Numbers Chapter 2 - Paipera Tapu 1868 | Te Paipera Tapu 1868

Numbers Chapter 2 - Paipera Tapu 1868

1
A i korero mai a Ihowa ki a Mohi raua ko Arona, i mea,
2
Me whakatu tona teneti e ia tangata e ia tangata o nga tamariki a Iharaira, ki te taha o a ratou kara, ki te tohu o nga whare o o ratou mātua: kia matara atu i te tapenakara o te whakaminenga te turanga o o ratou teneti, a, tawhio noa.
3
Ki te taha ki te rawhiti, ara, ki te putanga mai o te ra, whakatu ai nga tangata o te kara o te puni o Hura, puta noa i o ratou ope: ko Nahahona hoki tama a Aminarapa, hei rangatira mo nga tamariki a Hura.
4
A ko tana ope, nga mea hoki o ratou i taua, e whitu tekau ma wha mano e ono hoki nga rau.
5
A ko nga mea e whakatu ki tona taha, ko te iwi o Ihakara: a ko Netaneere tama a Tuara, hei rangatira mo nga tamariki a Ihakara.
6
Ko tana ope hoki, nga mea hoki o ratou i taua, e rima tekau ma wha nga mano e wha nga rau.
7
Na, ko te iwi o Hepuruna: a ko Eriapa tama a Herona, hei rangatira mo nga tamariki a Hepuruna.
8
A ko tana ope, nga mea hoki o ratou i taua, e rima tekau ma whitu mano e wha nga rau.
9
Nga tangata katoa i taua o te puni o Hura kotahi rau mano e waru tekau mano e ono mano me nga rau hoki e wha, puta noa i a ratou ope. Ko enei e haere wawe.
10
Hei te taha ki te tonga te kara o te puni o Reupena, puta noa i a ratou ope: a ko Erituru tama a Hereuru, hei rangatira mo nga tamariki a Reupena.
11
A ko tana ope, nga mea hoki o ratou i taua, e wha tekau ma ono mano me nga rau e rima.
12
A ko nga mea e whakatu ki tona taha ko te iwi o Himeona: a ko Herumiere tama a Turiharai, hei rangatira mo nga tamariki a Himeona.
13
Ko tana ope hoki, nga mea hoki o ratou i taua, e rima tekau ma iwa mano me nga rau e toru.
14
Ko reira te iwi o Kara: a ko Eriahapa tama a Reuere, hei rangatira mo nga tamariki a Kara.
15
A ko tana ope, nga mea hoki o ratou i taua, e wha tekau ma rima mano e ono hoki nga rau e rima tekau.
16
Nga tangata katoa i taua o te puni o Reupena kotahi rau mano e rima tekau ma tahi mano e wha hoki rau e rima tekau, puta noa i a ratou ope. Me haere atu ratou hei tuarua mo nga matua.
17
Ko reira maunu atu ai te tapenakara o te whakaminenga, ko te puni o nga Riwaiti ki waenganui o te puni: kia rite to ratou haerenga ki to ratou nohoanga iho, tenei tangata tenei tangata i tona wahi ano i te taha ano o o ratou kara.
18
Hei te taha ki te hauauru te kara o te puni o Eperaima, puta noa i a ratou ope: a ko te rangatira mo nga tamariki a Eperaima, ko Erihama tama a Amihuru.
19
A ko tona ope, nga mea hoki o ratou i taua, e wha tekau mano e rima hoki nga rau.
20
A ki tona taha ko te iwi o Manahe: a ko te rangatira mo nga tamariki a Manahe ko Kamariere, ko te tama a Peraturu.
21
A ko tana ope, nga mea hoki o ratou i taua, e toru tekau ma rua mano e rua hoki nga rau.
22
Ko reira te iwi o Peniamine: a ko te rangatira mo nga tamariki a Peniamine ko Apirana tama a Kireoni.
23
A ko tana ope, nga mea hoki o ratou i taua, e toru tekau ma rima mano e wha hoki nga rau.
24
Nga tangata katoa i taua o te puni o Eperaima kotahi rau mano e waru hoki nga mano kotahi rau, puta noa i a ratou ope. A ka hapainga atu ratou hei tuatoru mo nga matua.
25
Hei te taha ki te nota te kara o te puni o Rana, puta noa i o ratou ope: a ko te rangatira mo nga tamariki a Rana ko Ahietere tama a Amiharai.
26
A ko tana ope, nga mea hoki o ratou i taua, e ono tekau ma rua mano e whitu nga rau.
27
A ko nga mea e noho ki tona taha ko te iwi o Ahera: te rangatira mo nga tamariki a Ahera ko Pakiere tama a Okorana.
28
A ko tana ope, nga mea hoki o ratou i taua, e wha tekau nga mano kotahi mano e rima hoki nga rau.
29
Ko reira te iwi o Napatari: a ko te rangatira mo nga tamariki a Napatari ko Ahira tama a Enana.
30
A ko tana ope, nga mea hoki o ratou i taua, e rima tekau ma toru mano e wha hoki nga rau.
31
Nga mea katoa i taua o te puni o Rana, kotahi rau mano e rima tekau ma whitu mano, me nga rau hoki e ono. Hei muri rawa ratou haere ai, me a ratou kara.
32
Ko nga mea enei o nga tamariki a Iharaira i taua, puta noa i nga whare o o ratou matua: ko nga mea katoa i taua o nga puni, puta noa i o ratou ope, e ono rau mano e toru mano e rima rau e rima tekau.
33
Ko nga Riwaiti ia, kihai ratou i taua i roto i nga tamariki a Iharaira; ko ta Ihowa hoki tena i whakahau ai ki a Mohi.
34
Na, ka meatia e nga tamariki a Iharaira nga mea katoa i whakahaua mai e Ihowa ki a Mohi: pera tonu to ratou nohoanga iho ki te taha o a ratou kara, pera tonu hoki ta ratou hapainga atu, tenei tangata tenei tangata i roto i tona hapu ano, rite tonu ki nga whare o o ratou mātua.