pono no ratou koe; no Kariri hoki koe, e rite na hoki tou reo.
71
Katahi ia ka timata te kanga, te oati, Kahore ahau e mātau ki tena tangata e korero na koutou.
72
Na, kua tuarua te tangihanga o te tikaokao. A ka mahara a Pita ki te kupu i korero ai a Ihu ki a ia, E kore e tuaruatia nga tangihanga o te tikaokao, ka toru āu whakakahoretanga ki a au. A ka whakaaroa iho e ia, na, ka tangi.