Malachi Chapter 3 - Paipera Tapu 1868 | Te Paipera Tapu 1868

Malachi Chapter 3 - Paipera Tapu 1868

1
Tenei te ungā atu nei e ahau taku karere, mana e whakapai te ara i mua i a au, a kitea rawatia ake kua tae te Ariki, e rapua nei e koutou, ki tona temepara, te anahera o te kawenata, ta koutou e ngakau nui na: nana, tera ia ka haere mai, e ai ta Ihowa o nga mano.
2
A ko wai e u i te ra e haere mai ai ia? ko wai hoki e tu, ina puta mai ia? e rite ana hoki ia ki te ahi a te kai tahi para, ki te horoi ano hoki a te kai horoi:
3
Ka noho ano ia, ka rite ki te kai tahi para ki te kai whakapai hiriwa, a ka whakapaia e ia nga tamariki a Riwai, ka whakahemokia to ratou para, ano he koura, he hiriwa: kia tapaea ai e ratou he whakahere ki a Ihowa i runga i te tika.
4
Ko reira te whakahere a Hura raua ko Hiruharama rekaina ai e Ihowa, ka rite ki nga rangi o mua, ki nga tau onamata.
5
Ka whakatata atu ano ahau ki a koutou ki te whakarite whakawa; ka hohoro ano ahau hei kai whakaatu i te he o nga kai makutu, o te hunga puremu, o nga kai oati teka, o te hunga ano hoki e tahae ana i nga utu o te kai mahi, i ta te pouaru, i ta te pani, e whakapeau ke ana i ta te manene, a kahore e wehi i a au, e ai ta Ihowa o nga mano.
6
Ko ahau hoki a Ihowa, kahore ahau e puta ke; na reira koutou, e nga tamariki a Hakopa, i kore ai e pau.
7
No nga rangi ano o o koutou mātua i whakarerea ai e koutou aku tikanga, kihai ano i puritia e koutou. Hoki mai ki a au, a ka hoki atu ahau ki a koutou, e ai ta Ihowa o nga mano. Heoi kei te mea na koutou, Kia pehea ta matou hoki atu?
8
E tahae ranei te tangata i ta te Atua? Heoi kua tahaetia taku e koutou. A e mea na koutou, He pehea ta matou tahae i tau? Ko nga whakatekau ra, me nga whakahere.
9
Kua kangā, kua kangā koutou; na koutou hoki taku i tahae, na tenei iwi katoa.
10
Maua a koutou whakatekau katoa ki roto ki te toa, kia whai kai ai toku whare, waiho hoki tenei hei whakamatautau moku, e ai ta Ihowa o nga mano, me kahore e tuwhera i a au nga matapihi o te rangi ki a koutou, a ka ringitia atu e ahau he manaakitanga ki runga ki a koutou, a kia kore ra ano he takotoranga.
11
Ka whakaaro ano hoki ahau ki a koutou, ka riria te kai whakapareho, kei he i a ia nga hua o to koutou oneone; e kore ano e marere noa nga hua o ta koutou waina i te mura, e ai ta Ihowa o nga mano.
12
A ki ta nga iwi katoa he manaakitanga koutou: no te mea he whenua ahuareka koutou, e ai ta Ihowa o nga mano.
13
He kaha a koutou kupu ki a au, e ai ta Ihowa. Heoi e ki na koutou, He aha ta matou korero mou?
14
Kua ki na koutou, Kahore he hua o te mahi ki te Atua: he aha hoki te rawa o ta matou pupuri i ana mea, o ta matou haere pouri ano hoki i te aroaro o Ihowa o nga mano?
15
Na, inaianei ki ta matou ko te hunga whakakake nga mea koa, ko nga kai mahi ano hoki o te kino te hunga e whakaturia ana, a, nga mea e mawhiti ana, ko te hunga e whakamatautau ana i te Atua.
16
Na, te hunga i wehi i a Ihowa, kei te korerorero ratou ki tona hoa, ki tona hoa, a ka tahuri a Ihowa, ka whakarongo: na, ka tuhituhia he pukapuka whakamahara ki tona aroaro, mo te hunga i wehi ki a Ihowa, a i whakaaro ki tona ingoa.
17
Maku ano hoki ratou, e ai ta Ihowa o nga mano, i te ra e mahia ai e ahau aku taonga ake; ka manawapa ano ahau ki a ratou, ka pera ano me te tangata e manawapa ana ki tana tamaiti e mahi ana ki a ia.
18
Ko reira ano koutou hoki ai, kite ai i te rerenga ketanga o ta te tangata tika, o ta te tangata kino, o ta te tangata e mahi ana ki te Atua, o ta te tangata ano e kore nei e mahi ki a ia.