- 1
- A i haere atu ia i reira, a ka tae ki tona kāinga tupu; me te aru ano ana akonga i a ia.
- 2
- A ka taka mai te hapati, ka anga ia ka whakaako i roto i te whare karakia; a he tokomaha i to ratou rongonga ai i miharo, i mea, No hea enei mea a tenei tangata? a he matauranga aha tenei kua homai nei ki a ia, i oti aianei merekara nunui i ona ringa?
- 3
- Ehara ianei tenei i te kamura, i te tama a Meri, i te tuakana o Hemi, ratou ko Hohi, ko Hura, ko Haimona? a kahore ianei ona tuāhine i konei i a tatou? Heoi hē ana ratou ki a ia.
- 4
- Otira ka mea a Ihu ki a ratou, Kei tona kāinga anake, kei ona whanaunga, kei tona whare, te poropiti hapa ai i te honore.
- 5
- A kihai ia i ahei te mea i tetahi merekara ki reira, heoi ano ko te whakapa i ona ringa ki etahi tāngata ngoikore torutoru kia ora ai.
- 6
- A miharo ana ia ki to ratou whakapono-kore. Na, haereerea ana e ia nga kāinga koraha, a tawhio noa, whakaako ai.
- 7
- Katahi ia ka karanga i te tekau ma rua, a ka anga ka tono i a ratou tokorua tokorua; a hoatu ana ki a ratou he mana hei pei i nga wairua poke.
- 8
- I mea ano ia ki a ratou kia kaua tetahi mea e mauria ki te ara, hei te tokotoko anake; kaua he putea, kaua he taro, kaua he moni mo roto i te whitiki:
- 9
- Engari he parekereke, here rawa; kaua ano hoki e takiruatia nga koti hei kakahu.
- 10
- A i mea ano ia ki a ratou, Ka tapoko koutou ki tetahi whare, hei reira koutou noho ai, a haere noa i reira.
- 11
- A ki te kahore etahi e manako ki a koutou, ki te kore e whakarongo ki a koutou, ka haere atu i reira, whakangahorotia atu te puehu i raro i o koutou waewae hei mea whakaatu ki a ratou. He pono taku e mea nei ki a koutou, Erangi to Horoma to Komora i te ra whakawa e māmā i to taua pa.
- 12
- Na, ka haere atu ratou, ka kauwhau kia ripeneta nga tāngata.
- 13
- A he maha nga rewera i peia, he tokomaha ano hoki nga turoro i kaukauria ki te hinu, i whakaorangia.
- 14
- A, te rongonga ki a ia o Kingi Herora, (kua nui haere hoki tona ingoa,) ka mea ia, Kua ara mai a Hoani Kai iriiri i te hunga mate, a na reira i mahi ai nga merekara i roto i a ia.
- 15
- Ka mea etahi, Ko Iraia ia. Ko etahi i mea, He poropiti ia, he pera ranei me tetahi o nga poropiti.
- 16
- Heoi, te rongonga o Herora, ka mea ia, Ko Hoani tenei i poutoa e ahau te mātenga: kua ara ia i te hunga mate.
- 17
- I tono tangata hoki taua Herora a hopukia ana a Hoani, a herea iho i te whare herehere, he mea hoki na Heroriaha, na te wahine a tona teina a Piripi: kua marenatia hoki e ia.
- 18
- Na Hoani hoki i mea ki a Herora, E kore e tika kia riro i a koe te wahine a to teina.
- 19
- Na, ka mauāhara a Heroriaha ki a ia, a ka mea kia whakamatea ia; heoi kihai i taea:
- 20
- I hopohopo hoki a Herora ki a Hoani, i mahara hoki he tangata tika, he tapu, na, ka tiaki i a ia; a he maha ana mea i mea ai ia i tana rongonga ai ki a, i whakaahuareka ano hoki ki te whakarongo ki a ia.
- 21
- A ka taka mai tetahi wa pai, i ta Herora takanga hapa i tona ra whanautanga ma ana tāngata nunui, ma nga rangatira hoia, ratou ko nga tino tangata o Kariri;
- 22
- Na, te haerenga mai o te tamahine a taua Heroriaha ki roto, ka kanikani, a ka ahuareka a Herora, ratou ko te hunga e noho tahi ana, ka mea te kingi ki te kotiro, Māu e tono ki a au ki tau e pai ai, a ka hoatu e ahau ki a koe.
- 23
- Na, ka oati ia ki a ia, Tāu e tono mai ai ki ahau, ahakoa ko tetahi taha o taku rangatiratanga, me hoatu e ahau ki a koe.
- 24
- Na, ka haere tera, ka korero ki tona whaea, Me tono e au ki te aha? A ka mea mai tera, Ki te mātenga o Hoani Kai iriiri.
- 25
- Na, hohoro tonu tona haere mai ki roto ki te kingi, ka tono, ka mea, Tāku i pai ai, kia homai e koe ki a au aianei ano ko te mātenga o Hoani Kai iriiri ki runga ki te rihi.
- 26
- Heoi, pouri rawa te kingi; otira i whakaaro ki te oati, ki te hunga hoki e noho tahi ana me ia, a kihai i pai kia whakakahoretia tāna.
- 27
- Na, tonoa tonutia atu ana te kai patu e te kingi, i mea hoki kia mauria mai tona mātenga: a haere ana tera, poutoa iho e ia tona mātenga i roto i te whare herehere,
- 28
- A mauria mai ana tona mātenga i runga i te rihi, hoatu ana ki te kotiro: a na te kotiro i hoatu ki tona whaea.
- 29
- Ano ka rongo ana akonga, ka haere ka tango i te tinana, a whakatakotoria ana e ratou ki roto ki te urupa.
- 30
- Na, ka huihui mai nga apotoro ki a Ihu, a korerotia ana e ratou ki a ia nga mea katoa i mea ai ratou, i whakaako ai.
- 31
- Na, ka mea ia ki a ratou, Haere mai koutou nei ano ki te koraha ki te wahi motu ke, kia tā iho ai te manawa: he tokomaha hoki e haere mai ana e haere atu ana, no kihai rawa ratou i watea ki te kai.
- 32
- A haere puku ana ratou ki te koraha ki tetahi wahi motu ke, ra te kaipuke.
- 33
- A i kite nga mano i to ratou haerenga, a he tokomaha i mātau ki a ia, na, ka oma ra uta mai ki reira i roto i nga pa katoa, a ko ratou kua tae, a huihui mai ana ki a ia.
- 34
- Ano ka puta a Ihu, a ka kite i te tini o te tangata, ka aroha ki a ratou, no te mea i rite ratou ki te hipi heparakore: a ka anga ia ka ako i a ratou ki nga mea maha.
- 35
- Na, kua heke noa atu te ra, a ka haere mai ana akonga ki a ia, ka mea, He wahi koraha tenei, kua heke noa atu ano hoki te ra:
- 36
- Tonoa atu ratou kia haere ki nga whenua ki nga kāinga koraha i tetahi taha, i tetahi taha, ki te hoko taro ma ratou: kahore hoki ā ratou mea hei kai.
- 37
- Na, ka whakahokia ake e ia, a ka mea ki a ratou, Ma koutou e hoatu he kai ma ratou. Ka mea mai ratou ki a ia, Me haere oti matou ki te hoko taro ki nga pene e rua rau, ka hoatu ai hei kai ma ratou?
- 38
- Ka mea ia ki a ratou, E hia ā koutou taro? tikina tirohia. A ka mohio ratou, na, ka mea, E rima, e rua hoki nga ika.
- 39
- Ka mea ia ki a ratou kia meinga ratou katoa kia noho, he nohoanga he nohoanga, ki runga ki te tarutaru.
- 40
- Na, ka noho ratou, he rōpū he rōpū, tataki rau tataki rima tekau.
- 41
- A ka mau ia ki nga taro e rima ki nga ika hoki e rua, a ka titiro atu ki runga ki te rangi, ka whakapai, ka whawhati i nga taro, a hoatu ana ki ana akonga kia whakatakotoria atu ma ratou; i tuwhaina ano hoki e ia nga ika e rua ma ratou katoa.
- 42
- A kai katoa ana ratou, a ka makona.
- 43
- A kotahi tekau ma rua nga kete i kohia ake e ratou, kī tonu i nga whatiwhatinga, i nga ika ano hoki.
- 44
- A me te mea e rima mano nga tāngata i kai taro ra.
- 45
- A akiaki tonu iho ia i ana akonga kia eke ki runga ki te kaipuke, kia whakawhiti atu i mua i a ia ki tawahi ki Petahaira, i a ia e tono ana i te mano kia haere.
- 46
- Na, ka mutu tana poroporoaki, ka haere ia ki te maunga ki te inoi.
- 47
- Na, kua ahiahi, a i waenga moana te kaipuke, ko ia anake hoki i uta.
- 48
- Na, ka kite ia i a ratou e ruwha ana i te hoenga; i hē hoki ta ratou hau: a i te wha o nga mataarahanga o te po, ka haere atu ia ki a ratou, i haere maori i runga i te moana, me te mea hoki ka pahika ke i a ratou.
- 49
- Ano ka kite ratou i a ia e haere ana i runga i te moana, ka mea ratou, He wairua! a ka aue:
- 50
- I kite hoki ratou katoa i a ia, a ihiihi ana. Na, ka hohoro ia te korero mai ki a ratou, a ka mea ki a ratou, Kia manawanui koutou: ko ahau tenei; kaua e mataku.
- 51
- Na, ka eke ia ki te kaipuke ki a ratou; a marire iho te hau: a nui whakaharahara to ratou oho mauri, miharo ana.
- 52
- Kihai hoki ratou i mahara ki nga taro: he pakeke hoki no o ratou ngakau.
- 53
- A, to ratou whitinga atu, ka tae ki te whenua o Kenehareta, a u ana ki uta.
- 54
- A, to ratou mahutatanga mai i te kaipuke, mohio tonu atu ratou ki a ia,
- 55
- A oma ana puta noa i taua whenua, a tawhio noa, ka anga ka mau mai i nga turoro i runga i nga moenga, ki te wahi i rongo ai ratou kei reira ia.
- 56
- A i ana haerenga katoatanga ki nga kāinga koraha, ki nga pa, ki nga whenua ranei, ka whakatakotoria nga turoro ki nga kāinga hoko, ka inoi ki a ia kia pa kau ratou ki te taniko o tona kakahu: a ora ake nga tāngata katoa i pa ki a ia.
Address: 
Phone: 
Email: