Proverbs Chapter 23 - Paipera Tapu 1868 | Te Paipera Tapu 1868

Proverbs Chapter 23 - Paipera Tapu 1868

1
Ki te noho korua ko te rangatira ki te kai, ata whakaaroa marietia nga mea i tou aroaro:
2
Whakapakia he maripi ki tou korokoro, ki te mea he tangata kakai koe.
3
Kei hiahia koe ki ana mea reka: he kai tinihanga hoki tera.
4
Kaua e taruke ki te mea taonga: kati to mea atu ki to matauranga.
5
E anga ranei ou kanohi ki taua mea korekore nei? Tona mea whai parirau hoki he taonga, koia ano kei te ekara, rere ana whaka-te-rangi.
6
Kaua e kainga te kai a te tangata kanohi kino, kei minamina hoki koe ki ana mea reka:
7
Na, tana e whakaaro ai i roto i tona ngakau, pera tonu ia. Tana kupu ki a koe, E kai, e inu, kahore ia ona ngakau ki a koe.
8
To kongakonga i kainga e koe, ka ruakina ano e koe, ka maumauria ano hoki o kupu reka.
9
Kaua e korero ki nga taringa o te kuare; ka whakahawea hoki ia ki o kupu mohio.
10
Kei whakanekehia e koe te rohe tawhito; kei haere koe ki nga mara a te pani.
11
No te mea e kaha ana to ratou kai whakaora, ka tohea e ia ta ratou tohe ki a koe.
12
Anga atu tou ngakau ki te ako, me ou taringa ki nga kupu o te matauranga.
13
Kaua e kaiponuhia te whiu ki te tamaiti: ki te patua hoki ia e koe ki te rakau, e kore ia e mate.
14
Me patu ano ia e koe ki te rakau, kia whakaorangia ai e koe tona wairua i te reinga.
15
E taku tamaiti, ki te mea ka nui nga whakaaro a tou ngakau, ka koa toku ngakau, ae ra, ahau ano.
16
Ka hari ano hoki oku whatumanawa, ina korero ou ngutu i nga mea tika.
17
Kei hae tou ngakau ki te hunga hara: engari kia wehi koe ki a Ihowa, a pau noa te ra.
18
Kua rite rawa hoki he mutunga; e kore ano hoki tau i tumanako atu ai e hatepea atu.
19
Whakarongo ra, e taku tamaiti, kia nui ano ou whakaaro; whakatikaia ano hoki tou ngakau i te ara.
20
Kei uru koe ki roto ki te hunga iinu waina, ki te hunga kakai kikokiko.
21
No te mea ka rawakoretia te tangata kakai, te tangata iinu; he tawhetawhe hoki ta te momoe kakahu mo te tangata.
22
Whakarongo ki tou pāpā i whanau ai koe, kaua hoki e whakahawea ki tou whaea ina ruruhitia.
23
Hokona te pono, kaua hoki e whakawhitiwhitia; te whakaaro nui ano, te ako ano hoki, me te matauranga.
24
Nui atu te koa o te pāpā o te tangata tika; i whanau he tamaiti whakaaro nui ma tetahi tangata, ka hari ia ki a ia.
25
Ka hari tou pāpā raua ko tou whaea, ina, ka koa te wahine i whanau ai koe.
26
Homai, e taku tamaiti, to ngakau ki a au, kia manako ano hoki ou kanohi ki oku ara.
27
No te mea he rua hohonu te wahine puremu, he poka kuiti ano te wahine ke.
28
Me te mea he taonga hei pahuatanga te whangā ana e ia, e whakatokomahatia ana e ia nga kai poka ke i roto i nga tangata.
29
Ko wai e aue? Ko wai e tangi? Ko wai e totohe? Ko wai e ngangautia? Ko wai e maru, he mea take-kore? Ko wai e whero tonu ona kanohi?
30
Te hunga ra e noho roa ana ki te waina, te hunga e haere ana ki te rapu i te waina whakaranu.
31
Kaua e titiro atu ki te waina i te mea e whero ana, ina puta mai tona kara i roto i te kapa, ina tika tona haere.
32
Tona tukunga iho, ano he nakahi e ngau ana; koia ano kei te wero a te neke.
33
E kite ano ou kanohi i nga wahine ke, ka puta ke ano hoki nga kupu a tou ngakau.
34
Ka rite ano koe ki te tangata e takoto ana i waenganui o te moana, ki te tangata ranei e takoto ana i te pito ki runga o te rewa.
35
Ka ki ake ano koe, Patua ana ahau e ratou, kihai hoki ahau i mamae; tukitukia ana ahau e ratou, kihai ano ahau i mohio ake: ahea ahau ara ake ai? Ka rapua ano hoki e ahau.