Proverbs Chapter 12 - Paipera Tapu 1868 | Te Paipera Tapu 1868

Proverbs Chapter 12 - Paipera Tapu 1868

1
Te tangata e aroha ana ki te kupu ako e aroha ana ki te matauranga; na, te tangata e kore e pai kia riria tona he, he poauau tera.
2
Te tangata pai ka whiwhi ki ta Ihowa whakapai, ka whakahengia ano hoki e ia te tangata ngarahu kino.
3
E kore ta te tangata e u i te kino: na, te pakiaka o te hunga tika, e kore tera e whakakorikoria.
4
He wahine e u ana tona pai, hei karauna tera ki tona tane, tena ko te wahine i whakama ai ia, hei pirau tera i roto i ona wheua.
5
To nga whakaaro o te hunga tika he whakarite whakawa, to nga whakaaro o te hunga kino he tinihanga.
6
Nga kupu a te hunga kino mo te whanga atu i te toto: ma te mangai ia o te hunga tika ratou ka ora ai.
7
Ka hurihia iho te hunga kino, a kore iho; te whare ia o te hunga tika ka tu tonu.
8
Ka rite ki tona ngarahu te whakamoemiti mo te tangata; te ngakau parori ke ia ka whakahaweatia.
9
He tangata e whakahaweatia ana, a he pononga ano tana, engari rawa ia i te tangata e whakanui ana i a ia, a kahore ana kai.
10
Te tangata tika e whakaaro ana ia ki te ora o tana kararahe, he nanakia ia nga mahi atawhai o te hunga kino.
11
Te tangata e mahi ana i tona oneone ka makona i te taro, tena ko te tangata e whai ana i te hunga tekateka noa, kahore ona ngakau.
12
Ta te tangata kino e minamina ai ko te kupenga a te hunga kino; e whai hua ana ia te pakiaka o te hunga tika.
13
Ka mau te tangata kino i te pokanga ketanga o ona ngutu, ka puta mai ia te tangata tika i roto i te raru.
14
Ma nga hua o tona mangai ka makona ai te tangata i te pai; ka riro mai ano i te tangata nga utu o ta ona ringaringa.
15
Tika kau ki ona kanohi ake te ara o te kuare; he whakaaro nui ia to te tangata e whakarongo ana ki te kupu whakatupato.
16
Te kuare, e mohiotia wawetia ana tana riri: e hipokina ana ia te whakama e te tangata ngarahu tupato.
17
Ta te tangata korero pono he whakapuaki i te tika; ta te kai whakaatu teka ia he tinihanga.
18
He tangata ano ko ana korero kei nga werohanga a te hoari; he rongoa ia te arero o te hunga whakaaro nui.
19
Ka u tonu te ngutu pono a ake ake ake; moanaianei kau ia te arero teka.
20
He kino kei roto i te ngakau o nga kai tito i te kino; he koa ia to nga kai whakatakoto korero e mau ai te rongo.
21
E kore tetahi kino e pa ki te tangata tika; engari te hunga kino ka ki i te kino.
22
He mea whakarihariha na Ihowa nga ngutu teka; tana e ahuareka atu ai ko nga kai mahi i te pono.
23
Ta te tangata ngarahu tupato he hipoki i te matauranga; na, e karangatia nuitia ana te kuaretanga e te ngakau o nga kuare.
24
Mo te ringa o te hunga uaua te kingitanga, hei homai takoha ia te mangere.
25
Ma te pouri i roto i te ngakau o te tangata e piko ai ia: ma te kupu pai ia ka mārama ai.
26
Hira ake te tangata tika i tona hoa; te hunga kino ia ka whakapohehetia e to ratou ara ano.
27
Kahore he tununga ma te tangata mangere i tona mea i hopu ai; he utu nui ia nga rawa o te tangata uaua.
28
He ora kei te ara o te tika; kahore hoki he mate i tona ara e haere ai.