- 1
- Nga whakatauki a Horomona tama a Rawiri, kingi o Iharaira;
- 2
- E mohiotia ai te whakaaro nui, te ako, e kitea ai nga kupu o te matauranga.
- 3
- E riro mai ai te akoranga a te ngakau mahara, te tika, te whakarite whakawa, te mea ano e rite ana.
- 4
- Hei hoatu i te ngakau tupato ki nga kuare, i te matauranga me te ngarahu pai ki te taitamariki.
- 5
- Ta te tangata whakaaro nui, he whakarongo kia maha ai ana kupu mohio, te tangata tupato, ka whiwhi ia ki nga whakaaro mohio:
- 6
- E mohio ai ia ki te whakatauki me tona tikanga, ki nga kupu a nga mea whakaaro nui, me a ratou korero whakapeka.
- 7
- Ko te wehi ki a Ihowa te timatanga o te matauranga; e whakahawea ana te whakaaro-kore ki te whakaaro nui, ki te ako.
- 8
- Whakarongo, e taku tamaiti, ki te ako a tou pāpā, kaua hoki e whakarerea te ture a tou whaea.
- 9
- A ka waiho hei whakapaipai ataahua mo tou mātenga, hei mekameka whakapaipai mo tou kaki.
- 10
- E taku tamaiti, ki te whakawaia koe e te hunga hara, kaua e whakaae atu.
- 11
- Ki te mea ratou, Tatou ka haere, ka whakapapa atu, ka whakaheke toto; kia whanga puku tatou, he mea take-kore, mo te tangata hara-kore:
- 12
- Ka horomia oratia ratou e tatou, ka peratia me ta te rua tupapaku, ka riro tinana ratou, ka pera me te hunga e heke atu ana ki te poka:
- 13
- Ka kitea e tatou nga taonga utu nui katoa, ka whakakiia o tatou whare ki ta tatou e pahua ai:
- 14
- Makā mai tau wahi ki roto ki ta matou; kia kotahi te putea ma tatou katoa.
- 15
- E taku tamaiti, kaua e haere tahi koutou i te ara; kaiponuhia mai tou waewae ki to ratou huarahi.
- 16
- E rere ana hoki o ratou waewae ki te kino, e hohoro ana ki te whakaheke toto.
- 17
- He pono he mea maumau te hora o te kupenga ki te tirohanga a tetahi manu.
- 18
- Ko ratou, he whakaheke i o ratou toto ano i whakapapa ai ratou, he whakamate i a ratou ano i piri ai ratou.
- 19
- Ka pena ano nga huarahi o te hunga katoa e apo ana i te taonga, ara, i te kai whakamate o ona rangatira.
- 20
- E karanga ana te whakaaro nui i waho, e puaki ana tona reo i nga waharoa.
- 21
- E karanga ana ia i nga wahi nui o nga whakaminenga, i nga wahi tuwhera o nga kuwaha: e korero ana ia i ana korero i roto i te pa,
- 22
- E te hunga kuare, kia pehea ake te roa o to koutou aroha ki te kuaretanga? e hiahia tonu ranei te hunga whakahi ki to ratou whakahi? e whakakino tonu ranei te hunga wairangi ki te matauranga?
- 23
- Tahuri mai ki taku ako. Na, ka ringitia atu e ahau toku wairua ki a koutou, ka whakaaturia atu aku kupu ki a koutou.
- 24
- Na, i karanga atu ahau, heoi kihai koutou i pai mai, i totoro atu toku ringa, a kihai tetahi i whai whakaaro mai;
- 25
- Heoi whakakahoretia iho e koutou taku whakaaro katoa, kihai hoki koutou i aro mai ki taku ako.
- 26
- No reira ka kata ano ahau ki to koutou aitua, ka tawai atu ina pa mai te pawera ki a koutou;
- 27
- Ina tae mai to koutou pawera ano he whakangaromanga, a ka pa mai to koutou aitua ano he paroro; ina tae mai te he me te ngakau mamae ki a koutou.
- 28
- Ko reira ratou karanga ai ki a au, a e kore ahau e whakao atu; ka rapu wawe ratou i a au, otiia e kore ahau e kitea e ratou:
- 29
- Mo ratou i kino ki te matauranga; kihai hoki i whiriwhiria e ratou te wehi ki a Ihowa;
- 30
- Kihai i aro mai ki aku whakaaro; whakahawea ana ratou ki taku kupu riri katoa.
- 31
- Na ka kainga e ratou nga hua o to ratou ara, ka whakakiia ano hoki ki nga mea i titoa e ratou.
- 32
- Ko te tahuritanga atu hoki o nga kuare hei patu i a ratou; ko te ngakau tatu ano hoki o nga wairangi hei huna i a ratou.
- 33
- Te tangata ia e rongo ana ki a au, ka au tana noho, ka atea ano hoki i te wehi ki te kino.
Address: 
Phone: 
Email: