Philippians Chapter 4 - Paipera Tapu 1868 | Te Paipera Tapu 1868

Philippians Chapter 4 - Paipera Tapu 1868

1
Na, e aku teina aroha, e hiahiatia atu nei, e toku haringa, e toku karauna, tena ra, e tu i runga i te Ariki, e aku hoa aroha.
2
He kupu tenei naku ki a Uoria, he kupu ano tenei ki a Hinatiki, kia kotahi to raua whakaaro i roto i te Ariki.
3
Na, he tohe tenei naku ki a koe, e toku hoa pono ki te mahi, ko koe hei whakamāmā i to raua, he hunga raua i uru tahi ki taku tohe ki nga mea o te rongo pai, ratou tahi ko Keremeneta, ko era atu hoki o aku hoa mahi, kei roto nei i te pukapuka o te ora o ratou ingoa.
4
Kia hari tonu i roto i te Ariki: ko taku kupu ano tenei, Kia hari.
5
Kia mohiotia o koutou ngakau ngawari e nga tāngata katoa: Kua tata te Ariki.
6
Kaua e manukanuka ki tetahi mea; engari i nga mea katoa me karakia me inoi me whakawhetai, i a koutou e whakaatu ana i ā koutou inoinga ki te Atua:
7
A ma te marie o te Atua, e kore nei e taea te whakaaro, e tiaki o koutou ngakau o koutou hinengaro, i roto i a Karaiti Ihu.
8
Heoi, e aku teina, ko nga mea e pono ana, ko nga mea e whakaaroa ana, ko nga mea e tika ana, ko nga mea e kino kore ana, ko nga mea e ataahua ana, ko nga mea e korerotia paitia ana; ki te mea he pai, ki te mea he whakamoemiti; whakaaroa enei mea.
9
A, nga mea i whakaakona ki a koutou, i riro i a koutou, i rongo ai i kite ai ki a au, mahia enei: a ka noho te Atua o te rangimarie ki a koutou.
10
Na, nui atu taku hari i roto i te Ariki, mo to koutou whakaaro ki a au katahi nei ka pihi ake ano; he mea ano ia i whakaaroa e koutou i mua, otiia kihai i whai meatanga.
11
Ehara i te rawakoretanga taku e korero nei: kua ako hoki ahau, kia tatū toku ngakau i aku aha katoa.
12
Te whakahoki i a au ki raro, mātau tonu i a au; te whai rawa, mātau tonu i a au: i nga wahi katoa, i nga mea katoa, ka oti ahau te whakaako, kia makona, kia mate i te kai, kia whai rawa, kia rawakore ranei.
13
Ka taea e ahau nga mea katoa, he mea na te Karaiti e whakakaha nei i a au.
14
He ahakoa ra, he pai ta koutou mahi, i a koutou i uru nei ki toku mate.
15
Na, e mātau ana ano ra koutou, e nga Piripai, i te orokomeatanga o te rongo pai, i taku haerenga atu i Makeronia, kahore he hahi i uru ki taku, ara ki te tikanga mo tetahi mea kia homai kia riro atu ranei, ko koutou anake.
16
I Teharonika ano hoki kotahi e rua a koutou homaitanga i nga mea i matea e ahau, kia kawea mai maku.
17
Ehara i te mea e whai ana ahau i tetahi mea kia homai; engari e whai ana ahau kia maha nga hua hei mea ma koutou.
18
Otiia kei a au nei nga mea katoa, hira noa ake hoki aku: kua kī ahau, tenei kei a au a koutou mea i a Epaporitu, he kakara reka, he patunga tapu e manakohia ana, ta te Atua e ahuareka mai ai.
19
A ma toku Atua e mea kia rite te maha o nga mea katoa e matea ana e koutou, kia rite ki te nui o tona kororia, i roto i a Karaiti Ihu.
20
Na, waiho i te Atua, ara i to tatou Matua, te kororia, ake ake ake. Amine.
21
Oha atu ki te hunga tapu katoa i roto i a Karaiti Ihu. He ohatanga atu tenei ki a koutou na nga teina i a au nei.
22
He ohatanga atu tenei ki a koutou na te hunga tapu katoa, tenei rawa ia ta te hunga o te whare o Hiha.
23
Kia tau te aroha noa o to tatou Ariki o Ihu Karaiti ki a koutou katoa. Amine.