- 1
- Na, ka huihui mai te iwi katoa, ano he tangata kotahi, ki te huarahi i te kuwaha wai, a ka mea ki a Etera karaipi kia mauria mai te pukapuka o te ture a Mohi, o tera i whakahaua mai e Ihowa ki a Iharaira.
- 2
- Na, ka mauria mai e Etera tohunga te ture ki te aroaro o te whakaminenga, o te tane, o te wahine, o te hunga katoa e mohio ana ki te whakarongo, i te ra tuatahi o te whitu o nga marama.
- 3
- Na, ka korerotia taua pukapuka e ia i te ahunga mai o te ara i te aronga atu o te kuwaha wai, i te ata iho ano, a taea noatia a waenganui o te ra, i te aroaro o nga tane, o nga wahine, o te hunga whai whakaaro. Na, tau tonu mai nga taringa o te iwi katoa ki te pukapuka o te ture.
- 4
- I te tu ano hoki a Etera karaipi i runga i te turanga rakau i hangā nei e ratou hei mea pera, me te tu ano a Matitia, a Hema, a Anaia, a Uria, a Hirikia, a Maaheia ki tona taha ki matau; a, i tona taha ki maui, ko Peraia, ko Mihaera, ko Marakia, ko Hahumu, ko Hahaparana, ko Hakaraia, ko Mehurama.
- 5
- Na, wherahia ana e Etera te pukapuka i te aroaro o te iwi katoa, i runga hoki ia i te iwi katoa, a i tana wherahanga, tu ana te iwi katoa ki runga.
- 6
- Na, ka whakapai atu a Etera ki a Ihowa ki te Atua nui; a ka whakahokia mai e te iwi katoa, Amine, Amine, me te ara ano o ratou ringa ki runga: na, tuohu ana ratou, koropiko ana ki a Ihowa, me te ahu ano nga kanohi ki te whenua.
- 7
- Ko Hehua ano hoki, ko Pani, ko Herepia, ko Iamini, ko Akupu, ko Hapetai, ko Horiia, ko Maaheia, ko Kerita, ko Ataria, ko Iotapara, ko Hanana, ko Peraia, me nga Riwaiti, kei te mea ratou i te iwi kia mohio i te ture: tu tonu hoki tera te iwi.
- 8
- A, mārama tonu ta ratou korerotanga i te pukapuka o te ture, me te whakaatu ano i nga tikanga, me te mea ano i a ratou kia mohio ki te korerotanga.
- 9
- Na ka mea a Nehemia, ko ia hoki te kawana, ratou ko Etera, he tohunga nei ia, he karaipi, ratou ko nga Riwaiti i whakaako nei i te iwi, ki te iwi katoa, He ra tapu tenei no Ihowa no to koutou Atua; kaua e tangi, kaua e pouri. I te tangi hoki te iwi katoa i to ratou rongonga ai i nga kupu o te ture.
- 10
- I mea ano ia ki a ratou, Haere koutou, e kai i nga mea momona, inumia nga mea reka, hoatu ano hoki etahi wahi kia kawea ma te hunga kahore nei i takā he mea ma ratou; he ra tapu hoki tenei no to tatou Ariki; kaua hoki e pouri; kei te koa hoki ki a Ihowa he kaha mo koutou.
- 11
- I whakamarie ano hoki nga Riwaiti i te iwi katoa, i mea, Whakarongoa; e tapu ana hoki te ra nei, kaua hoki e pouri.
- 12
- Na, haere ana te iwi katoa ki te kai, ki te inu, ki te hoatu i etahi wahi ma etahi, ki te whakanui hoki i te hari, no ratou ka mohio ki nga kupu i whakapuakina nei ki a ratou.
- 13
- Na, i te rua o nga ra ka huihui mai nga ariki o nga mātua o te iwi katoa, ratou ko nga tohunga, ko nga Riwaiti, ki a Etera karaipi, kia mohiotia ai nga kupu o te ture.
- 14
- Na, ka kitea e ratou he mea i tuhituhia ki roto ki te ture i whakahaua e Ihowa, ki ta Mohi i whakapuaki ai, ara, kia noho nga tamariki a Iharaira ki nga tihokahoka i te hakari i te whitu o nga marama.
- 15
- Kia karanga nui hoki ratou kia pakū te reo ki o ratou pa katoa, ki Hiruharama ano hoki, kia mea ratou, Haere ki te maunga, tikina atu nga rau oriwa, nga rau o nga rakau hinu, nga rau marita, nga rau nikau, nga rau o nga rakau rau maha, hei hanga mo nga tihokahoka, kia rite ai ki te mea i tuhituhia.
- 16
- Na, kua puta te iwi ki waho, kei te tiki, hangā ana e ratou he tihokahoka mo ratou ki runga ki te tuanui o te whare o tenei tangata, o tenei tangata, ki o ratou marae, ki nga marae ano hoki o te whare o te Atua, ki te huarahi o te kuwaha wai, ki te huarahi o te kuwaha Eperaima.
- 17
- Na, kua hangā he tihokahoka e te whakaminenga katoa o te hunga i hoki mai i te whakarau, a noho ana i raro i nga tihokahoka: kihai hoki nga tamariki a Iharaira i pera, o nga rangi ra ano i a Hehua tama a Nunu, a taea noatia taua ra. A nui whakaharahara te koa.
- 18
- I korerotia ano hoki e ia te pukapuka o te ture a te Atua i tenei ra, i tenei ra, i te ra tuatahi ano, a tae noa ki te ra whakamutunga. Na, e whitu nga ra i whakarite ai ratou i te hakari, a, i te waru o nga ra ko te huihuinga nui, ko te mea i whakaritea.
Address: 
Phone: 
Email: