- 1
- Nga kupu a Nehemia tama a Hakaria. Na, i a Marama Kihireu i te rua tekau o nga tau, i a au ano i Huhana i te whare kingi.
- 2
- Ka tae mai a Hanani, tetahi o oku teina, ratou ko etahi tangata o Hura. Na, ka uia ratou e ahau ki nga Hurai i mawhiti, i mahue nei, o nga whakarau, ki Hiruharama ano hoki.
- 3
- Na, ko ta ratou kianga mai ki a au, Nga oranga i mahue i roto i nga whakarau i reira i taua kawanatanga, he nui te he, te whakahaweatanga i a ratou: te taiepa o Hiruharama kua pakarukaru; kua wera hoki ona kēti i te ahi.
- 4
- Na, taku rongonga i enei kupu, noho ana ahau, tangi ana, pouri ana a taka noa etahi ra, noho puku ana ahau, inoi ana ki te aroaro o te Atua o nga rangi.
- 5
- I mea hoki ahau, Aue, e Ihowa, e te Atua o te rangi, ko te Atua nui hoki ia e wehingia ana e pupuri nei i te kawenata, me te atawhai mo te hunga e aroha ana ki a ia, a e pupuri ana i ana whakahaunga:
- 6
- Tena, kia tahuri mai tou taringa, kia titiro mai ano hoki ou kanohi; whakarangona mai te inoi a to pononga, e inoi atu nei ahau ki tou aroaro i te ao, i te po, mo o pononga, mo nga tamariki a Iharaira; i a au ano e whaki atu nei i nga hara o nga tamariki a Iharaira i hara ai matou ki a koe; ko ahau me te whare ano o toku pāpā, kua hara matou.
- 7
- Hē rawa ta matou mahi ki a koe, kihai hoki i puritia e matou nga whakahaunga, nga tikanga, me nga whakaritenga i whakahaua e koe ki to pononga ki a Mohi.
- 8
- Tena, maharatia te kupu i whakahaua e koe ki to pononga ki a Mohi, ki to kianga ra, Ki te poka ke ta koutou, ka whakamararatia atu koutou e ahau ki roto ki nga iwi.
- 9
- Na, ki te tahuri mai koutou ki a au, a ka pupuri i aku whakahaunga, ka mahia hoki e koutou, ahakoa i peia atu etahi o koutou ki te pito whakamutunga o te rangi, ka kohikohia mai ratou e ahau i reira, ka kawea mai ano ki te wahi i whiriwhiria e ahau kia noho toku ingoa ki reira.
- 10
- Ko o pononga ano hoki ratou, ko tou iwi i hokona e koe, ara, e tou kaha nui, e tou ringa kaha.
- 11
- Tena, e te Ariki, tahuri mai tou taringa ki te inoi a to pononga, ki te inoi hoki a o pononga e mea nei kia wehi i tou ingoa: kia tika ra ta to pononga aianei, homai hoki ki a ia kia atawhaitia e tenei tangata. Ko au hoki te kai riringi waina a te kingi.
Address: 
Phone: 
Email: