Nehemiah Chapter 4 - Paipera Tapu 1868 | Te Paipera Tapu 1868

Nehemiah Chapter 4 - Paipera Tapu 1868

1
Na, te rongonga o Hanaparata, kei te hanga matou i te taiepa, ka riri ia, nui atu te whakatakariri, ka whakahi mai ki nga Hurai.
2
Na, ka korero ia i te aroaro o ona teina, o te ope ano hoki o Hamaria, ka mea, E aha ana enei Hurai kaha-kore? e hanga pa ranei ratou? e mea patunga tapu ranei ratou? e oti ranei i a ratou i te ra kotahi? e whakaorangia ake ranei e ratou nga kohatu i roto i nga puranga paru kua oti na te tahu?
3
Na, kei tona taha a Topia Amoni, ka mea ia, Taua mea na hoki e hangā na e ratou, ki te piki atu tetahi pokiha, ka pakaru ta ratou taiepa kohatu.
4
Whakarongo mai, e to matou Atua, e whakahaweatia ana hoki matou, whakahokia iho ano hoki ta ratou taunutanga ki runga ki to ratou upoko; hoatu ano ratou hei taonga parakete ki te whenua e whakaraua ai ratou.
5
Kei hipokina ano hoki ta ratou he, kaua ano to ratou hara e murua atu i tou aroaro; mo ratou i whakapataritari i te aroaro o nga kai hanga.
6
Na, hangā ana e matou te taiepa, a ka honoa te taiepa katoa; ko te hawhe ano o tona tiketike: he ngakau hoki to te iwi ki te mahi.
7
A, te rongonga o Hanaparata, o Topia, o nga Arapi, o nga Amoni, o nga Aharori, kua neke ake, kua oti nga taiepa o Hiruharama, a, kua timata nga wahi pakaru te kapi, na nui atu ta ratou riri.
8
Na ka whakatupu ngatahi ratou katoa i te hē, kia haere mai ki te whawhai ki Hiruharama, whakaware ai.
9
Heoi inoi ana matou ki to matou Atua, whakaturia ana e matou etahi kai tiaki, hei mea ki a ratou, i te ao, i te po, i te wehi hoki i a ratou.
10
Na, ka mea mai a Hura, Kua hemo te kaha o nga kai pikau, e nui ana hoki te paru; e kore matou e kaha ki te hanga i te taiepa.
11
I mea ano o matou hoa riri, E kore ratou e mohio, e kore e kite, kia tae atu ra ano tatou ki waenganui i a ratou, ko reira tatou tukituki ai i a ratou, whakamutu ai hoki i te mahi.
12
Na, te taenga mai o nga Hurai e noho ana i to ratou taha, tekau a ratou meatanga mai ki a matou, Nga wahi katoa e hoki mai ai koutou ki a matou, kei reira ano ratou.
13
Na, whakaturia ana e ahau ki nga wahi o raro, ki tua mai o te taiepa, ki nga wahi tiketike ano hoki, whakaturia ana e ahau te iwi, tenei hapu, tenei hapu o ratou, i a ratou ano ā ratou hoari, ā ratou tao, ā ratou kopere.
14
Na, ka titiro ahau, a ka whakatika ki runga, ka mea ki nga rangatira, ki nga tangata nunui, ki era atu ano o te iwi, Kaua e wehi ki a ratou. Kia mahara ki te Ariki ki te mea nui e wehingia ana, ka whawhai kia ora ai o koutou tuakana, teina, ā koutou tamariki, ā koutou tamahine, ā koutou wahine, me o koutou whare.
15
A, te rongonga o o matou hoa riri kua mohiotia tera e matou, a, kua whakatakā e te Atua a ratou whakaaro, na, hoki ana matou katoa ki te taiepa ki tana mahi, ki tana mahi.
16
No taua rangi ano ko tetahi tānga o aku tangata hei mahi i te mahi, a ko tetahi tānga o ratou hei pupuri i nga tao, i nga whakangungu rakau, i nga kopere, i nga pukupuku, i muri hoki nga rangatira i te whare katoa o Hura.
17
Ko nga kai hanga i te taiepa, me nga kai waha i nga pikaunga, me nga kai whakawaha, kotahi te ringa o tenei, o tenei, ki te mahi i te mahi, a kotahi hei pupuri i te patu.
18
Na, nga kai hanga, whitiki rawa tana hoari ki tona taha, ki tona taha; na, hanga ana ratou: i toku taha ano hoki ko te kai whakatangi tētere.
19
I mea atu ano ahau ki nga rangatira, ki nga tangata nunui, ki era atu ano hoki o te iwi, He nui te mahi, he tatahi noa atu, kua tohatoha noa atu ano tatou ki te taiepa, matara noa atu tetahi i tetahi.
20
Te wahi e rongo ai koutou i te tangi o te tētere, me huihui koutou ki a matou ki reira: ma to tatou Atua ta tatou pakanga.
21
Na, mahia ana e matou te mahi, ko tetahi tānga ki te pupuri tao, no te huakanga ake ano o te ata, a, puta noa mai nga whetu.
22
I mea ano hoki ahau ki te iwi i taua wa, Kia moe tenei tangata, tenei tangata, me tana pononga ano, ki roto ki Hiruharama, a ka ai ratou hei kai tiaki mo tatou i te po, hei mahi ano hoki i te awatea.
23
Na, ahau, aku teina, aku pononga, me nga kai tiaki i whai mai nei i a au, kihai i whakarerea atu o matou kakahu. Mau tonu te patu a tenei a tenei i te haerenga ki te wai.