- 1
- Whakapaingia a Ihowa, e toku wairua: E Ihowa, e toku Atua, e tino nui ana koe; he honore, he kororia o kakahu.
- 2
- E roropi mai nei i te māramatanga, ano he kakahu ki a ia, e hora nei i nga rangi, ano he kakahu tauarai.
- 3
- E whakanoho nei i ona ruma ki nga wai: e mea nei i nga kapua, hei hariata mona: e haere ana i runga i nga pakau o te hau.
- 4
- E mea nei i nga hau hei anahera mana, i te mura ahi hei kai mahi mana.
- 5
- Nana nei i whakatu te whenua ki runga ki ona turanga, kei nekenekehia ake ake.
- 6
- Nau ano i hipoki ki te rire, hei kakahu: tu ake nga wai i runga ake i nga maunga.
- 7
- I to whakatupehupehunga rere ana ratou: hohoro tonu atu i te reo o te whatitiri.
- 8
- Puke ake ana nga maunga: wharuarua iho nga awaawa ki te wahi i whakaritea e koe mo ratou.
- 9
- Kua whakatakotoria e koe he rohe kei koni mai, kei hoki mai hei taupoki mo te whenua.
- 10
- Ko ia te kai tono i nga puna ki roto ki nga awaawa, e rere nei i roto i nga puke.
- 11
- Hei wai ma nga kirehe katoa o te parae: na noa te mate-wai o nga kaihe mohoao.
- 12
- Kei reira nga nohoanga o nga manu o te rangi, e korihi nei i roto i nga manga.
- 13
- E whakamakukuria iho ana e ia nga puke i runga i ona ruma: ka makona te whenua i nga hua o au mahi.
- 14
- Ko ia hei whakatupu i te tarutaru ma te kararehe, i te otaota hoki hei mahinga ma te tangata;
- 15
- Kia whakaputaina ake ai he taro i roto i te whenua, me te waina hoki hei whakahari i te ngakau o te tangata, me te hinu e towahiwahi ai tona mata, me te taro ano hei whakakaha i te ngakau o te tangata.
- 16
- Ki tonu i te wai nga rakau a Ihowa, nga hita o Repanona i whakatokia e ia.
- 17
- Hangā ake e nga manu nga ohanga ki reira: te tāka, ko nga kauri tona whare.
- 18
- Hei piringa nga puke tiketike mo nga koati mohoao: nga kohatu mo nga rapeti.
- 19
- I hangā e ia te marama hei tohu taima: e matau ana te ra ki tona torengitanga.
- 20
- Ko koe hei whakapouri, a kua po: na ngoki mai ana nga kirehe katoa o te ngahere.
- 21
- Nga kuao raiona, ngengere ana ratou, he mea kai, he rapu kai ma ratou i te Atua.
- 22
- Te putanga o te ra, huihui ana ratou, takoto ana i o ratou kuhunga.
- 23
- Haere ana te tangata ki ana hanga, ki tana mahi, a, ahiahi noa.
- 24
- Ano te tini o au mahi, e Ihowa! he mohio rawa to mahinga i aua mea katoa; ki tonu te whenua i au taonga.
- 25
- Me tenei moana nui tuauriuri: kei reira nei nga mea ngokingoki, e kore e taea te tatau, nga kirehe nonohi me nga kirehe nui.
- 26
- Kei reira nga kaipuke e teretere ana: kei reira taua rewiatana i hangā e koe hei takaro ki reira.
- 27
- E tatari katoa ana enei ki a koe, kia hoatu e koe te kai ma ratou i te wa e tika ai.
- 28
- Tau e hoatu ai ma ratou kohikohia ana e ratou: te wherahanga o tou ringa, makona tonu ratou i te pai.
- 29
- Te hunanga o tou mata potatutatu ana ratou: ka kapohia e koe to ratou manawa, ka marere ratou, a ka hoki ano ki to ratou puehu.
- 30
- To tononga mai i tou wairua kua hangā ratou; a whakahoutia ana e koe te mata o te whenua.
- 31
- Ka whai kororia a Ihowa ake ake, ka hari a Ihowa ki ana mahi.
- 32
- Tana tirohanga iho ki te whenua ru ana: kua pa ia ki nga puke, na, pongere ana.
- 33
- Ka waiata atu ahau ki a Ihowa i a au ano e ora ana: ka himene atu ki toku Atua i a au ano i te ao nei.
- 34
- Ka reka toku whakaaronga ki a ia, ka hari ahau ki a Ihowa.
- 35
- Kia whakamotitia atu nga kai mahi hara i runga i te whenua a kahore noa te hanga kino: Whakapaingia, e toku wairua, a Ihowa; whakamoemititia e koutou a Ihowa.
Address: 
Phone: 
Email: