Nahum Chapter 1 - Paipera Tapu 1868 | Te Paipera Tapu 1868

Nahum Chapter 1 - Paipera Tapu 1868

1
Te poropititanga mo Ninewe. Te pukapuka o te mea i kitea e Nahumu Erekohi.
2
E hae ana te Atua, e rapu utu ana hoki a Ihowa; e rapu utu ana a Ihowa, e whakatakariri ana ia, ka rapu utu a Ihowa i ona hoa riri; ka mauahara ano ki ona hoa whawhai.
3
He aweke a Ihowa ki te riri, e nui ana tona kaha, e kore rawa e whakaharakoretia e ia te tangata hara. To Ihowa ara kei te tukauati, kei te paroro, ko nga kapua te puehu a ona waewae.
4
Tana riringa ki te moana, maroke tonu ake, nga awa katoa ano hoki maroke ake i a ia: kahore he kaha o Parana, o Karamere, te puawai o Repanona kaha-kore noa iho.
5
Wiri ana nga maunga i a ia, rewa ana nga pukepuke, te whenua ngiha tonu i tona aroaro, ae ra, te ao, me ona tangata katoa.
6
Ko wai e tu i mua i tana whakatakariri? ko wai hoki e whakatika ake, ina mura tana riri, kua oti tana weriweri te riringi atu, kei te ahi te rite, nga kamaka wahia iho e ia.
7
E pai ana a Ihowa, he pa kaha ia i te ra o te raru, e mohio ana hoki ia ki te hunga e whakawhirinaki ana ki a ia.
8
Ka whakamotitia rawatia ano e ia to reira wahi ki te waipuke e ngawha ana, ka whaia ano hoki ona hoa riri e te pouritanga.
9
Ko te aha ta koutou e whakaaro na ki a Ihowa? ka whakamotitia rawatia e ia, e kore e tuaruatia te putanga ake o te aitua.
10
I te mea hoki e pokai tonu ana ratou, ano he tataramoa, a, e haurangi ana, e rite ana ki te hunga haurangi, ka pau ratou, ano he kakau witi kua maroke.
11
Kua puta mai i roto i a koe tetahi e whakaaro ana i te he mo Ihowa, he kai whakatakoto i te whakaaro kino.
12
Ko te kupu tenei a Ihowa, Ahakoa ata noho ratou, a he tini ano ratou, ka pera ano to ratou tapahanga atu, ina tika atu ia i waenga. Ahakoa i whakawhiua koe e ahau, e kore koe e whakawhiua e ahau a muri ake nei.
13
Na, akuanei ka wahia atu e ahau tana ioka i runga i a koe, ka motuhia atu ano hoki e ahau o here.
14
He whakahau tenei na Ihowa mou, ara, kia kaua e whakatōkia tetahi o to ingoa a muri ake nei: ka hatepea atu e ahau te whakapakoko tarai me te whakapakoko whakarewa i roto i te whare o ou atua: ka hangā e ahau he urupa mou; no te mea he kino koe.
15
Nana, kei runga i nga maunga nga waewae o te kai kawe i te korero pai, o te kai kauwhau i te rongo mau. Whakaritea o hakari, e Hura, whakamanā o kupu taurangi: no te mea heoi ano haeretanga atu o te tangata kino i waenga i a koe; kua hatepea rawatia atu.