- 1
- A ka tomo atu ano ia ki te whare karakia; na, i reira tetahi tangata kua memenge nei tona ringa.
- 2
- A ka titiro pu ratou ki a ia, me kore ia e whakaora i a ia i te hapati; he mea hoki kia whakapangia ai e ratou he hē ki a ia.
- 3
- Na, ka mea ia ki te tangata i te ringa memenge, Whakatika ki waenganui.
- 4
- Na, ko tana meatanga atu ki a ratou, He mea tika ranei te mahi pai i te hapati, te mahi kino ranei? te whakaora ranei, te whakamate ranei? A kahore ratou i kīkī.
- 5
- Na, ka tirotiro riri ia ki a ratou, he pouri hoki mo te pakeke o o ratou ngakau, a ka mea ki taua tangata, Torona mai tou ringa. A, te toronga mai o tona ringa, kua ora, kua pera me tetahi.
- 6
- A haere tonu atu nga Parihi ratou ko nga tāngata whaka-Herora, ka runanga mona, ki te pehea e whakamatea ai.
- 7
- Na, ka haere atu a Ihu ratou ko ana akonga ki te moana: a he nui te tangata i aru mai i a ia i Kariri, i Huria,
- 8
- I Hiruharama, i Irumia, i tawahi hoki o Horano; me te hunga hoki e tata ana ki Taira ki Hairona, nui atu te huihui; to ratou rongonga ki nga mea i mea ai ia, haere mai ana ki a ia.
- 9
- Na, ka mea ia ki ana akonga kia tatatata tetahi kaipuke iti ki a ia, i te mano hoki, kei tutetutea ia e ratou.
- 10
- He tokomaha hoki i whakaorangia e ia; no ka popō mai ki a ia te hunga katoa e mate ana, kia pa ai ratou ki a ia.
- 11
- Me nga wairua poke hoki, to ratou kitenga i a ia, takoto ana ki tona aroaro, karanga ana, mea ana, Ko koe te Tama a te Atua.
- 12
- A he maha ana kupu ki a ratou kia kaua ia e whakakitea e ratou.
- 13
- Na, ka kake ia ki te maunga, a karangatia ana ki a ia āna i pai ai: a ka tae atu ratou ki a ia.
- 14
- A kotahi tekau ma rua āna i whakarite ai hei hoa mona, hei tononga hoki māna ki te kauwhau,
- 15
- Kia whai mana hoki e ora ai nga mate, e peia ai nga rewera:
- 16
- A huaina iho e ia a Haimona ko Pita;
- 17
- Ko Hemi hoki tama a Heperi, raua ko Hoani teina o Hemi; a huaina iho raua ko Poaneki, ara, Ko nga tamariki a te whatitiri:
- 18
- Ko Anaru, ko Piripi, ko Patoromu, ko Matiu, ko Tamati, ko Hemi tama a Arapiu, ko Tariu, ko Haimona Kananiti,
- 19
- Ko Hura Ikariote hoki, nāna nei ia i tuku: na, ka tae ratou ki te whare.
- 20
- A ka huihui mai ano hoki te mano, no kihai rawa ratou i ahei te kai taro.
- 21
- Ano ka rongo ona hoa, ka haere ki te pupuri i a ia: i mea hoki, E haurangi ana ia.
- 22
- Na, ka mea nga Karaipi i haere mai i Hiruharama, Kei a ia a Perehepura, a na te rangatira o nga rewera tāna peinga rewera.
- 23
- Na, ka karangatia ratou e ia, a ka korero whakarite atu ki a ratou, Me pehea a Hatana ka pei ai i a Hatana?
- 24
- Ki te tahuri iho hoki tetahi rangatiratanga ki a ia ano, e kore taua rangatiratanga e tu.
- 25
- Ki te tahuri iho hoki tetahi whare ki a ia ano, e kore taua whare e tu.
- 26
- A ki te whakatika mai a Hatana, a ka tahuri iho ki a ia ano, e kore ia e tu, engari he mutunga tona.
- 27
- E kore te tangata e ahei te haere ki roto ki te whare o te tangata kaha, pahua ai i ona taonga, ki te kahore e mātua herea te tangata kaha; ko reira pahua ai i tona whare.
- 28
- He pono taku e mea nei ki a koutou, Ko nga hara katoa o nga tamariki a nga tāngata e murua, me nga kohukohunga e kohukohu ai ratau:
- 29
- Tena ko te tangata e kohukohua ai te Wairua Tapu, e kore e murua tona a ake ake ake, engari ka tau te hē ki a ia a ake, ake:
- 30
- Mo ratou i ki, He wairua poke tona.
- 31
- A, te taenga mai o ona teina, ratou ko tona whaea, ka tu i waho, a tono tangata ana ki a ia ki te karanga i a ia.
- 32
- A e noho ana te mano i tetahi taha ona, i tetahi taha, a ka mea ratou ki a ia, Na, tou whaea me ou teina, kei waho e rapu ana i a koe.
- 33
- Na, ko tana whakahokinga mai ki a ratou, ka mea, Ko wai toku whaea, ko wai hoki oku teina?
- 34
- Na, ka tirotiro ia ki te hunga e noho ana i tetahi taha ona, i tetahi taha, a ka mea, Na, toku whaea, oku teina!
- 35
- Ki te meatia hoki e tetahi ta te Atua i pai ai, hei teina ia ki a au, hei tuahine, hei whaea.
Address: 
Phone: 
Email: